Maluku Itu satu
Satu darah satu suku
Katong satu dari nusa ina
Maluku Itu satu
Satu cinta, satu hati satu
Satu gandong
Hidup ade deng kaka, mari jaga akang bae-bae
Jang pukul dada, bataria katong bole
Jang paksa jago, la tabaos katong kampong bole
Jang cuman par cari viral pasang narasi di tik tok katong orang boleh jago seng taku sapa-sapa
Hee sioo, stop makang puji
Adoo eeee. Eeeeee
 Sodara hati jantong ee
Jang tagal sombong kuasai diri
Hidup ade deng kaka akan ilang
Mana, mana itu Maluku satu darah?
Mana, mana itu hidup pela deng gandong?
Ingatang jang bikin diri jago lalu katong baku binci
Sio tuang ee, jang bikin diri jago supaya orang taku
Tapi saat tanah adat di rampas, politik telanjangi tradisi
Hutan adat di perkosa investor, kamong cuman tutup mulu
Tete nenemoyang dong su ajarkan, katong hidop harus laeng baku sayang deng laeng
Bukan Laeng Baku Bunuh deng laeng
Bukan Maluku namanya kalo cuman utara
Bukan Maluku namanya kalo cuman Selatan
Bukan Maluku namanya kalo cuman tenggara
Bukan Maluku namanya Kalo cuman Barat Daya
Maluku Itu satu, dari ujung Halmahera, Sampe Tenggara Jauh
Maluku Itu Satu, Bukan Sarane atau Salam
Maluku Itu satu satu darah, satu hati
Mari jua tuang hati jantong
Katong rawat ini tanah, biar tapisa gunung deng tanjong
Hidup ade deng kaka jang laeng gantong muka deng laeng
Mari baku kele, Baku Pegang Tangan kuat-kuat
Ramas palungku, ramas janji moyang-moyang deng datu-datu
Ingatang Kio, Maluku Bukan Dua, Maluku Bukan Tiga, Bukan Ampa Apalagi Lima
Maluku Itu Satu, Maluku Cuman Satu
Satu Hati, Satu Darah
Dari Halmahera Sampe tenggara jauh
Makariki, 13 September 2024
