Rumah Tua

Rumah Tua

 

Badiri diatas pandasi cinta moyang moyang

Diatas tanah leluhur yang aman deng tenang

Par ana-cucu sampe sakarang.

Badiri kuat kaya tiang baeleo…

Tampa bajuta rasa, tampa yang ponoh deng kenangan.

Dari rumah basar sampe dapor,

Ada koi di kamar, yang katong pake taru kapala, tidor bale muka dari langit-langit balisah.

Ada meja sombayang tampa ina deng ama pung safaat, tongka lutut,

Carita samua ragu tagal hidop yang baliku.

Ada tampa garam di meja makang jadi hiasan par ina deng ama pung kapata,

nasehat par hidop bae-bae, baku kele, baku gandeng.

Ada Abu di tunggku,, bukti ina deng ama pung sayang  biar kasiang.

Ada rindu dari situ.

Yang tatampong dalam jantong,  taika dalam hati lalu tapancar dari tiang tiang harapan, Ambang ambang kepastian, sampe oras taong ni.

Lalu bapangel, tagal halu yang baulur dari hulu par bakumpul di rumah tua.

Supaya Jadi kuat deng doa par harap

1001 taong lai, katong tetap kuat

Tagal ina deng ama yang kastinggal cinta par katorang.

Slamat natal dari rumah tua

Par ana-cucu Oyang Nadus deng Oyang Ibe

Kuat deng doa, satu for samua.

Makariki, 27 Desember 2021

13.06 WIT