Dongeng | "KI Sholawat" (Part 2/Tamat)

"Lamun Gusti Allah Tos nangtukeun sagala rupana ka hiji jalma, mangka moal jadi mustahil pikeun ngajadikeun sagalana nyata, kun faya kun....." (Kiayi Jubah Putih/Kiayi Jubah Bodas)

Sambungan dongeng carita kamari.......

Samemehna carita kamari yen aya saudagar anu beunghar sieun ka rampogan, anu akhirna ngondang jelema sakti anu bisa ngajagaan harta bandana, ngeunaan anu di jadikeun sarat pasti di lakonan salila eta teu ngarugikeun tapi nguntungkeun manehna.

Dina hiji wanci prak weh si Saudagar teh pa amprok jeung Ki Sholawat tea, tuluy silih obrolan, kieu pokna teh :

Saudagar : "Punten Ki Sholawat, dupi anu kamari di saratkeun tea ngeunaan bakakak anu pangleutikna tuluy tepi anu panggedena sigana rada hese neangan nana, maksudna apa aya cara anu lain?"

Ki Sholawat : " Nya atuh ari hese mah kieu weh, poe ka hiji bakakak na hiji, poe ka dua oge dua, poe ka tilu sarua jumlah poe na kitu kabeh tepi ka poe sapuluh tah wayahna kudu aya bakakak pang gede-gede na da kuring mah rek pamit dinu poe eta"

Saudagar : " Tah lamun kitu mah hade, bisa lah di cumponan asal imah kuring ge aman, mulai isukan bisa di lakonan apa kumaha?"

Ki Sholawat : " Enya atuh ari kitumah hayu derr keun lah!"

Tah kitu obrolan nateh, duanana sapakat rek ikrar dinu poe isukan ngamimitian ngajagaan imah teh.

Poe ka-1 

Poe mimiti Ki Sholawat tugas ngajagaan imah Saudagar beunghar. Poe ieu teh kacida hareudangna. 

Prak weh bubuka baju saeutik bari gegeber tanggu kalayan maca : "Sholawat, sholawat, sholawat......" Bener -bener sakti ceuk Centeng na Saudagar teh da ningali biwirna Ki Sholawat kunyam - kunyem siga nu maca mantra.

Centeng di titah baralik da cenah kuring ge sanggup lah ngajagaan sorangan mah pok na teh, saudagar tangtu bisa sare tibra. 

Ki Sholawat teh ngajagaan nana di ruangan atawa bale khusus paranti ngariung Saudagar jeung anak buahna sosoranganan bari culang cileung nungguan bakakak datang da poe eta teh acan dahar saeutik-eutik acan.

Kabar Saudagar manggil jelema pinter teh tepi ka ceuli rampog tea, gegedugna kacida ambeukeunana tepi ka nyaho poe eta poe ka hiji imah Saudagar di jagaan teh, tuluy wae ngirim 1 rampog utusan atawa anak buahna pikeun ningali ka imah Saudagar mastikeun bener apa henteu na eta kabar teh.

Kulantaran imah zaman baheula mah ku bilik anu bisa di toong dinu sela-sela na tea, nya bari keketeyepan eta utusan anak buah rampog teh ngintip dinu bilik tea, ngan Saudagar mah jelema beunghar jadi lamun ngintip teh teu bisa jelas da bilikna oge tinu bilik anu kacida pang mahalna.

Kaparengan pas kitu bakakak datang hiji, Ki Sholawat kacida atohna tuluy ngomong sorangan rada tarik saeutik :

Ki Sholawat : " Tah geningan datang hiji lah, urang hakan weh lah, ngeunah sigana komo lamun di tambahan di duruk deui mah! Urang parieuskeun weh beheungna! Tuman!"

Rampog 1 : " Aduh, geningan nyahoeun nya kuring datang teh, aing rek di hakan jeung di duruk!? ah bener - bener sakti jelema teh".

Tuluy gura giru balik rek laporan nepungan dunungan nana pamingpin rampog tea bari ku soak jeung sieun, ceuk pikirna Sakti pisan Ki Sholawat teh bisa nyaho kadatangan manehna ka eta imah Saudagar tea.

Gegedug Rampog kacida ambeukna, tuluy nyarita ka eta anak buahna, ke poe ka lima kudu indit kadaritu deui, omat bawa eta Ki Sholawat ka dieu lamun henteu maneh kabeh nu di beakeun ku urg.

Poe ka-5

Dinu poe ka 2, 3 tepi k poe ka 4 na bakakak anu di suguhkeun ka Ki Sholawat sarua jeung pamentana sakumaha jumlah poena. 

Kitu deui di poe ka 5 ieu tangtu wae bakakak loba aya 5 pasti wareug cenah ceuk pikir jeung hatena, yen beurangna bisa puasa.

Komplotan utusan rampog tea kabehna aya 5 urang, ku kabeneran pisan nya sarua jeung jumlah bakakakna.

Kabeh utusan rampog geus ngepung eta tempat bari siap-siap ngagertak ka Ki Sholawat.

Pas rek ngagedor panto datang bakakakna seungit ambeuna, ngeunah saab haseupna. Tuluy seseurian bari nyarita :" Tah! Kamari mah sahulu, ayeuna mah mawa balad opatan jadi aya limaan! Rek di parieuskeun weh lah suku na! Teleg sirahna! Hahahaha!" Kitu pok na teh.

Atuh sakabeh utusan rampog tea soak tuluy lalumpatan da sieun di parieuskeun. Maranehna balik ka pingpinanana bari laporan saenyana yen kapok jeung embung nyanghareupan Ki Sholawat.

Poe ganti poe tepi ka salapan poena gegedug rampog teu walakaya, kacida panasarana ka anu ngarana Ki Sholawat tea, manehna rek ngadatangan langsung jadi pamingpin dinu serangan ka imah Saudagar dina ka sapuluh poena.

Poe Ka-10

Poe ieu mangrupakeun poe terakhir Ki Sholawat jaga di imah Saudagar tea, manehna nununguan bakakak anu kacida panggedena, bari maca "Sholawat, Sholawat, Sholawat....." Unggal peuting teu ereun-ereun da yakin kanu kalimah eta.

Gegedug rampog anu kacida tegeup awakna jangkung badag geus ngacungkeun bedog jeung nitah anak buahna ngaluarkeun kampak, parang, jeung sanjata anu seukeut anu lainna.

Pas rek muka panto, pas pisan bakakak sagede hayam kalkun datang bari sidakeup Ki Sholawat ngucapkeun kalimat : "Tah! Ayeuna mah poe terakhir Gegedugna datang sagede nahaon ieu teh! Urang gantung weh lh sirahna ngarah babari ngahakan na!" Sakitu ucapna Ki Sholawat teh.

Eta gegedug rampog pas barang muka panto teh tuluy sumujud ngusruk kanu sukuna Ki Sholawat bari ngagukguk ceurik tuluy nyarita : "Aampuuun Ki Sanak! Ampuuun Ki Sholawat! Kaula menta ampun! Bener geninganan yen anjeun teh sakti! Geus kabukti ku kuring memeh datang anjeun geus nyaho sagala rupana! Kuring Tobat! Kuring hayang guguru ka anjeun!" 

Ki Sholawat olohok bari seseurian, jeung nyekel tali maksudna rek ngagantungkeun bakakak anu panggedena, tuluy nyarita : "Sok weh jadi murid kuring, tapi silaing ulah ngarampog deui!".

Ki Sholawat tuluy jadi minantu Saudagar anu pangbeungharna, di kawinkeun ka anak awewe hiji-hijina, nyatana eta awewe teh wanoja anu pernah amprok jeung manehna di jalan anu rek mangkat ka Pangaosan/Pangajian tea.

Komplotan rampog tea jadi anak buahna Ki Sholawat bari jeung tararobat kabeh. Saudagar tea kacida atohna sidakep menangkeun minantu anu sakti mandraguna. 

Tamat***

Hikmah Carita Diluhur :

1. Sakumaha jelema bodo katotoloyo ari boga kayakinan mah sakabeh anu di pikaharep bakal ka ijabah ku Gusti Anu Maha Suci.

2. Bukti Cinta Ka Nabiyullah Ku Maca Sholawat najan salah oge menang kautamaan, hartina najan te bisa cara macana, atawa maknana ge geus tangtu alus, komo lamun nyaho hartina, carana, kautamaan jeung fadhilahna.

3. Carita ieu kusabab jaman baheula mah teu aya jeung nuliskeun jadi saukur anu kadenge ku ceuli pamahaman sagala rupana.

4. Mangga candak hikmahna, angge nu saena, piceun anu awonna.

Salam.

Hana Marita Sofianti

Komunitas melawan corona

WargaKotaPwk

Ngeblog di rumah

Foto by : WargaKotaPwk