Nurlela

“Oh… Nurlela… seandainya hari ini, kudapatkan cintamu… tak ingin aku lepaskan, sampai memutih rambutku…”

Sebuah lagu lama dari Muchsin Alatas, keluar dari mulutnye si Rojak, fals banget suaranye. Dia trus duduk di korsi kerjanye, ame si Usup temen kuliahnye.

“Eh, Bos, romannye ente bener-bener mentok ame si Nurlela, kalo eyke bantuin gimana Bos?” Usup si banci kaleng nawarin jasanye, dengan kerling mata dan goyangan yang khas seorang wadam.

“Lu, lu bisa apa, banci kaleng!?”

“Eh, Bos, jangan ngehina eyke begitu dong, ente bole tanya ame si Dodo, Ridwan atawa si Tommy. Die orang, pade dapetin Nurlela karena eyke comblangnye.” Usup terus nyerocos sembari mulutnye dimenyon-menyonin.

“Tapi ujung-ujungnye, die pade putus semua kan?”

“Buat comblang, tugas aye cuman nyatuin awalnye aje, selanjutnye terserah anda…” Usup ngikutin iklan yang ude kadaluarsa.

“Oke, kalo lu gue jadiin comblang, kira-kira berape duit gue musti bayar?”

“Go pek ceng1 buat panjernye”

“Go pek ceng, ntu baru panjer, trus kalo ude jadi?”

“Bos tinggal tambahin cet tiaw2, jadi rekenannye semua cet tiaw go3.”

“Lu, gila kale ye!? Masa gue musti bayar comblang segitu mahalnye, mendingan gue ke dukun, biayanye kaga bakalan ampe segitu.”

“Terserah ente, Bos, buat comblang nomer wahid, eyke rasa segitu ntu ude cukup murah.”

“Oke, gue pake lu, tapi kalo ampe misi eni gagal, gue potong abis lu punye burung!”

“Auw… kaga segitunye kale…” Usup ngejerit sembari megangin selangkangannye.

“Nih, duit go pek buat panjer, selama lu ngejalanin misi eni, lu, juga boleh pake motor gue, pilih aje, noh, di parkiran toko gue, STNK ame koncinye, lu minta aje ame si Karmin!”

“Tengkyu Bos, eyke pake yang Mio aje ye? Abis kalo pake motor laki, burung eyke suka geget4 gito.” sembari nyiumin tangan Rojak, banci kaleng ntu trus ngeloyor ke parkiran toko.

Abdul Rojak, anak muda yang atu eni emang lumayan tajir. Die punya banyak toko meubel, sepanjang jalan Pahlawan Revolusi Klender, Jakarta Timur. Dari kelas dua SMA die ude belajar bisnis ame babenya. Pas kuliah, babenye nyerahin semua usahanye ame anaknye yang semata wayang.

Dalem tempo yang nggak lama, bisnis ntu maju banget. Maklum, anak kuliahan, Rojak ude ngerapiin bisnis ntu, dari perusahaan bermanajemen tradisional jadi perusahaan yang modern. Sekarang toko meubelnye banyak ditemuin di dunia maya. Die benar-benar manfaatin teknologi yang ade.

“Karmin…! Tutup toko, ude jam lima sore!” Rojak nyuruh Karmin, penjaga tokonye.

Nurlela ntu emang macan kampus. Di kampus, siapa yang nggak kenal die, Nurlela yang punya bodi bohay, macam Julia Perez. Tapi sayang, Nurlela dapet julukan “piala bergilir” Rojak sih, nggak pernah perduli ame ntu semua. Dia yakin banget, kalo Nurlela ngasih kesempetan buat jadi pacarnye. Die pasti dapet jinakin ntu macan kampus.
Kaga tau gimana caranye si Usup, dalem tempo seminggu Rojak ude jadian ame Nurlela. Umur pacarannye ude masuk bulan ke empat. Itu rekor tersendiri buat Rojak. Biasanye, yang pacaran ame Nurlela, paling lama cuman tiga bulan.

“Abang, emang serius ame Lela?” Nurlela ngomong sembari matanye ngerling nakal, di kantin kampus siang ntu.

“Serius banget, pokoknye Lela kaga perlu slempang soal ntu.”

“Biar aye dapet julukan piala bergilir?”

“Ah, ntu kan kata die-die pade, yang kaga bisa ngerawat cinta Lela. Abang justru slempang, Lelanye yang kaga serius ame abang?”

“Lela serius banget, Bang, ame Abang. Lela ude tetepin ati buat selamanye ame Abang,” ngedenger Lela ngomong begitu, Rojak jadi ge-er. Jari mereka trus saling bersangkutan.

Sore ntu Rojak abis pulang kuliah, die langsung duduk di meja kerjanye. Tiga hari yang ude, dia sempet beli software buat nyadap telepon. Rencananye sih, buat nyadap HP-nye si Nurlela. Yah, sekedar ngeyakinin atinye, buat keseriusan cinta Nurlela.

Ntu software emang illegal, nggak sembarangan orang bisa beli. Rojak beli lewat black market, yang jual di internet. Kalo ketauan polisi, abis dah si Rojak. Software ntu mirip punya KPK. Tapi bedanye kalo software KPK bisa dipake buat nyadap orang banyak, software yang dibeli si Rojak cuman bisa buat nyadap atu orang aje. Langsung aje software ntu diinstall di komputernye, trus die masukan nomer HP nye Nurlela. Baru sekitar lima menit, dia on-line, ujug-ujug ada in coming call dari si Usup, dia langsung kencengin suara speakers komputernye.

“Lela, yey, ude putusin belon si Rojak?”

“Emang kenape, Sup? Aye masih demen ame die, orangnye royal banget,” suara Lela kedengeran jelas banget.

“Pokoknye, yey musti putusin buruan! Eyke baru dapet panjer lagi nih, dari si Rizal, yang cucunye konglomerat Si Rojak mah, duitnye kalah jauh ame die.”
Rojak nggak sanggup lagi dengar obroran ntu lebih lama, langsung aje kompuernye dimatiin.

“Karmin…!”

“Ya Bos, ade ape?”

“Lu asah golok gue biar tajem!”

“Mao motong kambing, ya Bos?”

“Bukan! Besok, kalo tuh banci kaleng datang ke mari, lu kasi tau gue, mao gue potong abis die punye burung!”

***

 

Catatankaki.
1. Go Pek Ceng= Lima ratus ribu rupiah.
2. Cet tiaw= Satu juta rupuah.
3. Cet tiaw go= Satu juta lima ratus ribu rupiah
4. Geget= Bergetar.

5. Slempang= Khawatir