Koda bolaka pia raran atu matan,koda tutu te gelesek, kirin hoata pia orin tobi puken kirin gawak naan lola doan lola doan. Koda beadoken nete pana nai tugu tarak ,ti koda dore raan doan doan sape sepata te ape wulo rangin kirin beodunen pehen gawe nai tagi tapek ,ti kirin netina raan tepo bolak tepo bolak. Koda pupu ro pi uma pita matan ,di koda weraya bua buhu sape noan tana sina, ke koda obaka naan garan lewo nooro gole kae.
Kirin boito pi lango suku ekan di kirin durut nai beka epana weli niha lewo jawa ke kirin okeka naan tupa tana nooro golek kae. Koda pupu ,pupu maan ata roi denge kirin boit,boit maan ata hulen lile.
Naku nulu koda ,nai tupa ke koda mian nai hodi mayhan,puken koda kelolo koda rabe paken baya Naku keniren kirin ,nai rasun ke kirin mian nai gete nelun ,puken kirin kesuat kirin rabe marin helo.
Koda puken ra mula raan tana bunga, kirin uhuyen ra ada raan mehin goka paken koda raan jaga gerihan ribhun rathun ,ina wae ama lake, kesin belen lewo noo ro gole marin kirin raan liko lapak lewo uhuyen tana atan lein lau lali leu wutun ata poo,lau teti belan bunu matan,weran rae lali napun keo tego,rae teti hikun weli rie, sape pupu uak tukan wai matan. Koda gokaya muko baki di koda noon nuluyen, kirin lengata helan wai,lelu buran di kirin noon wanan.
Naku mo tupa tula koda tou maan teka pahan ana lewo jadi,mo hanen paken lewo naran,koda mo pate helo maan tube bolak noon tana te kedepa mian mo gahin rasun kirin tou maan reket leu maan pahan pada bai tana netin,mian kirin mo ohun balik aan worakem lengat noon tana te kepirin.
Tula Tupa maan lewo naranen te belolo data Geria Rasun maan tana makenen te gelawa rere Di mian koda balika noon ulin Di mian kirin tuena noon alannen. Koda ata hope halla,koda gikatta wade nai gelu wade kirin ata dagan hala ,kirin gaharo kenenan hekat kenenan.
Kewasayo serut rera wulan di koda kirin bisa naan mo data laga, Meanno hiku rera wulan di nulu walen gete naan mo genewa gerewa, Koda lebuta naan peli onem pai kirin lobuta naan peli uhuyem pai.
Koda na hode gasik naan tou tou , kirin na bawak tutu naan natan natan . koda pelate ape rera, kirin beresek sili lia.Koda mayhan tube mange kirin nelun mei worak.
Koda ake mo geleten ,ti koda ake nai peat gelesok, Kirin ake mo kesege ti kirin ake walet todok. Koda paken ra kesuat,kesuat boke raan koli lolon ,raan lolon goka wurhan wetot Kirin marin ra kelolo,kelolo holo raan kapek nalen lelu buran ,raan boka bokan mehin goka, ke nuluyen koda ata tuen hala, ke walenen kirin ata gelu hala.
Tobo rere di tite taan hama hama, Dei belolo di tite taan hama hama. Pai taan hama hama bera taan sare sare, puken pewuno limaka pelain leika pana roon ata diken,nurun rege ran reket leu.
Lewo you ke koda noon puken kirin noon atan. Koda ne ra kelolo kesuato kae e tana taqan ekan gere mula nuba ada nara utun putuk atan matasuku beto wungun hewo yang menjadi dasar hukum adat. pelate ape,gike sili.
Baca konten-konten menarik Kompasiana langsung dari smartphone kamu. Follow channel WhatsApp Kompasiana sekarang di sini: https://whatsapp.com/channel/0029VaYjYaL4Spk7WflFYJ2H
