Anak Petani

Skarang banya yang kurang bangga jadi anak petani, kalu depe tamang tanya ngape orang tua karja apa?

keinginan hati suka mo jawab, Petani. Mar lantaran gengsi paksa badusta, Padahal nyamo dosa kalu jawab apa adanya.

Padahal kalu mo jawab jujur p dorang, kong torang kase mangarti, kalu petani itu banya skali depe sumbangsi pa torang pe Negeri, pasti dong mo mangiri kong m langsung badiri angka topi for tong pe orang tua yang Petani

Nyamo mangiri bgimana, kalu torang bilang pe bangga jadi anak petani. karna gara-gara petani, dorang pe org tua yg kaya itu, boleh mo dapa sua nasi kadalam puru.
Bayangkan kalu nya ada petani, kira-kira ngoni yg kaya itu mo makang apa?

Cuman kamari-kamari ini kita sebagai anak petani sadiki kurang hati pa tu orang-orang kaya yang so mambuta nintau manusia.

Jatah for mo tunjang akang petani pe proses bertani supaya panen masi mo banya hasil Padi, samua so jadi proyek.

Kalu nyanda basudara deng org dalam, nyamo dpa itu bantuan mo pake di kobong,
Kalu nyanda ada uang muka jang harap dapa jata.

Sebagai anak petani yg tau diri, torang yang skarang dorang ada kase skola tinggi-tinggi jadi mahasiswa, datang kamari bukang cuman mo ba kase gaga lipstik kong angka garis kining tinggi-tinggi, Kase gaga kameja deng calana merk.

Torang datang kuliah, supaya tu orang kaya yang nintau diri, dari mana dorang dapa makang nasi di piring, bole mo ba kira, kalu anak petani bisa jadi manusia yang tau manusia.

Jadi anak petani sungguh mati kita bangga!
Karna dari petani ngoni boleh mo ba kaca dorang pe kesungguhan kse makang ini Negeri, tanpa pamri.

Anak petani hari ini sebenarnya musti lebe peka dengan situasi skarang ini, di mana sawah sadiki kasana so mo jadi  bangunan-bangunan pabrik oligarki.

Kalu torang nyamo peka, noh tunggu jo torang mo jadi anak apa?
Paling jadi anak buruh pabrik, yang nya bisa tong ba balas akang pa dorang yang makang puji.

Ada sawah, ada petani. Ada petani ada anak petani.

Ada anak petani, berarti ada tanggung jawab for mo ba jaga ini sawah jangan sampe jadi bangunan.

Supaya torang tetap mo jadi anak petani, yang bisa torang banggakan skali, Sekalipun di hadapan pang ba pancuri berdasi.

Bintauna, 2016