Ngan gagal jeung gagal weh, rek ngaleutikan awakteh. Isuk isuk, can ge acan, mang Empur geus kuntrang kentreng kana piring beling, tanda dagang buburna geus siap. Leos sabari mawa ringkok anu rada saeutik gede jeung jero mun dibandingkeun ringkok anu lainna, ngahaja supaya dibere buburna rada loba, tapi angger weh mang Empurmah ning, mereananateh, ukur dua siuk, bari sasiuk sasiukna teu metung. Jaba encer. Bawang beureum ukur sapuruluk, bari nyokot bawangnage bangun teu niat, asal antel, kitu deui kacang kadele...saledri weh anu ngabubrugteh, ngahunyud, da kurupuk bawang ge, geusmah nyokot eutik, dibubukkeun deuih...
caritana bubur hayam....bubur bubur, hayamnamah teuing kamana.
Teu nepi ka 7 menit, bubur geus beak. Lumayan, ngaganjel. Atuda nawaran salaki, aya ku soleh, make gideug sagala rupa, teuing sangeuk sugan, ...rek meuli sangu koneng deukeut pagawean, poknateh sabari bebeja rek gawe.
Gep kana remot tipi, hayang lalajo anu rada aneh, isuk isukmah lumayan loba berita,ning...ngan sok hayang seuri, setasiun tipi nu hiji jeung nu lainnateh sok rada beda caritana, padahal tema na sarua. Teuing mana anu bener, kamimah rahayat ukur heueuh heueuh weh,bari teu ngarti.
Wanci haneut moyan,...tara tara, tukang doclang ngadon nagen hareupeun imah, sabari bisaan ngarayunateh.keurmah sok ngiluan dangdutan si mang Ece mah, atuh asa kajalanan, dagang doclang sabari hahariringan, lumayan ari kitu teamah sorana, matak sok loba anu nanggap, mun aya nu keur rarameanteh. Ngan edas, laguna tara ganti, ...ti jaman piraun beger nepi kiwari, kabeukinateh ngahaleuang laguna si evi tamala, anu judulna "Janji", teuing aya sajarahna sugan, ngahaleuang lagu eta waeteh.
Jung nangtung, awak asa disusurung, padahal batinmah embung, tapi biwir hese diajak kompromi. make mesen doclang sagala rupa. Mesen satengahteh, si mang Ece semu ngece seuri koneng, pajarteh jang si Emus...piraku orok 3 bulan beuki doclang, atuuh jadinamah mesen saporsi da gengsi. Tapi tungtungna beak oge, da diteundeun satengahna jang salakiteh, bisi haseum, jaba teuing jam baraha ari gawe di BCA mah....hehe, lain di bank, tapi BCA na ieumah Bangunan Can Anggeus,alias kuli bangunan.
Ari beuteung waregmah, asa ku sok jadi nundutan, niat rek ngalicin anu ngabubrug ge, jadi rada bolay, tapi setrikaeunmah geus diteundeun hareupeun tipi, samak geus diamparkeun deuih... lain langsung nyokot licinan, kalakah gep kana bantal, rek ngalempengkeun awak keudeungmah. Teu karasa, lesss weh sare.
Hudang hudang, geus jam 1,etage kageureuwahkeun ku si Emus anu ceurik, lapar bangunnamah, da saenggeus dibeungbeurahkeun ku kueh marimah, si Emus repeh. Meumpeung repeh, geuwat weh abdas, da ari geus solatmah jadi reugreug.
Sabot nilepan mukena, aya sora ma Esnah asup ka imah. Gancang we disampeurkeun, singhoreng rek mere kulub suuk mani ngebul keneh. Sapiring seng metung. Duh, nini niniteh nyiar nyiar piatoheun, make barang bawa kulub suuk sagala rupa.
Si Emus di ais ku ma Esnah, tuluy di bawa balik, pajar resep, sugan bisa jadi pamancing cnah. Hayang seuri aya, atuh mani teu kira kira, umur geus genep puluh lima leuwih hayang keneh kakandungan. Ah dasar....rupa rupa ari patlot gambarmah....
Mangpang meumpeung orok aya nungasuh, tungtungnamah setrikaeun dipindahkeun deui ka juru kamar, samak diberesan deui, gek diuk hareupeun kulub suuk. Tuluy ngadekul. Teu karasa geningan,nya ari ngemilmah, ...kulub suuk tereh beakna, kulantaran inget ka salaki, geuwat piring eusi kulub suuk diasupkeun kana lomari makan, bari suukna karences jeung laleutik ge. maklum sesa pamilihan. Tuluy naheur cai jeung ngahaneutkeun sangu poe. Aya tongkol dua siki jeung peuteuy sapapan jang salaki , tinggal nyieun sambel hejo, beres.
