Bismillahirrahmanirrahim, Assalamualaikum warahmatullah wabarakatuh
Alhamdulillahirobbil alamin, wabihi nasta'inu 'ala umuriddunya waddin, washolatu wassalamu 'ala asrofill ambiyai walmursalin, sayidina wahabibina, wasyafiina, wamaulana Muhammad SAW, wa'ala alihi washohbihi ajma'in. Amma ba'du
Langkung tipayun hayu urang sami-sami panjatkeun puji sinareng syukur kahadirat Allah swt, nu mana dina waktos ayeuna urang sadaya masih tiasa ngariung mungpulung paamprok jonghok patepang raray dina kaayaan sehat wal afiat tur masih dipasihan nikmat iman sareng islam
Teu hilap, hayu urang sami-sami nyanggakeun sholawat sinareng salam ka junjungan urang sadaya, idola urang sadaya, Nabi Muhammad saw. Mugia dugi ka sadaya kaluargana, para sahabatna, para tabiut tabiin, tur mugi-mugi ka urang sadayana salaku umatna anu taat ka ajaranana
Bapak sareng Ibu Guru anu ku simkuring dipihormat, teu hilap oge ka sadaya rerencangan simkuring nu dipikadeudeuh. Dina kasempatan acara Mieling Isra Mi’raj Nabi Muhammad saw ieu, simkuring bade medarkeun ngeunaan naon wae nu janten “Kautamaan Sholat 5 Waktos”
Hadirin nu ku simkuring dipihormat, parantos urang sadaya terang, yen waktos harita Rasulullah saw diparentah ku Allah swt kanggo ngayakeun lumampah ti Masjidil Haram nu aya di Mekkah ka Masjidil Aqsa di nu aya di Palestina. Salajengna Nabi Muhammad saw naek dugi ka Sidratul Muntaha
Tina paristiwa eta, Nabi Muhammad saw kenging parentah wajib ti Allah swt nyaeta ngadegkeun Sholat 5 waktos. Tina kajanteunnan eta, ti kapungkur dugi ka ayeuna parentah eta parantos dilaksanakeun
Ibadah sholat 5 waktos eta teh ngagaduhan kaistimewaan nyalira pami dibentenkeun sareng ibadah anu sanesna. Shalat nu dimaksad eta teh kedah dilaksanakeun ku sadaya umat Islam, kumargi hukumna wajib janten anu teu ngalaksanakeun hukumna dosa
Cing saha wae nu ngadegkeun shalat nu 5 waktos eta, sami sareng jalmi anu ngadegkeun agama Allah swt. Ditambih ku rasa ikhlas sareng khusu, salah sahiji cara pikeun ngajagi sifat hoream ngalaksanakeuna
Hadirin anu ku simkuring dipihormat, shalat 5 waktos eta teh nyaeta shalat shubuh, dzuhur, ashar, maghrib, jeung isya. Salah sawios kautamian sholat nu 5 waktos eta teh, utamina ngajagi shalat subuh sareng ashar, tiasa ngajantenkeun mukana panto surga sareng nutupna panto naraka
Shalat ashar mengrupikeun shalat wustha, nyaeta shalat anu dikhususkeun nyebatkeunnana dibanding shalat nu sanesna. Upami shalat subuh, mangrupakeun shalat anu didongkapan sareng disaksian ku para malaikat
Janten, shalat teh saenyana tiasa ngahapus dosa sareng kalepatan urang sadaya. Mungguhing kitu, urang sadaya salaku umat Nabi Muhammad saw kedah ngalaksanakeun shalat anu 5 waktos. Mugia urang sadaya tiasa ngajagi tur ngadegkeun sholat 5 waktos tur meunangkeun sadaya kautamiana. Aamiin
Hadirin anu ku simkuring dipihormat. Rupina sakitu wae nu tiasa dipedar simkuring, hapunten anu kasuhun bilih aya basa anu teu merenah kana manah. Bobot sapanon carang sapakan, Nuhun dihapunten bilih aya kalepatan.
Wallahul muwaffiq ila aqwamit-thariiq. Waallahu A'lambishawab. Wabillahitaufik Walhidayah, Wassalamualaikum wr wb