Diari, Piye Kabarmu?

21 Februari 2021  23:21 Wektu Indonesia Bagian Kulon

Hai Diari!

Piye kabarmu dina iki?

Gumun yo tak aruh-aruhi nganggo basa Jawa? Kaget ya? Awakmu iku Diari, mosok nggumunan lan kagetan. Diari iku kan panggonan curhat opo wae, termasuk sing ora jelas lor kidul'e. Iyo, ra? Lha iyooo, mulane ojo gumunan lan kagetan! Hehe, mung guyon lho Di! Awakmu ojo nesu, ya? Eling pitutur Sunan Kalijaga:

Dadi wong iku ojo gumunan, ojo getunan, ojo kagetan, lan ojo aleman.

Wis ben awakmu ora gumun lan kaget, simak yo critaku iki!

Ngene lho Di, dina iki mau (tanggal 21 Februari) kepeneran wong sak donya podo mengeti Dina Basa Ibu Sak Donya. Eh bener ora yo terjemahanne? Yen basa Indonesianne iku Hari Bahasa Ibu Internasional. Basa Enggrese Mother Language Day.

Kabare, pengetan iki wis dimulai wiwit tahun 1999. Sing netapke UNESCO disepakati 188 negara.

Basa ibu kurang luwih isa dipadakne karo basa daerah. Tak kandani yo Di, ning donya iki ana ewunan basa ibu lho. Ngertio, ning Indonesia wae kira-kira ana 700-an basa daerah. Persise sing wis diteliti jare ana 718. Sssst... yen bab iki kowe entuk wae yen arep gumun! Mergane pancen keren! Hehe

Saiki awakmu wis ngerti alasanne aku ngaruh-aruhi awakmu nganggo basa Jawa, to?

Diari
Sejatine aku wis suwe ora nulis resmi nganggo basa Jawa. Dadi yo grothal-grathul ngene iki. Nanging yen ngomong basa Jawa ya isih saben dina. Ngobrol karo sedulur lan kanca-kancaku liwat WA lan videonan. Tapi yo ngoko alias basa pasaran ngene iki. Campuran basa wetan lan Semarangan.

Sanadyan ngono ning grup WA keluarga pisan pindo aku nulis basa krama inggil yen pas matur karo budhe utawa bulikku. Ana sepupuku sing gumum kok aku isih isa basa krama.

Aku dewe yo jane mung sak madya basa krama tur akeh sing salah. Ketoke hebat mergane akeh sepupuku sing wis ora isa basa Jawa. Lahir lan suwe ning ibukota dadi luwih sering elu-gue.

Kadang aku eling jaman cilikan yen diutus ibu ngaturke duit arisan kagem bu erte. Kudu nganggo basa krama mlithit. Ibu sing ngajari. Aku komat kamit sak dalan-dalan ngapalke. Ben ora lali. Malah komat-kamite sampek ngarep lawang omahe bu erte.

Nanging, sakwise dibukakne lawang malah ambyar. Lali kabeh! Akhire yo sakelingku wae.

"Sugeng sonten Bu Erte, dalem dipun utus ibu ngaturaken yatra kagem arisan. Dipun utus nyuwun tanda terima.... "

Wis mbuh kuwi krama opo dudu! Hahaha.

Aku iku sejatine yo seneng nulis nganggo aksara Jawa Hanacaraka. Jaman SD biyen, yen aku entuk pamer tulisanku nganggo huruf jawa lumayan apik, Di. Nanging iku biyeeen, saiki yo wis rada lali tur grothal-grathul. Opo maneh bab pasangan kaya taling tarung, lan kanca-kancane. Iki ya tak tuliske. Anggep wae kanggo nglemeske driji.

dokpri

Yen ana wektu kapan-kapan sinau maneh yuk, Di!

Yo wis Di, iki mau aku yo mung arep crita sak madya. Sepurane yen mung ngalor ngidul ora jelas. Anggep wae obrolanne awake dewe dina iki dadi pangeling-eling yen lestarine basa ibu kuwi penting. Uga isa kanggo tamba kangen marang sibu, ibu, simbok, mamak, mama, emak, lan liya-liyane.

Yen ora ana sing nuturke suwe-suwe basa ibu iki bakal ilang karepe dewe. Basa Indonesiane musnah utawa punah! Eman, to? (Kalau tidak ada yang menuturkan, lama kelamaan bahasa daerah itu akan hilang dengan sendirinya. Musnah, punah! Sayang, kan?)

Muga-muga obrolan iki isa dadi inspirasi kanggo kanca-kanca Kompasianer saka Sabang tekan Merauke, saka Miangas nganti Pulo Rote. Opo maneh yen Admin Kompasiana wenehi kolom khusus artikel basa daerah. Bayangno! Opo ora bakal heboh!  (Semoga obrolan ini bisa menginspirasi teman-teman Kompasianer dari Sabang sampai Merauke, dari Miangas sampai Pulau Rote. Apalagi kalau Admin Kompasiana memberikan kolom khusus untuk artikel bahasa daerah. Bayangkan! Pasti akan heboh!)

Oalah Di, aku kok malah nggladrah ngimpi sing ora jelas ngene. Wis yo, wis wengi tenan iki. Aku arep turu. Sesuk dina Senen kudu nyambut gawe, macul! Aku isih perlu mangan ben kuwat nahan kangen kaya Dilan. Eling pituture simbah iki: 

Wong kang ora nyambut gawe ora wajib mangan! (Orang yang tidak bekerja tidak wajib makan!)

Balamu sing paling raket
Dwi Klarasari