Sastra Sunda, Wanoja, jeung Nanasibanana

 

                                                                                                        (foto: kumeokmemehdipacok.blogspot.com)

Dina sastra Sunda kawilang rea para pangarang wanudya atawa wanoja (awewe). Tapi, ari wanoja pangarang mah kaitung langka. Dominasi jajaka pangarang mangrupa kanyataan nu teu bisa dibantah. Tangtu ba hal eta teh alatan sababaraha alesan.

Pangarang wanoja teh teu wungkul wanoja, jajaka ge bisa disebut pangarang wanoja ari jejer, tokoh, atawa pamianganana, upama dina carpon atawa novelna stu nyaritakeun kahirupan para wanoja.

Sumuhun, kawas Tatang Sumarsono nu nulis novel  Galuring Gending (Kiblat Buku Utama, 2001), jejer utamana nyaritakeun juru tari Sarah. Atawa Aam Amilia nu ngareka carita Sekar Karaton (Rahmat Cijulang, 1994) nu nyaritakeun nanasiban tokoh Entik. Atawa Hadi AKS nu nulis carita Saeni.

Dina catetan kritikus sastra Sunda Duduh Durahman suargi, saprak medalna buku Wawacan Rusiah nu Kasep karya Ny RH Hadidjah diterbitkeun ku Toko Buku MI Prawiranata tahun 1922 (cetak ulang Fa. Penerbit Galura 1964) tepi ka jaman sabada perang kasusastraan Sunda suwung ku wanoja pangarang.

Suwungna wanoja pangarang dina sastra Sunda terus lumangsung tepi ka ahir taun 50. Kakara dina taun 60-an sastra Sunda mimiti dipapaesan ku hadirna para wanoja pangarang. Dina buku Kandjut Kundang, hiji antologi prosa jeung puisi sabada perang susunan Ajip Rosidi jeung Rusman Sutiasumarga nu nyarumbang tulisan mah lalaki kabeh. Wanoja pangarang ngan diwakilan ku tilu urang: Tien Wirahadikusumah, Atie WR, jeung Tini Kartini.

Tina tilu wanoja pangarang bieu Tini Kartini mangrupa pangarang nu pangproduktifna. Buku kumpulan carponna nyata Jurig! (1963), Pasa(1965) jeung Nyi Karsih (1984). Eta buku nu bacacar teh laju diriungkeun dina Jurig Pasea jeung Nyi Karsih (Kiblat Buku Utama, 2003).

Upama kumpulan carpon dina buku Sawidak Carita Pondok (1983, 1986, jeung 1992) dijadikeun patokan, sastra Sunda memang miskin tina wanoja pangarang. Dina eta buku, nu citakan kahijina dipedalkeun ku PT Mangle Panglipur turta dicitak deui ku CV Rahmat Cijulang ieu, tina 60 carpon nu mapasan eta buku wanoja pangarang  mah ngan diwakilan ku genep urang.

Nu genepan th Tini Kartini nu ngamuat carpon Pameran; Aam Amilia carpon Di Cindulang Aya Kembang sarta Basisir Siga nu Seuri; Naneng Daningsih carpon Raramean; Sum Darsono carpon Kutu; Ningrum Julaeha carpon Ieu Jalan ku Taringgul; sarta Mumun Munayah carpon Kolecer.

Sesan, 53 judul carpon lianna mah karya lalaki, ti angkatan Tjaraka nu ngamuat carpon Gotong Royong tepi ka angkatan nu pangorana Budi Rahayu Tamsyah nu ngamuat carpon Televisi. Samalah, editor buku Sawidak Carita Pondok oge lalaki kabeh: Abdullah Mustappa, Karno Kartadibrata, jeung Duduh Durahman.

Ketang, para wanoja sunda ge, nu diluluguan ku Aam Amilia spk. kungsi medalkeun buku kumpulan carpon Guriang Tujuh.

Saprak lahirna buku Sawidak Carita Pondok dua dasawarsa ti harita medal deui kumpulan carpon pinilih majalah Mangle nyaeta Kanagan(Geger Sunten, 2003). Bet hanjakal, dina eta buku ge karya ti wanoja pangarang mah saeutik. Tina 41 judul carpon ti 41 pangarang, wanoja pangarang mah, sakaterang, ngan aya 13 urang.

Eta nu tilu belas urang teh nyata Imas Rohilah carpon Cindung Kayas, Tetty Suharti carpon Harga Kasatiaan, Pipiet Senja carpon Dahuan, Poppy Pontiany carpon Lalangse Peuting, Tetti Hodijah carpon Nu Beunghar, Rhien Candraresmi carpon Nu Datang Kahibaran Layung, Holisoh ME carpon Bocokok, Madusari carpon Mega Perak Di Majingklak, Chye Retty Isnendes carpon Dongengeng Dongeng Ambu, Fitri Sulastri carpon Asmaranirca, Tien Kustini Maskar carpon Beni Balakbak, sarta Risnawati carpon Sabot Ngiuhan.

Dua puluh dalapan carpon lianna karya jajaka pengarang ti angakatan Rukmana HS nu nulis carpon Surat Buntu Lamokot ku Getih tepi ka entragan Hermawan Aksan nu nulis carpon Nin. Rukmana HS taun 2007 dileler Hadiah Sastera Rancag tina buku Oleh-oleh Pertempuran(Kiblat Buku Utama, 2006). Anapon editor buku Kanagannyata Tatang Sumarsono jeung Duduh Durahman.

Eta kakara tina antologi carpon rereongan. Buku carpon sosoranganana oge tetep  nu ngaramekeun mah para jajaka. Ti carpon Dog-dog Pangrewong karya GS (1930) tepi ka kumpulan carpon Kingkilaban di Pulo Kayangan (2008) karya Dedy Windyagiri.

Beda jeung carpon, dina wanda puisi mah, pangpangna sajak Sunda, najan teu rea cara jajaka tapi wanoja pangarang sorana rada harus. Kawasna, wanoja Sunda mah leuwih tapis ngareka kecap jeung kalimah dina wangun puisi tinimbang carpon.

Sastrawan Sunda nu munggaran nyerat sajak nyata Kis Ws sandiasma Kiswa Wiriasasmita (1922-1995). Inyana nganggit sajak Ilangna Mustika bari keur ngalempreh dina ranjang di hiji rumah sakit di Cideres, Majalengka, taun 1946.

Kis Ws teu wungkul dipiwanoh tukang nyerat sajak, inyana oge parigel ngareka carpon. Kumpulan carpon karya Kis Ws nyata Mirah Dalima (1992). Ironisna, najan pionir bari kawilang produktif nyieunan sajak tepi ka kiwari inyana tacan bogaeun buku kumpulan sajak. Anapon kumpulan sajak Sunda nu munggaran medal nyata Lalaki di Tegal Pati (1963) karya Sayudi (1932-2000). 

Tapak lacak Kis Ws, Sayudi, Yus Rusyana, Wahyu Wibisana, atawa Dedy Windyagiri tepi ka kiwari manjang sinambungan diteruskeun ku para jajaka pangarang pandeurieunana. Kawas Godi Suwarna, Ano Karsana, Hadi AKS, Deni Ahmad Fajar, Dian Hendrayana, Tedi Muhtadin, tepi ka angkatan Cucu Nurzaman, Tarlan, jeung Eris Risnandar.

Tapi para wanoja ulah waka leutik hate. Najan teu rea, tapi karya para wanoja pangarang oge tetep mapeasan jagat sastra Sunda, samalah karya-karyana rea nu meunang pangleler ti sababaraha lembaga kabudayaan.

Dina buku Sajak Sunda (Kibal Buku Utama, 2007), upamana. Dina eta buku midang wanoja pangarang Tini Kartini, Etti RS, Nita Widya Efsa, Elis Ernawati, Rina Daryani, Chye Retty Isnendes, sarta Euis Balebat.

Tina sajumlahing wanoja panyajak Sunda aya Etti RS. Panyajak nu lahir di Ciamis, 31 Agustus 1958, ieu geus ngahasilkeun opat kumpulan sajak, Jamparing (Yayasan Kujang, 1984), Gondewa (Kujang Kancana, 1987), Maung Bayangan (Rahmat Cijulang,1994), sarta Lagu Hujan Silantang (Kiblat Buku Utama, 2003). Husus Maung Bayangan, eta buku dillr Hadiah Sastera Rancage taun 1995.

Lian ti Etti RS, aya deuih Chye Retty Isnendes. Wanoja nu lahir di Sukabumi, 2 Desember 1972, ieu geus medalkeun buku sajak Kidang Kawisaya(1999). Eta buku oge dileler Hadiah Sastera Rancage taun 2000.

Dina wanda dangding moal bireuk deui ka jenengan Dyah Padmini. Dyah nu lahir di Sukabumi, 10 Oktober 1946, ieu geus medalkeun buku dangding Jaladi Tingtrim (2000). Sarua, eta buku oge dileler Hadiah Sastera Rancag 2001.

Kanyataan miskinna wanoja pangarang dina sastra Sunda beuki atra katara upama nengetan sastra drama Sunda. Data panganyarna, dina pasanggiri ngarang drama Sunda nu digelar Paguyuban Panglawungan Sastra Sunda (PPSS) taun 2007, pinunjul hiji, dua, tilu, sarta harepan hiji jeung dua kabeh diborong ku kaom adam.

Eta jawara nu limaan teh Nazarudin Azhar nulis drama Jeblog, Arma Junaedi drama Rorongo, Dhipa Galuh Purba drama Badog, Tatang Sumarsono drama Randu Jalaprang, sarta Eriandi Budiman drama Buuk Seuneu.

Saeutikna wanoja pangarang dina sastra Sunda sahanteuna alatan opat alesan: wanojana nyalira, media, lingkungan-sosial, sarta pamarentah.

Umumna wanoja Sunda masih kakolomkeun kana atawa masih kasupata ku babasan awewe mah dulang tinande, heureut deuleu pondok lengkah. Ku kituna wanoja mah leuwih eraan, samalah rendah diri, manakomo upama nembongkeun karya buah tina kamotekaranana.

Dina ieu tataran, karya sastra, utama sajak, dianggap wilayah kamar. Sastra teu pantes diuar-uar, sok komo digalantangkeun dina forum atawa mimbar. Weuh, kawasna mah dipahing pisan. Estu sajak mah ngan keur panglipur kalbu. Kitu meureun.

Hambalan sastra keur wanoja kakara semet kotret, baca upama perlu, laju asupkeun deui kana laci, atawa dibuni-buni dina lomari. Nu lian teu meunang apal, komo lalaki mah. Eta sipat kitu teh tepi ka kiwari masih dicekel pageuh ku kaom wanoja, kaasup para mahasiswi nu keur nyuprih pangarti.

Media Sunda mangrupa salahsahiji alesan lianna. Bet hanjakal, teuing memang para wanoja arang ngirim tulisan ka hiji media, atawa memang karya wanoja mah masih kelas jajar pasar antukna karya para wanoja arang mapaesan media Mangle, Galura, Cupumanik, Seni Budaya, Bina Da'wah, atawa Sunda Midang.

Kawijakan nu dilaksanakeun ku redaksi Mangl saenyana bisa jadi rohang nu merenah geusan ngebrehkeun ange-angen katut kamotekaran kaom wanoja. Kapan saban sabulan sakali Mangle kungsi nyayagikeun lahan husus keur para wanoja, karya lalaki mah moal aya nu dimuat. Edisi husus wanoja ieu diaranan Gebyar Wanoja. Eta lolongkrang bisa dimangpaatkeun geusan ngukur atawa ngumumkeun karya-karya kaom wanoja. 

Lingkungan-sosial ogo mangaruhan hengkerna wanoja pangarang Sunda. Tong boroning kaom ibu rumah tangga, dalah para mahasiswi nu daek ngarang oge kacida banggana. Hese. Ku kituna  para (calon) wanoja pangarang kudu meunang apingan.

Memang, di tatar Sunda tacan aya sakola husus calon pangarang. Tapi hal eta bisa dirojong turta dibaladah ku lembaga-lembaga nu aya patalina jeung kasundaan. Dina ieu tataran Patrem, Komunitas Sastra Dewi Sartika, Paguyuban Panglawungan Sastra Sunda (PP-SS), Lembaga Basa & Sastra Sunda (LBSS), Pusat Studi Sunda (PSS) atawa jurusan bahasa jeung sastra Sunda di Unpad jeung UPI kudu jadi tuturus, tangtu ba kudu rukun gaw jeung lembaga atawa paguron luhur lianna, utamana diluareun dunya sastra. Enya cara palemuan nu disanghareupan ku mahasiswa ITB.

Untungna bae aya Ceu Aam Amilia nu getol marajian calon-calon pangarang Sunda. Ceu Aam sabalad-balad geus lima taun katompernakeun ngipuk calon pangarang Sunda, kaasup para wanoja, nu ngebeungkeut dina riuangan nu disebut Panglawungan 13. Berekah, tina eta riungan teh meletek sirung-sirung harepan sastra Sunda.

Salahsahiji nu nangtukeun hirup jeung caremna sastra Sunda oge pamarentah. Tapi rojongan pamarentah kana kalumangsungan sastra Sunda bangun nu sakasampeurna. Pamarentah jeung legislatif di Jabar kawas nu geus ngarasa sugema waktu ngahasilkeun Perda ngeunaan bahasa, sastra jeung aksara daerah.

Upamana kasus festival drama basa Sunda nu mayeng digarap ku Teater Sunda Kiwari. Najan geus lumangsung 30 taun tapi pamarentah di urang teu kapireng ketak jeung rojonganana. Wuri-wuri ngawaragadan, nu nguniang malah kungsi ngajejeleh gadag panitia jeung masarakat sastra drama Sunda.

Ah, moal aya tungtungna medar kurang padulina pamarentah kana hirup-huripna sastra Sunda mah. Hayu, urang wangun sasarengan bae. Sabisana-sabisana. Saenyana rea cara pikeun ngamekarkeun sastra Sunda. Di antarana terus nulis jeung ngaaprsiasi satra Sunda, atawa jadi tukang maca bari meuli karya sastra Sunda. Sakitu oge, asana, kawilang mulya da.***

(DJASEPUDIN, Esais; guru SMA Negeri 1 Cibinong Kabupaten Bogor)