Wangi nu sajati
Jauh di jugjug anggang diteang
Nyukcruk galur mapay laratan
Pusaka nu moal kaukur ku pangaji
Trisaka jimat nu moal laas salawasna
Nikreuh teu di iteuk
Leumpang teu dicaangan
Ngan ati nu wening nu jadi pituduh
Ajen diri nu sajati marengan lalampahan
Geus kamana kamendi mapay laratan
Jungkrang nu lungkawing di sayaban
Neangan nu meh ratusan taun tilem ti buana
Ngahyang taya tapakna
Aya hibar nu sumebar
Aya beja nu katarima
Patilasana aya di sabudereun tatar parahyangan
Puseur dayeuh pajajaran
Belah kidul diwatesan ku gunung tangkuban parahu
Belah wetan di lingkung ku curug
Belah kalerdiwangenan ku sagara
Belah kulon lawang nagara
Ceuk sakaol
Cunuk waktu ninggang mangsa
Bakal ngadeg deui
Dina jaman anu beda
Saung pangumbaraan Pasawahan-Pwk, 14 Februari 2010
