Sara Urang Kampong Kamenc Gara-Gara Corona

Oi sepradik, apa kaber ikak sepradik? Macemmana kaber ekonomi ikak saat corona ne? Mungkin ne salah sikok cara menyampaikan unek-unek, jeritan ati, beban derita idup urang kampong kamenc, liwat tulisan ne, liwat bahase kampong ne, bahase kampong urang bangkak sebeleh Mendo Baret. 

Nama Kampong kamenc, Desa Payabenua Kecamatan Mendo Barat Kabupaten Bangka Prov. Kepulauan Bangka Belitung. Jarak dari Ibu Kota Provinsi (Pangkalpinang) kurang lebih 40 pal. Urang kampong kamenc kebanyek e begawi jadi petani pekebun. Sari-sari e urang kampong banyek mutong karet, sisa e ade bekebun sang, bekebun cabik, bekebun perang perik, kek bekebun sawit. Tapi, tengah nak ne urang kampong kamenc tengah sara. Ngapa hal, lom kena Corona ge harge karet lah murah, pengepol meli e kurang lebih 5.000 / kilo e. Dibantai kek Corona, harge karet tgah nak ne agik 3.000 / kilo e. Sara dak, kan-kan sara e gawe ne. Harge sang nak yak lah, ade dak de Corona lah lama babak bingkas e, urang meli e tgah nak ne dak lebih 40.000/kilo e. Lom harge cabik e, waktu lom ade corona harge cabik lah kek tembus 100.000 / kilo harge e. Dibantai kek corona ne, harge cabik agik 15.000 / kilo orang meli e. Sara dak? kan-kan sara e petani dik. Harge kelapa sawit nak ya ge, kena imbas e kek Corona ne.

Memang Corona ne ngebantai abis gale-gale bidang, luk kali e ekonomi rakyat kecil ne. Macemmana boh harge cabik dak murah, cabik di pasar lah belambur, sikit urang meli e. Biase e yang meli urang Hotel, urang umah maken, kek untuk urang sedekeh besak. Tengah nak ne, apa ge ngaroh, Hotel sepi, rumah maken sepi, urang sedekeh dak pacak, usaha laen ge sepi. Jadi bener hukom ekonomi ya, "makin banyek yang mintak, maka harge ngenac, tapi kalok yang mintak e sikit, harge pasti turon". Kalok diperati, lom abis Corona ne, lom pacak bagus ekonomi dik ne, jadi nek diabis luk Corona ne spradik.

Cemmana ngadep Corona ne spradik?

Oi spradek, dik ne suat ne nek waspada teros, tapi jangen takot igek ulak ngadep Corona ne. Tgah nak ne, di Pulau Bangkak ne lah ade urang kena Corona. Meninggal e sikok lah e. Jangen sampai spradik Corona ne nempoh kampong dik. Jage kampong dik ne, jage keluarge dik, jage masyarakat dik. Tolong ikak padeh atok nek, bak mak, amang-amang, wak-wak kek adik-adik dirik cemana ngadep Corona ne. Palenc dak, ne hah cara e spradik:

1. Jage jarak kek urang laen (kurang lebih semeter jarak e);

2. Jangen bekumpol kek urang banyek agik;

3. Jauh-jauh dari tempet urang ramai;

4. Galek-galek masoh tangen pakai sabun;

5. Kalok tengah batok, sema, bersin, jauh men dari urang laen.

6. Jangen maen ke kota men dak de yang pentenc, along mendep di kebun.

Apa bae ciri-ciri kena Corona ne?

Pacak-pacak lah madeh spradik dik ok. Hal e Virus Corona ne banyek maken korban e, Lah puluhan ribu yang meninggal di Dunia ne. Banyek urang yang lah tua kena e, apa agik lah ade saket laen e di badan e, cepat kali kena e.  Macemmana uman urang kena Corona ya? Urang ya gelugud, batok-batok, nafas e sesek, udeh e sutek kek leteh lese uman e. Misal e ade ciri-ciri macem ya, cepat men ke Puskesmas. 

Cemana jadi solusi ekonomi ne?

Dak banyek yang pacak dik gawi tgah nak ne. Agik pacak besyukorlah, moga be urang agik nek meli hasel tani dik ne. Banyek urang sara di kampong dik ya, nyarik sari maken sari alias gali lubang tutop lubang. Moga be Corona ne cepat ilang e. Mana ngadep bulen puasa kek ari aya. Yo spradik jangen lingah, misal ade tanah lom ditanem, ade beluker-beluker, diulah agik, tanem kek ubi, setila, pisang kek petanem laen e. Kondisi tgah nak ne, ade kek dimaken nek banyek besyukor umon. Yo bangun ketahanan ekonomi keluarga, ekonomi masyarakat dirik ne. Jangen lupak banyek bedo'a spradik, moga Allah ngejauh wabah penyaket ne, virus Corona ne dari kampong dik, kek ngilang virus Corona ne dari dunia ne. Aminn. (ZZ)