[Banyumasan] Hilal Ora Katon

Wulan puwasa kuwe wulan sing mulya, jerene akeh kaberkahan sajroning ngamal lan laku ingkang di tikelaken ganjarane. sedurunge mlebu wulan puwasa jenenge wulan sadran. biasane wong jawa pada nganakna nyadran.

Wujude nyadran saben desa bisa beda-beda. nek nang desa Dawuhan Grumbul kalibening ana acara bersih-bersih makam lan tumpengan. jaman gemiyen akeh wong pada ngirim ning sekiye wis mulai pada ilang tradisine kuwe merga majuning jaman lan wragade werna-werna.

Ziaroh maring kuburan wis dadi kebiasaan warga banyumas, ora nang ngendi papan mesti ana sing nyekar maring kuburan. werna-werna tujuane, yakuwe silaturahmi maring wong tuwa utawa sedulur sing wis pada seda. resik-resik kuburan lan ndongakena leluhur sing wis nang alam barzah.

Mlebu sajroning wulan puwasa biasane ana beda pendapat babaging nentukaken dina pertama puwasa. dene nang indonesia ana rong macem gole nentukaken dina pertama puwasa yakuwe ndeleng wulan utawane hilal lan nganggo petungan utawane hisab.

sore kiye maya karo cuzzy lagi juguran nang ngarep langgar, wis magriban dikir lan ndunga banjur pada dopokan mbahas dina puwasa.

"May, keprimen kae sidang isbate?" si cuzzy takon karo kipas-kipas merga hawane sumuk.

Maya sing lagi slonjor banjur semaur, "ya nek inyong tah melu pemrentah, jerene dalile manut ulama lan pemrentah".

"Owh.. ngesuk wis ana sing arep puasa, ning kae nang banyumas urung katon wulane apa yach?"

"sing digoleti hilal mbok cuz? ya sekang hotel aston purwokerto jere urung katon. jal njenengan ngerti ora alesane kenang apa?

Cuzzy semaur ning karo glewehan, "lah enggane wulan bisa ngomong ya bakal ngaton, hehe.."

Si Maya ngguyu cekikikan, lah rika bisa baen. tapi ya jawabane urung bener kuweh. inyong takon kenang apa hilal urung katon sekang hotel aston?

"Lah inyong ora ngerti kuwe may, jajal takon maring menteri agamane..."

"Wah.. bacin apa cuz?" si maya ngledek karo ngguyu-ngguyu.

madan lirih gole semaur si cuzzy "Bacin ya kena lach, inyong pancen anu ora ngerti koch."

si Maya njawab karo mantep pisan "Haha... sing bener kuwe hilal anake pak samsuri lagi nang njero langgar dadine ora katon sekang hotel aston."

"owalah... ujarku rika temenan ngerti may. jan... bisa baen gole gelewehan. hehe..." Cuzzy banjur menyat mlebu tilik hilal sing nang njero langgar.

awal puwasa kuwe pancen sering beda merga nduwe dasar dewek-dewek. mung garine kepriben gole pada nglakoni. sing dina selasa nganggo dasar hisab, angger dina rebo jere nyempurnakaken wulan sadran lah nek aboge ya sakwise. kabeh mau ya apik gole pada puwasa. beda ya wis pancen lumrahe. sing kurang apik ya malah sing ora melu puwasa tapi ngelek-elekna wong sing pada puwasa. ayuh pada bebrayan ngibadah sajroning wulan puwasa.

mbok ana salaeh inyong sajroning bebrayan lan srawung nang kompasiana ya inyong njaluk samudraning pengapura. semono uga kanca batir menawi wonten klenta-klentunipun ingkang dados cidraning manah sampung kula ngapurani.

Purwokerto,  8 Juli 2013