Oleh M.N.Bako
Kutpameu 15-04-2011
Nyang peukutoe malam uroe hatee insan
Limong blah boh ta meuteu oh dalam nadham
Teutop hate han teupikee keubeunaran
Dalam tipe gadoh malee jioh iman
Manusia that seumpurna geuciptakan
Leupah suci dudoe keuji rot lam lubang
Oh ta tatilek deungon lisek deurajat manyang
Tapi dudoe tapeukutoe lua dalam
Peukeuh sifeut nyang peukutoe hate insan
Hana sunyi ulee ilie uroe malam
Bak poen HASAD iri hate deungon rakan
Hanjeut leubeh oh tangieng gob nikmat manyang
Dua HAQAD teuka dengki gob tapandang
Tamah beunci oh tangieng gob keuleubihan
Mulai sinan poen krot keneng lam pandangan
Oh gob leubeh geutanyoe ka di ek pitam
Lee SUUZZAN brok that sangka perkiraan
Ta anggap ngon dalam hate macam-macam
Keupeut Kibir leupah sombong penampilan
Leupah angkuh dengon ceubeuh teuka garang
Limong U'JUB meurasa droe keulebihan
Ureung laen taniet den-den meu sapeu tan
Keunam RIYA pamer harta bermegahan
Seu akan gob hana bandeng deungon gob nyan
Tujoeh SUM'A geu mita gah kemasyhuran
Beudi tusoe sideh sinoe gob turi nan
Kiban cara geumeugaya penampilan
Cari muka ngon seusama rakan-rakan
Lapan BUKHUL nyang geukeun kliet pemberian
Padahai leubeh deungon laen nibak gob nyan
Fakir miskin aneuk yatim han geusayang
Ureung putoh han peu pajoeh gebrie pih tan
Nyoe bak ma'siet geupeutubiet tan catatan
Bak agama limong reutoh pembukuan
Gob nyan dikeu urutan poen joek sumbangan
Bacut tan weuh bak keuneuleuh lam pikiran
Keu HUBBUL MAL keusikureung ulon peutrang
Harta beunda that geucinta uroe malam
Romoh mewah moto lagak kesayangan
Inong tari aneuk cantek bek leuh leukang
Siploh TAFAHUR geu bangga droe cukop manyang
Bangga pangkat bangga harta bangga seunang
Siblah GHADAB teuga beungeh le peu macam
Meunoe salah nyang jeh hanpa nibak gob nyan
Dua blah GHIBAH tukang upat uroe malam
Meunyoe keu gob hana beutoi lam pikiran
Lee blah NAMIMAH tukang hasut barang kajan
Keun meulikoet han teumakoet ubak Tuhan
Peut blah KIZIB geukeun dusta perkataan
Di meusulet lagee pijet lunkiek bantai
Nyang teurakher keulimong blah bek tuwoe pham
Nan KHIANAT haba mangat bukon wayang
Meunyoe peugah hana salah kejujuran
Nibak pubuet hanjeut keubuet tan sipadan
Ciri ureung si munafek wahee rakan
Ubah janji hanjeut keu saboh ikatan
Nyan Peunyaket dalam hatee tanyoe rakan
Pane teuka dalam donya keuadilan
Dipat di duek hudep Zuhud keu tauladan
Uswatun nyang takeun-keun jioh reunggang
Nyoe mantong na peunyaket nyan tanyoe simpan
Hanpeu harap keu ibadat syiruga lapan
Bandum hancoe teupuroe bee na amalan
Ibarat naleung nyangka sep toe apui panggang
Dak lam Shalat hatee hanjab ingat Tuhan
Tapet mata peu kusyuk droe laen datang
Luwa Shalat peulom tanyoe le urusan
Di sinan deuh mulai Takbir Ratul Ihram
Karena hatee lagee bangkee kutoe han ban
Hana pageu bandum di eu dum binatang
Dak ta usee umpama lalat siat terbang
Leuh nyan troeh lom beuthat tarom lom jiriwang
Ngon Zikkrullah ta usee bandum atra nyan
Lailahaillallah dengon lidah ta meukalam
Allah-Allah beudi samboet deungon simbam
Dalam hatee nyang taingat barang kajan
Lam ibadat disinan deuh pon ujian
Teupet teubleut rasa teungeut keuweut badan
Keuboh gaki mata meu ie thoe rongkongan
Le lom laen di daya jen nyang meu iman
Ek ta peuteun nyang ka takeun di ateuh nyan
Laen troeh lom jeut mangat bron bak amalan
Teuka hasut bak teutangga macam-macam
Caci maki iri dengki lom suuzzan
Bek peuduli meunyoe na niet perbaikan
Pubuet laju peu nyang geu yue le mursyidan
Makin tabloh makin hantroeh bak tujuan
Oh kaseb dok tinggai tacok keulazatan
Hana tatee meunyoe katroeh bak tujuan
Tanyoe keudroe han tateupeu gob nyang pandang
Lom Takhalli peugleh habeh luwa dalam
Arah maksut geutanyoe meuheut keusucian
Maka bek na nyang limong blah tanyoe simpan
Peusuci droe lahee baten bek meukalang
Desya baten tujoeh latheif lam kandongan
Sifeut limong blah sinan kemah bersemanyam
Nyang limong blah hana soe deuh tilek pandang
Oh ka nyata desya lahee ka geupeunan
Desya lahee seubab jahee pengeutahuan
Hana ilmee han soe peu thee joek larangan
Asai punca nibak hatee dum atra nyan
Perintah hatee desya lahee muba roe trang
Mata geulinyueng hidong babah teuka reman
Jaroe gaki ka beurani pubuet curang
Geukeun Takhalli peujioh droe wahee rakan
Masiet lahee maksiet baten bek na sajan
Dak di rayu oleh nafsu bek roeh goyang
Dalam bai-at ta meujanji deungon Tuhan
Nyoe tapeukoe biet mupaloe bak saboh jan
Binasa tuboeh ka ta publoeh lom lam jurang
Tapuwoe lom cukop payah wahee taulan
Katalangga sumpah janji ngon aturan
Nyang keuh desya lahee baten inong agam
Beu ek tapoh ta peugadoh dum atra nyan
Oh ka habeh suci berseh luwa dalam
Tahalli trang baroe timoh keubajikan
Lam Tahalli sipeut puji ta lakukan
Ruku' sujud tadong taduek lam amalan
Mata teungeut baroe jaga ta meumandang
Baca nyang got kitab Hadist dan Al-Qur'an
Babah tasbeh tahmid saheh ngon takbiran
Gaki kapui siblah uneun got tujuan
Jaroe ringan keu gob laen joek bantuan
Di geulinyueng mubaroe deuh bak seruan
Badan kapui bak ibadat teungoh malam
Di ie mata ka ditem roe penyeusalan
Lam Tahalli nyan tapasoe barang kajan
Berlebihan peudeuh-peudeuh pih geularang
Tahalli nyoe tapasoe buet keubajikan
Tapeutaat lahee baten luwa dalam
Seumbah sujud ubak makbud nyang laen tan
Kusyuk ikhlas nyang tamita keredhaan
Kon syiruga nyang tamita nibak Tuhan
Bukon pahala nyang taharap uroe malam
Kon neraka nyang tatakot brat siksaan
Poen bak kubu padang mahsyar troeh umizan
Tameulakee sabee-sabee uroe malam
Beuroh lam kon dalam himpon gaseh sayang
Beujeut keu hamba geutanyoe nyeo wahee rakan
Pat geupuduek tadong taduet urusan gob Nyan
Peu syiruga peu neraka geubri sajan
Bek tabantah bek tasanggah wahee taulan
Nyang taharap tameulakee uroe malam
Beujet keu hamba nyang taharap keredhaan
Meunyoe Allah ka geuredha pat hambatan
Teuntee geucok geupuduek bak kenikmatan
Lagee ureung na nyang pakat jalan-jalan
Hana mungken ureung diba dijoek beuban
Misee ongkos teumpat tinggai ngon makanan
Ka bandum pree istimewa gaseh sayang
Nyan keuh meunan lon ibarat wahee rakan
Antara hamba nyang geugaseh oleh Tuhan
Lam Tajalli nyata lazat tilek pandang
Ka meutumee bineh-bineh kelazatan
Antara droe di dalam droe deungon Tuhan
Mubaroe deuh rasa peungeuh penciptaan
Oh takalon wie ngon uneun munyub manyang
Kana soe poe baroe meusoe lam pandangan
Pandang lahee lahee tilek baten deungon iman
Haqqul Yaqin disinan deuh nyata Tuhan
Awai akhee lahee baten disinan trang
Baroe meusoe droe pandang droe nyata sinan
Disinan deuh kezuhudan oh gob pandang
Akan donya gadoh cinta berlebehan
Teutang harta han teupikee cita manyang
Bukon hanjeut nyang bek tiyeub bermegahan
Tameuharta bek meuhamba keulalaian
Leupah hajat eh seukeudar kecukupan
Padum kaya lagi raja nabi Sulaiman
Hana tuwoe geuseumbah Poe uroe malam
Kaya geutanyoe hatee tuwoe ingat Tuhan
Di Khatijah harta limpah geukeuruban
Lom Qana'ah padup nyang na kecukupan
Beena hasee oh nan sagai pemberian
Hudep taat pateh suroh ngon larangan
Peurintah Allah dengon Rasul geukeurjakan
Peu nyang geu yue han geubiyeu geulakukan
Istiqamah lam ibadah berkekalan
Cinta Allah deungon rasul hantom leukang
Mahabbah hatee cinta sabee Rasul ngon Tuhan
Cinta Allah deungon Rasul leubeh manyang
Dari pada cinta keudroe lam batasan
Baroe ikhlas taibadah uroe malam
Lam sedia pui deungon brat tan hambatan
'Ubudiyah hudep sabee peungabdian
Akan Allah akan Rasul barang kajan
Dong beukong-kong lam i'tikeut wahee rakan
Tameuguree bek teumiree salah jalan
Seubab amal bukon barang keuhiasan
Mita Allah bukon mudah mat ngon reugam
Tapi geukeun hana jioh deungon insan
Ciet leupah toe ngon geutanyoe soe tem pandang
Ohnoe habeh saboh tambeh lam karangan
Ta sanbong lom nyoe na izin nibak Tuhan
Hina dina dhaef fana poe karangan
Han sahoe roeh ngon peu lon loeh ilmee pihtan
Kutpameu, 16-04-2011
M.N.Bako
