7 Lathief

Oleh, M.Nasir Bako

Desya bathen na tujoeh boh nibak insan
Troeh bak gata uroe malam barang kajan
Nyang keuh desya peunutoep hijab deungon Tuhan
Habeh binasa  leupah sayang  dum  amalan

Lathiful Qalbi ngon jantoeng jasmani berhubungan
Dua jaroe diyueb susu blah wie insan
Nyang keuh teumpat penghuni iblis ngon syethan
Sifeut musyrik,sifeut kaphee ngon tahyulan

Peugleh hatee deungon zikee ingat keu Tuhan
Geugantoe lee dalam hatee lua dalam
Islam,Iman,Touhid,Ma`rifat dengon Ihcsan
Nyan geunantoe ka geupasoe keubeukalan

Lathifurroh dua jaroe blah uneun nyan
Diyueb susu bapak ibu inong agam
Berhubungan rabu jasmani wahee rakan
Bahimiyah sinan teumpat bersemanyam

Bahimiyah binatang jinak nyang geupeunan
Peuturoet nafsu leupah leuhu uroe malam
Hingga tuwoe ka nibak Phoe dum meulayang
Tuwoe asai tuwoe akhee tuwoe Tuhan

Lathifatussirri dua jaroe ateuh susu wie insan
Sinan teumpat Syabiyah jeut keurajaan
Geukeun Syabiyah binatang buas uloen peutrang
Sifeut dhalem anianya beungeh deundam

Nyang keuh sifeut dalam hatee ka meukalang
Peu han jahat peu han bathat deungon Tuhan
Ngon peu gadoh sifeut dhalem nyang bak insan
Ingat sabee,tameuzike uroe malam

Sifeut beungeh anianya deungon deundam
Geugantoe lee ramah tamah gaseh sayang
Cahaya Nur ka teupancar  dengon iman
Jeut syedara dum geutanyoe seusama Islam

Lathiful Khafi dua jaroe di duek teuman
Di ateuh miek blah neun  ureung inong agam
Lathiful Khafi limpa jasmani jieh keundaraan
Han di teupeu hareum haleu peuteng seunang

Sinan diduek deungki khianat sifeut syaithan
Jeut binasa doenya akherat wahee toulan
Lathiful Khaffi, dua sifeut broek  teusimpan
Hasad deungki ngon munafi` nyan  disinan

Nyoe ka gadoh dua sifeut keujahatan
Geugantoe lee dua sifeut kebajikan
Sifeut nyang got geugantoe ka uleh Tuhan
Sifeut syukur seurta sabar dalam iman

Lathiful Akhfa teungoh dada diduek simban
Berhubongan empedu jasmani wahee rakan
Rabbaniyah sifeut rayek sinsn gudang
Sifeut ria, teukaboe, u`jub,sum`a sajan

Kon tanyoe poe banbandum nyoe atra Tuhan
Bandum hancoe dum teupuroe beena amalan
Menyoe kagleh hitam puteh dum sifeut nyan
Sifeut Ikhlas deungon khucu` deuh lansoeng trang

Sifeut Tadarru ngon Tafakkur nyata sinan
Baroe lagak dum akhlak jeut keu insan
Lathifun Nafsun Natiqa nibak keuneng paleng manyang
Nafsu amarah sinan limpah keujahatan

Nyan keuh sifeut paleng jeuheut jeut keupeunghalang
Lam masyarakat leupah that brat perbaikan
Lam sifeut nyan dua sifeut keujahatan
Le hayalan cita panyang angan-angan

Kebaikan dua sifeut pih na sinan
Ulee teuntram meutamah pikiran teunag
Lathiful Kullu Jasad nyang terakhir uloen peutrang
Ban saboh tuboeh jieh kuasa uroe malam

Sifeut ghaflaf keulalaian nibak insan
Le peu tuwoe seubab laloe keujahilan
Lam Lathif nyoe dua sifeut keujahatan
Sifeut jahee sifeut ghaflah keubeundaan

Nyoe ka gadoh dua sifeut keujahatan
Geugantoe lee IImu Amalan oleh Tuhan
Pi ee jeuheut nyoe ka gadoh ubak insan
Deuh peurangoe akhlak kajroeh jeut tauladan

Peuteuseubut dari muyueb troeh keusudahan
Lagee geukeun dalam ayat firman TUhan
Ayat tujoeh sampee siblah surah asysyam
kon lam nadham lam bacaan jeut tabaca

Wanafsiwwamaasawwaahaa
Faalhamahaa fujuurahaa Wataqwaahaa
Qad aflaha manzakkaahaa
Waqad khaaba mandassaahaa

Demi diri manusia Tuhan yang meunciptakan
Leunyan geupasoe bibit jahat ngon kebajikan
Bahagialah soe ureung nyank meusucikan
Biet ceulaka soe mantong bloeh lam keujatan

Meungeunai ma`siet meunuroet Ghazali lam peuneusan
Ma`siet lahee ma`siet baten nabak insan
Ma`siet lahee lam masyarakat le keonaran
Judi maboek rampok mupoh ceumeucui ancam

La en koropsi lom  teujadi barang kajan
Zina dayus sampee troeh bak peunipuan
Le la en lom qias keudroe wahee rakan
Ma`siet lahee ohnoe mantong keucuplikan

Ma`siet bathen dalam lathief lam karangan
Nibak judul tujoeh lathief keuteurangan
Oh noe mantong seukilas loen brie bayangan
Dalam syair tuk seukeudar peungeunalan