Rancak Si Boim
Marunda Rawabelong tempat lahirannya
Boim anak bang Amje dan mpok Eha
Baek budi bahasa pinter sekolahnya
Ngajinya lempeng saban Senen Kemis puasa
Â
Boim jawara silat kaga ada lawan
Didemenin banyak anak perawan
Jangan disangka dia kaga punya dedemenan
Fatima perawan demplon bukan bikinan
Â
Nyang naksir Fatima bujubuneng bejibun
Pemuda dari Cilincing ampe Tambun
Kalo dikata milih Fatima apa harta karun
Nyang milih harta karun matanya rabun
Â
Robi Sugare ama Boim sodara sekumpi
Tapi kelakuannya beda langit ama bumi
Jahilnya nyebelin bikin dongkol ati
Gawenya teler ama maen judi
Â
Entu malem Jumat udaranya dingin
Fatima pulang ngaji Robi Sugare ngintilin
Dasar bejad bokong Fatima digerepein
Fatima berek Robi tengkurep dijorokin
Â
Fatima dongkol ngadu ama gacoan
Boim ambek Robi digeprak nyemplung comberan
Baunya naujubile ngalahin jamban
Idung petot gigi rompal muka belepotan
Â
Ini cerita Boim anak Betawi
Disayang adek, mpok, enyak ampe nyai
Biar kata sekumpi ama Robi
Kelakuan romannya langit ama bumi
Â
Catatan:Â
Rancak adalah kesenian bertutur rakyat Betawi, umumnya dibawakan dua orang yang berbalas pantun diiringi musik gambang kromong.Â