Urip kaya ngono dadi susahe Nawang Wulan, mula sinambi tandang gawe dheweke tansah ngunjukake pandonga marang para dewa supaya bisa bali menyang kahyangan. Gusti Kang Murbaning Dumadi akarya jagad mangerteni apa kekarepane Nawang Wulan.
Sawijining esuk, nalika Nawang Wulan njupuk pari ing lumbung nemokake selendhang birune sing ilang. Sepira bungahe Nawang Wulan merga bisa bakal bali menyang kahyangan. Slendhang biru disampirake ing pundhak banjur nyeluk Jaka Tarub, "Kang...Kakang Tarub enggal renea..."
Jaka Tarub sing lagi nggendhong Nawang Sih banjur metu saka sentong. Dideleng Nawang Wulan wis nggawe slendhang biru sing disingitake ing isor tumpukan pari ing lumbung. Sikile ora ngambah lemah lan cahya rupane Nawang Wulan sing bungah sumunar kaya Sang Candra nalika purnamasidhi.
"Kang aku kudu bali menyang kahyangan. Nanging aku tetep bakal momong lan nyusoni Nawang Sih. Yen Nawang Sih nangis kangen aku selehen ing anjang-anjang gantungen ing wit jambu. Aku bakal mudhun lan ngemong ing anjang-anjang merga aku ora oleh maneh ngidak lemah...."
Sawise pesen kaya ngono pedhut mangsa rendheng kairing sumilire angin anyiptake kluwung. Nawang Wulan mabur bali menyang kahyangan. Jaka Tarub mung ngembang duren (ndlongop) wae. Nawang Sih sing lagi wae diedusi kudu nyusu dadi nangis kepijer.
Purnamasidhi ing mangsa rendheng ora ana kalangan kang endah. Mendhung gumlayut kaya atine Jaka Tarub kang keranta-ranta nggendhong Nawang Sih sing ngelih lan kangen ibune. Ora ana sing bisa ditumindakake Jaka Tarub ngenengake tangise Nawang Sih karo ngura-ura nembang:
Dak lela lela lela ledhung
Cup menenga aja pijer nangis
Anakku sing ayu  rupane
Yen nangis ndak ilang ayune
Tak gadang bisa urip mulya
Dadiya wanito utomo
Ngluhurke asmane wong tuwa
Dadiyo pandekaring bangsa
Wis cup menenga anakku
Kae mbulane ndadari
Kaya butho nggegilani
Lagi nggoleki cah nangis
Dak lela lela lela ledhung
Enggal menenga ya cah ayu
Tak emban slendang batik kawung
Yen nangis mundak bapak bingung ..
Rembulan isih ketutup mega. Nawang Wulan ora bakal mudhun. Embuh kapan....
