Nawang Wulan banjur crita yen dheweke widadari sing kelangan busana lan slendhange mula ora bisa bali menyang kahyangan.
"Bisa uga busanamu kintir, yen gelem dak wenehi busana Simbokku sing apik nanging ora bisa gawe miber bali menyang kahyangan."
Nawang Wulan ora bisa nolak. Jaka Tarub menehake sarunge kanggo nutupi Nawang Wulan banjur mbopong menyang omahe.
0 0 0 0
Simbok randha Dhadhapan wis bar ngulup lan nyambel. Segane uga wis mateng. Kari lawuh pitik utawa iwak lele. Karo ngenteni tekane Jaka Tarub bali saka mbebedhag, Simbok metu kekarep nyapu latar. Durung nganti tekan ngarep kori, krungu swarane Jaka Tarub sing bengok-bengok,"Mbok... Mboook.... Iki aku wis nggawa...."
"Byuuuuuh iwak apa ta Le iki kok gedhe banget...?" jare Simbok sing kaget weruh Jaka Tarub mbopong Nawang Wulan.
Nawang Wulan mung ngembang kacang (mbesengut) krungu swarane Mbok Randha Dhadhapan.
"Mbooook....iki dudu iwak dudu sato. Iki widadari sing bakal dadi mantune Simbok," jare Jaka Tarub karo mudhunake Nawang Wulan.
Bleeeg! Simbok Dhadhapan kaget tiba mengkureb. Kaget weruh prawan ayu digendhong Jaka Tarub.
Ana candhake.
Bersambung...
