Gumelar oro-oro Ibu Pertiwi kang amba tanpa winates
Pinayungan Bapa Angkasa kang murub ayub suminaring purnamasidhi
Ing kene, palataran oro-oro Sang Bromo aku sendheku angeningake cipta
Anunggalake rasa kairing sumiliring bayu Redi Meru kang nentremake sukma
Ora ana lesan kawetu mung galih kang tumuju ngarsane Gusti Murbaning Dumadi
Dudu panyawun gumebyaring mas inten raja brana
Uga kamulyaning drajat lan pangkat
Apa maneh kasekten raga kang ora tedas tapak palune pande
Mung sembah bekti rasa  sukur kang kaparingaken dumateng Panjenengan Dalem Gusti Kang Maha Asih
Kumeluking arum dalu dupa ratus muga bisaa angandharake donga
Sumebaring ganda arum kanthil, kenanga, lan mawar muga bisaa ngiringake donga ing ngarsaning Gusti
Dak sawang sumunaring purnamasidhi isih nggawa antenge lingsir wengi
Eseme candra paring tandha kinasihing Gusti marang manungsa
Ing sepining wana lathiku isih mingkem katutup jeriting galih
Kaya gumludhuge Sang Bromo sinautan kawah Jogring Saloka
Ya gene isih akeh sing tansah gawe cidra sulaya
Catatan:
* Geguritan iki wis nate dakkirim ning akun efbe mas ukik.
* Puisi ini sudah pernah dikirim ke akun efbe mas ukik.
Baca konten-konten menarik Kompasiana langsung dari smartphone kamu. Follow channel WhatsApp Kompasiana sekarang di sini: https://whatsapp.com/channel/0029VaYjYaL4Spk7WflFYJ2H
