Kawi ing Ratri

Kawi ing Ratri 

Sumilir angin dalu anggawa katresnan 

Tumetes udan gemiricik slaras tabuhane niyaga

Katon endah sinawang netra 

Krasa asrep kapiyarsa ing karna

Asmaradana 

Ilingana driya kang wawang

Wengi iki ingsun slulup ing geguritan 

Nyelehake rasa ing pangkone katresnan 

Gawang-gawang wewayangan sira

Tansah jejogetan ing manik-manik netra 

Manis esem gemuyumu

Endahing sorot netramu

Tansah karonce ing telenging ati 

Senajan adoh ing paran

Rina wengi sira tansah ingsun kangeni

Tan ana rasa ragu lan percaya ingsun bakalan setya tuhu

Lir kasetyane lintang rembulan ngancani lakune wengi

Sawarsa wus lumaku 

Tresna iki nora bakal cidra

Tansah sumimpen rapet jroning kalbu

Tan bisa luntur dening lumakuning wanci

 

Rina lumaku murugi ratri 

Langit sansaya peteng

Bagaskara angslup gumanti candra

Endahing crita kawuri tansah dados memori

Tresna ingsun marang sira

Tresna nyata dudu tresna reka-reka 

Gedhe rasa pangarep ingsun

Urip mulya sesandhingan kelawan sira