Rap nyagap beuteung, geuning offside. Jadi pikiran, kumaha carana hayang sixpack. Ret kana sirah, alah siah geus aya nu bodas. Jadi pikiran deui, pinset mana pinset. Terus ngaca, waahhh…asa beuki poek bati papanasan. Atuh gacak2 toko neangan produk jang nyeseh benget. Keueuman ku rinso wae kitu, Mang?
Naha ari hate kotor, beut hare-hare. Koret diingu. Hasud dikeukeupan. Iri diceboran. Dengki diparaban. Nu kararitu mah tara jadi pikiran. Tetela, kuring masih ngahamba dunya. Hayang keneh dipeunteun ku manusa. Hayang boga mobil meh disebut berhasil. Hayang boga tablet meh disangka gaya. Kajeun teuing (maaf) selempak soeh, nu penting make kacamata. Sholat masih keneh kaberangan, bae teh teuing. Ngaji belang betong, teu arapaleun batur ieuh.
Ah, toloheor pisan geuning hirup kuring teh. Ngomong hayang asup sawarga, tapi kalakuan jiga kuda. Sesepak, ngomong tara dijaga. Ngaku cinta Rosul, tapi sapopoe mikiran dunya. Boga duit saeutik dieumpet-eumpet, sugan aranak incuan.
Saking toloheorna kuring, naon maksudna coba eta dijieun tulisan sagala. Kagorengan beut dibeja-beja. Angur mah omean, lain ngocoblak di dieu. Enya atuh ari kudu kitu mah. Hampura, Mang.