[caption id="attachment_176186" align="aligncenter" width="555" caption="Ane Berdoa semoge Jakarte dipimpin Orang yang bener"][/caption]
Gue Orang Jakarte Asli loh!. Hanya saje gue sekarang tinggal di Bekasi saat ini. Gue lahir dan besar di Jakarte. Rasanye kagak redho ane bila Jakarta kagak dipimpin oleh orang yang pas. Orang yang waras, dan pas banget di saat yang tepat membuat Jakarte adem dan tentrem. Damai dan Sejahtera. Gemah lipah loh jinawi.
Gue orang Jakarte, kerja juga di jakarte. Kalau sekarang gue kagak punye katepe jakarte, gue tetep punye kenangan manis selama punye rumah di jakarte. Untunglah Babeh almarhum belum menjual rumahnye, jadi kite-kite masih bisa nginep di rumah babeh yang sekarang ditempati ame abang ane. Kagakluas sih rumahnye, tapi cukuplah buat empet-empetan 2 keluarge.
Gue orang Jakarte, kepengen banget Jakarta kayak New York atau kota besar lainnye. Kagak ada banjir dan bebas sampah. Jalananpun kagak macet seperti sekarang. Perasaan, dulu gue dari Priok ke Senen cuma sekelepetan, Eh sekarang bujuk deh!. Priok-Senen bisa sejam lebih. Udah gitu ditambah mandi sauna lagi. Baju gue basah ame keringet gue yang bau. Untunglah gue kagak makan semur jengkol hari itu, hehehe.
Gue orang Jakarte, lahir di Jakarte, tapi baru 2 kali ke Monas. Pertame waktu gue sekolah esde, lalu kedue ketike gue gak sengaja nyasar jumpalitan cari jalan merdeka barat. Akhirnye, gue ngaso deh di Monas. Kepengennya sih naik ke atas, lihat Jakarte dari atas. Gue mau bilang pada lu pade, gue anak jakarte yang sudah naklukin monas, hahaha.
Gue orang Jakarte, tinggal sekarang di BSD. Orang bilang Bekasi Sonoan Dikit. Kenape gue tinggal di BSD? Karena gue udah gak sanggup beli tanah di Jakarte yang harganye selangit. Gaji gue jadi guru, mana bise beli tanah luas di mari? Kalau beli tanah satu pengki gue masih sanggup, tapi kalau udah 100 meter buat rumah? Busyet Dah!!! Harganye bise ratusan jute. Walaupun katenye tanah abang luas, tapi itu bukan tanah ane, tapi tanah orang lain yang kebanyakan kaum pendatang.
Gue Orang Jakarte, terpaksa mingser dari Jakarte. Kerja dan besar di Jakarte cuma bisa celingak-celinguk naik busway. Mirip orang kampung utan tempat ane sekarang. Megap-megap lihat kemewahan gedung pencakar langit di jakarte. Makanye, bila ade ponakan ane dari bandung dateng, ane ajak aja naik busway. Murah ongkosnye, dan nyaman pula dijalannye. Kadang gue cerdik juga. Belom nyampe halte terakhir, gue udah suruh turun tuh ponakan, dan naik lagi puter-puter kote Jakarte. Sampe ponakan ane keder dan dikiranye Jakarte Luas kayak Kalimantan, huahahaha, ketawa ngakak ane!
Gue orang jakarte, tapi kagak bisa ikut pilkade. Gue cuma bisa doain aje. Siape yang terpilih jadi gubernur kudu bisa nih benahi kote kelahiran gue. Kote yang banyak menyimpan kenangan manis, apalagi waktu gue masih punya pacar di Kemayoran. Bunyi pesawat terbang rasanye kagak kedengeran, karene dunie cuma milik kita berdue aje, hehehe.
Gue orang Jakarte, sedih juge ngeliat calon gubernur import dari daerah lain. Kayak kagak ade calon dari Jakarte. Kayak kagak ada tokoh betawi yang bisa mimpin. Kalau duit gue banyak, gue udah nyalonin diri jati gubernur DKI jakarte. Gue kalahin tuh bang Foke. Gue kepengen Jakarta kayak jaman bang Ali Sadikin. Kagak macet dan kagak kena banjir. Apa iye yah? Ah mungkin gue belom lahir kali ye, hehehe. Lagi-lagi gue cuma bisa mentertawakan diri gue sendiri. Jadi malu same Jokowi, hihihi.
Gue orang Jakarte, kerja di jakarte. Dari Bekasi ke jakarte jalanan macet. Kerase banget buat orang kecil macem gue. Bawa mobil saleh, naik angkotan umum juge saleh. Maju kena mundur kena. Kalau udah begini, kite ikutin aje alur yang ade. Semoge gak kesesat jalanne.
Gue orang jakarte. Udah berkolaborasi same orang sunda. Bini gue orang bandung asli. Kalau lebaran gue kagak sholat di istiqlal lagi. Good by Istiqlal, gue lebih demen sholat idul fitri di jalanan kota bandung yang sejuk, walaupun gue juge tahu kote bandung juge same sumpeknye same jakarte. Bandung jadi kote pelesiran orang jakarte yang lagi galau, kagak tau mikirin ape, hehehe.
