PUasa udah masuk hari ke 21. Mpok Ipah dah hampir mati gaya buat nyiapin masakan saur ama buka. Semua resep andalan dah keluar, dari bakwan udang, bakwan sayur, bakwan jagung, sampe bakwan kriuk saking tipis gegara kaga ada isinya, udah dibikin.
Kaga beda sama saur, dari ayam kecap, ayam rica-rica, ayam goreng, ayam panggang, ayam tangkep, ayam kentaki, ayam asem manis, sampe ayam suwir dah dibikin. Nyang belom ayam tetangga aje. Mpok Ipah masih ngerti kalau ayam tetangge repot nangkepnye
Sebenernya Mpok Ipah pingin kayak orang-orang, jajan alias beli-beli makanan buat buka puasa. Apa daye, dia juga kagak doyan-doyan amat ama makanan luar. Anaknya sebelas duabelas ama emaknya.
Jadilah di minggu-minggu terakhir ramadan emak anak bengong, kebingungan.
Biar kagak bingung, sekalian nyari ide, Mpok Ipah mutusin buat gegoleran di ubin. Kebetulan ni hari emang panas banget.
Poon sampe pade lemes. Kurang tenage gitu. Kagak salah kalau kepikiran buat nyegerin badan. Tapi kagak sampe berendem juga di bak mandi sih.
Lagi ngehayal minuman ape yang seger, Mpok Ipah ngeliat statusnye Mpok Ane. Kayaknya lagi bikin saos keju apa mayones gitu. Warnanya bluwek, putihbkagak, coklat kagak, rada mirip dah ama mayones.
Kebenaran di kolkas masih ada sisa semangke. Campur kolang-kaling ama blewah trus disiram mayones, beh. Seger banget. Dingin maknyes.
Langsung aje Mpok Ipah pesen ke Mpok Ane, nanyain yang di status.Â
"NE, ntu krim ya? Berapaan?"Â
