Saminggu Bobogohan Langsung Ngajuru

Saminggu Bobogohan Langsung Ngajuru

Toko material kuring ayana di Ciawi. Unggal poe kuring bulak balik Tasik Ciawi, kolot di jalan. Milihan barang keur jualeun di toko material mah teu hese di antara na semen, besi beton, closet, konci panto, pipa PVC  jeung sajabana. Ngan hiji nu musingkeun kuring lamun kudu milihan keramik jualeun. Aya keramik nu ceuk pamikiran kuring hade rupa tapina teu payu. Aya keramik pamilih pamajikan nu ceuk kuring teu alus corakna , naha da eta nu payu. 

Padahal kuring apik dina milih keramik, lalila, teu sidikna diteuteup jauh deukeut. Pesen keramik sa mobil leutik. Ari pamajikan milih keramik meni gancang, eta, eta, eta ... jebrod pesen keramik sa tronton. Kuring ngagoak ka pamajikan: "Ulah wani teuing."  Manehana ngan imut ngagelenyu. Matak  heran eta keramik sa tronton teh teu lila beak, payu. Manehna boga instink dagang, lamun nakol paku tea mah langsung kana huluna, jebet, jebet beres.

Dina hiji mangsa aya salesman keramik, sebut wae ngarana Asep. Ieu jelema bener, bener kasep, someah,  awakna atlethis, ngobrolna ngarenaheun keur batur. Poe harita pamajikan teu ka toko jadi kuring nitah manehna engke sore ka imah manggihan  pamajikan nu arek milihan corak keramik.

Bada magrib aya nu ngetrokan panto gerbang, ku kuring mukakeun panto tuluy Pa Asep diajak ka jero imah. Bari ngobrol ngaler ngidul, pamajikan milihan keramik, pesen sa tronton. Geus beres, Pa Asep  pamitan.  Pamajikan jeung kuring nganteurkeun manehna  kana panto gerbang.. 

Kasampak  dina mobil aya mojang nu geulis keur ngome hp. "Eta kabogoh?" Ceuk pamajikan kuring nu kepo (Knowing  Every Particular Object) nanya ka Pa Asep. Manehna ngan unggeuk bari seuri. Manehna nyetir mobil, gugupay ngageuleuyeur indit.

Saminggu ti harita datang ka toko kuring Supervisor-na. "Kamana ari Pa Asep?" Ceuk kuring nanya ka Pa Supervisor. "Asep cuti lantaran pamajikana ngalahirkeun." Tembalna. Kuring ngahuleng bari mikir:" Saminggu bobogohan, langsung ngajuru? Euleuh geuning jiga carita dina buku roman. Pamajikan di Bandung toh pati jiwa raga ngalahirkan orok, buah cinta Pa Asep jeung istrina,  ari salaki di Tasik ngadon suka-suka reujeung nu ngora." Teungteuingeun ieu playboy Bandung.

Minggu hareupna aya beja ti salesman nu sejen yen Pa asep kabur teuing kamana, keur diteang ku Supervisor jeung babaturanana da duit parusahaan kapake ku manehna.

Ciawi, 19 juni 2022