Ari Kuring Kaasup Santri?

Alhamdulillah, poe-poe ayeuna keur rame ku santri! Upacara di ditu di dieu! Pawey kaditu-kadieu! kagiatan mawa tema santri jeung kasantrian meriah!Spanduk ucapan ti para panggede  euyeub dimana-mana! ngawilujengkeun ka kaum santri. Kuring ngilu bungah! tanda santri beuki nanjeur jeung kaitung!...dina sagala hal! reugreug, sabab kuring yakin beuki loba santri tangtu beuki saeutik jalma anu salah lengkah!. Hiji hal anu kudu jadi ugeran, kaom santri ulah poho kana purwadaksi! Ulah maksakeun ngambah hiji bidang anu lain fakna! Lain ulah ngan pan geus pada apal  dalilna! Inggis kecap santrina kasebut dua kali....santri-santri!

Bakating ku seksina santri, loba jelema nu ngagaya jiga santri jeung hayang diaku santri (kaasup kuring sigana heheheh?). Mun keur ngalamun kadang sok nanya ka dirisorangan, ari kuring teh santri lainnya nya? Meuting di kobong pernah, ngaliwet bisa, Maca kitab bisa paslun-paslun wae ma heheheh! Kieu-kieu ge Kitab Safinah mah kuring teh da tamat, nya alhamdulillah atuh  tatacara ngalaksanakeun rukun Islam teu tatag totog teuing.

Foto bangunan di luhur minangka na mah pasantren kuring. Pondok Pesantren Al Hikmah! pasti moal loba nu apal ka eta pasantren sabab ngan pasantren basajan di hiji lembur anu rada nyingkur....tapi sok sanajan kitu keur para santrina mah estu mewah tur munel ku elmu jeung pangalaman!  Ti baheula ge eta bangunan teh geus dua tingkat, ngan teu dibeton kawas ayeuna. Kobongna ku bilik jeung lantaina papan atuh mun aya nu leumpang teh sok katangen. Sok sanajan Aa Ajengan (kitu kuring nepi ka ayeuna nyebut teh, da di aa keun ku alm bapak) sok nyebut santri jeung santriwati tapi kuring mah asa pas teh disebut barudak ngaji we.

Nyandang status santri teh asa can kamaqoman, can kajiwaan oge can kaawakan Ek kamaqoman kumaha geura maenya aya santri karesepna nonton pilem layar tancep. Dimana aya santri subuh dihudangkeun ke Kang Ajengan, kabeurangan sabab peutingna tas lalajo pilem di Buniasih Landeuh! Ngaji kitab teu konsen mun apal peuting eta aya nu hajat nanggap pilem.

Meuting di kobong mangrupakeun hiji pangalaman anu hese dipopohokeun! loba kajadian lucu! Babaturan kuring harita, Kang Ade Yaya (minangka na mah kokolotna jeung Yudi), Uyeh, Juju, Rohiman, Yuyu, Suhro/Ade Waryo tapi nelahna De Obet, Nana ti Puteresik jeung nu sejenna (rada poho sawareh). Ngaliwet mah pasti pangalaman nu hese dipopohokeun. Harita mah nurut we dicaram dahar liweut ditotor teh (langsung tina kastrolna), sok datang maung cenah.

Hatur nuhun ka pun Guru Almukarom, KH. Didi Maturidi (Aa Ajengan), Kang Encid (anu elmu quro na teu katuturkeun), Aa Dede Engkuh (Tugas ngapalkeun Al Insyirah napel nepi ka ayeuna), Kang Dana, Kang Mamat, Kang Ade Yaya, Teh Ai sareng nu sanesna, Al Hikmah, tempat kuring diajar Agama Islam, Tetengger mimiti bisa ngaji, ibadah jeung ngabedakeun bener jeung salah.

Ciamis, 22 Nopember 2016 (Mieling Poe Santri)