Oleh : Sutris Danu
Wus kawentar ing saindenging donya
Yen wong jawa sugih basa
Kang ora sinandang kang sesanes bangsa
Endahing basa lungiting rasa
Araning panggodha mawarna-warna kang beda sesilih rupa
Minangka jangkeping kawruh
Jinarwi kang  tembung jawi
Jin setan peri prayangan kang gawe getering kahanan
Gendruwo thek-thekan ilu-ilu banaspati
Ketes-ketes untahing agni saking tutuking lathi
Jrangkong waru dhoyong gya sempoyongan lampahnya
Engklek-engklek balung atandhak tanpa daging tanpa kulit
Wedhon putih memplak nggejejer manther
pingiring pager
Ujung-ujung ngglimbung amung gembung memalang madyaning lurung
Wewe gombel bajang kerek kang sesliweran sangisoring wit-witan
Tansah gawe miris tumraping bapa suta
Aywa lali sung puja puji ngersaning Gusti
Kinen lestari mring panggodha sami
Nuwun
                                                                        Bajo, 13 Desember 2022
Baca konten-konten menarik Kompasiana langsung dari smartphone kamu. Follow channel WhatsApp Kompasiana sekarang di sini: https://whatsapp.com/channel/0029VaYjYaL4Spk7WflFYJ2H
