°°°
Uling di petengé ento I Guna tekén Luh Ratna sube jani madan metunangan. Kewala I Guna tusing pedas nawang metunangan. Pragat biasa dogén tusing nawang madan romantis. Mare mejalan aminggu sube merasa jejeh ia tekan hubungané ento. Ane paling takutine tekén I Guna ulian dewekné tiwas, apabuin Luh Ratna anak sugih sing kuangan ebuk. Kadirasayang yen nyak Luh Ratna siu maan ané care I Guna. Ento ngeranayang sebilang wai merasa jejeh, keto masih kliabné tusing taén luung ulian yen saihang miribang buka gumi kelawan langit.
Sebilang wai I Guna merasa sungsut kenehé jejeh hati yén Luh Ratna ngalahin ia ngalih anak muani elén. Sakewala aget masih sebilang wai ia metemu di kampusné. Sebilang suud melajah kadung ia bisa nongos di kantin ngantosin mulih. Jani timpal-timpalné sube masih nawang unduké ento. Ditu demen hatiné I Guna merasa dewekné makatang gegélan ané mula dadi rebutan. Sekat ento masih tusing ade bani timpalné I Guna maakin Luh Ratna. Di kanti buin ia nuturang pelajahan ané bakatangé di kelas. Soalné mulé merasa keweh misi hitung-hitungan ulian mule pelajahan ekonomi. Guna simalu nagih nulungin tunangané apangé pada-pada ngaénin tugas.
"Mai nae yang gaéniné je tugasé." lemuh satuané I Guna.
"Nyak beli mulih?" Luh Ratna lantas ngajakin I Guna ngaénin tugas di umahné.
"mimih tusing juari beli." saut I Guna sada kimud.
"sing kenken, bapak jak ibuk tiyang sing je galak bli." raos Luh Ratna natad limané I Guna lakar ke parkir.
Tusing ngorang apé buin, Luh Ratna saget sube ngidupang mobilné. I Guna jejeh hatiné tumbén jani melali keumah tunangané. Apabuin ia metunangan mare aminggu subé pasti ngetor hatiné tusing ngidang mekeneh diastun je ia dueg kewala yen nepuk unduk kekené uli telapakan batis nganti ubun-ubuné ngetor kebus dingin.
"mai enggalang menek bli." keto Luh Ratna ngajakin menék di mobilné. I Guna sube tusing ngidang ngomong ape. Abuku kadirasa satuané tusing sanggup lakar pesu uling di bibihé.
Di tengah mobil I Guna sube pasrah, care metegul tanpa tali. Budi melaib sinah tusing nyidang, budi lakar ngorang bibihé sube caket sajan. Ngelindeng ajaké dadua memobilan, I Guna sube tusing nawang unduk apa. Jalané ento masih tusing tawangé anak mulé biasané tusing nawang pesu. Pragat nongos di kostné paling aget pesu akilometer ulian ngabe koran keliling.
"Dije ne yang?"
"nah tuutin dogen bli." saut Luh Ratna sagét subé merérén di bangunan ané tegeh. I Guna tusing nawang apabuin mule tusing taen mecelep di tongos ané kéto-kéto.
"mai malu akejep bli setodén mulih tiyangé." Luh Ratna mukak pintu mobilné jani natad limané I Guna nuju tokoné gede ento.
Di kenehné I Guna subé jejeh tusing bani mecelep di toko care keto. Yen biasané paling aget tuah meblanja di peken. Ditu I Guna karag-kirig tusing bani mejalan ngemalunin. Di tongos eskalator ané ento tangga mejalan I Guna jejeh nekekang megisian limané Luh Ratna.
"ye... ngude jejeh keto bli, enjekin tanggané ento." Luh Ratna kedék ngilkil nepukin tunangané megaang menékin eskalator.
"kene carané, ené enjikin nongos sube." sambungné Luh Ratna sambilangé ngisiang limané I Guna apang tusing ulung.
Sube lantas neked lantai 2 Luh Ratna ngojog tongos pakian. I Guna sube meled pesan tekén pakiané ane luung-luung. Kewala ia tusing megisian pipis, ade tuah séket tali rupiah, ento anggoné makan aminggu. Dije batis Luh Ratna kemu dadi ikuh nuutin pejalané.
"ne cocok bli?" petakoné Luh Ratna.
"baju nak muani ento, yen Luh lakar nganggo sinah tusing cocok bli." saut bingung I Guna.
"ne beli nganggo." buin nyekenin raos Luh Ratna.
"ngude beli?"
"apange ade anggon beli." Luh Ratna enu milih-milihin pakian. I Guna mare sadar dewék tunangané ngajakin ia kemu lakaran meliang pakian. Megenep I Guna beliangé soroh baju, celana, jalér kanti sepatu medug-dug beliangé tekén Luh Ratna. Tusing lakar telah pipisné Luh Ratna ulian mule sugih sing, yen tuah amonto I Guna beliangé penganggo miribang tuah bekel awainé Luh Ratna.
Suud ento buin I Guna ajaké melali jani ngalih tongos ané ngadep hapé. Ditu masih I Guna beliangé hapé canggih. Layarné dadi gisiang anaké nyambatang layar sentuh (touch screen). Subé motah hidup I Guna saget megenepan beliangé tekén Luh Ratna. Yen I Guna ngidang care ento mirib dasa tiban sing pragat bane munduhang pipis lakar hidup mewah care ento. Liang hatiné I Guna sambilangé melajahin hapé canggih ané beliangé. Suud meli hapé ajaké makan di tongos ané méwah. Pragat pengargané satusan tali ané tusing taén rasayangé tekén I Guna. Mare merasa wareg mare lantas ke mulihné Luh Ratna.
Nekéd di malun umahné Luh Ratna tuun uling mobilné ngampakin gerbang. Mekesiab I Guna nolih angkul-angkulné Luh Ratna megrodot prada style Bali. Sube cara istana raja yen gambarang méwah umahné Luh Ratna. Di tengahné misi kolam renang gedé misi pelalian yeh lengkap. Umahné enu suung, I Guna masih tusing bani metakon tekén Luh Ratna. Mare masuk di umahné I Guna oriné negak di kamar tamuné. Luh Ratna enu mapeséhan pakian di kamarné. Pesu uling kamarné Luh Ratna sube meganti pakian tetep pakian baru. Tusing taén Luh Ratna mepakian dekil care ne sesai anggoné tekén I Guna.
"Ne bli tugas, gaénin malu." keto Luh Ratna sambilangé ngemak jaje kotak ané ade di mejané.
I Guna tusing mekirig yén lakar nulungin tunangané ento.
Sawetara jam enem sore mare bapané Luh Ratna teka pakian kantor. Rapi mejas buin medasi wibawa. "nyen ento Luh?" petakon bapané.
"timpal pak." saut Luh Ratna. I Guna mekenyem tusing nyambat apa. Keto masih bapané mekenyem dogén. Kanti duang jam I Guna ngaénin tugas engsap teken subé peteng. Mulih I Guna nganggon ojék, medalem Luh Ratna apangé tusing buin pesu peteng. Sube paksané lakar Luh Ratna ngatehang kukuh masih I Guna mulih ngojék. Ditu lantas mepamit tekén Luh Ratna lan bapané I Guna mulih pedidian negakin ojék.
Di jalané enu masih bakat kenehangé mirib acep-acepané luung apa mule nasibné melah. Sing suud-suud ngenehang unduké ento kanti dikosné. Jani i Guna iteh ngisiang hapé ané sube beliange. Saja canggih, nganti sing pules-pules ngisiang hapé engasap buin maniné lakaran masuk. Uli ditu jani I Guna megendu ngajak tunangané. Ngelah aplikasi milu masih ia nuutin jaman misi sosial media. Kewala tusing sanget melenan tekén Luh Ratna sube malunan ngelah sosmed. Mengenepan misi ulian ia sing kuangan apa, tusing masih ngitungang melinin pulsa.
Sube mejalan duang tiban I Guna ngajak Luh Ratna sube sanget raket tresnané. Ulian gigih I Guna ngaénang Luh Ratna nyansan sayang tekén ia. Tusing care dugas mare mulai metunangan, yen jani sube tumbuh sayangné Luh Ratna. Keto masih I Guna nyansan sayang tekén tunangané. Bedik-bedik perlu pasti sayagé. Apabuin tugas mekejang pragatangé. Sekancan gegodan ané ngalangin hubungané ento ngidang ngukuhang tresnané.
I Guna subé sayagé ngayahin Luh Ratna. Prinsip hidupné sube pasti lakar nyaga ngukuhang. Ento mawinan abedik-abedik pesu tuturné pasti lakar tuutiné teken I Guna. Ia menjanji lakar satya keto masih Luh Ratna menjanji satya lakar ngukuhang tresnané. Sekat metunangan ngajak Luh Ratna mare I Guna bisa mepayas, bisa mebersih. Abedik pakianné daki sube sanget meganti. Pipisné mekejang uli Luh Ratna tekané. Keto masih dugas I Guna ngangsehang lakar mayah SPP ulian kiriman pipis uli jumahné kondén masih neked ulian paceklik di carik. Lantas bayahiné tekén Luh Ratna kanti tunggakané ento pragat ngidang mayah. Apa je adé kuangan Luh Ratna paling simalu nulungin I Guna.
Jani sube mekeré tamat kuliah, enu tugas ahir buin besik. Ento jemetangé tekén I Guna. Keto masih nulungin tunangané kenehné apangé ngidang enggal-enggal melajah. Enem bulané ento I Guna pragat megadang kanti jam 2 ulian ngurusin tugasé ento. Kanti tusing inget istirahat ngurusin mekejang ento sawiréh tresnané sube keliwat teken Luh Ratna. Apabuin lakar ngorahang ujian sing rérén I Guna mulak-malikang tugasné ento. Ajaké dadua subé sagét bareng-bareng ujian keto masih sube pade lulus.
"yang sube lulus jani irage." lega bayuné Luh Ratna ngelutin I Guna masih milu mekenyem lulus kadi pengatiné bareng-bareng.
"selamat Luh, iraga sube lulus jani." I Guna timpalin.
Disubané aminggu sube lulus, semuné Luh Ratna tusing kadi ipidan. Yen itungang uli mare mulai kuliah sube dadi petang tiban metunangan ngajak I Guna. Yen ape ngeranayang Luh Ratna sube nutupin dewéké tekén I Guna. Kadi kena tatit mepangenan I Guna nepukin unduk buka keketo. Kebilbil tusing nyidang nyambatang apabuin. Di kenehné metakon ape saget ngeranayang unduké ento. Di telpon di somsed mekejang pengatiné apangé I Guna tusing ngidang lakar matemi ngajak Luh Ratna. Sekancan usahané subé metutup sinah tusing nyidang lakaran matemu apabuin metakob kepelihané.
Ngewai I Guna ngenehang unduké ané ngeranayang tunangané berubah. Semu bagiané ipidan jani sube dadi semu sebet. Sakit kenéh sakit hatiné ngemasin nagih megatin urip. Ape ne rasayangé sube kadi tanpa guna. Pejalané sube kadi care ngasehang. Yen timpalné mekejang pade demen ngungah foto di sosmed ngorangang lulus. Melenan teken I Guna tusing bani mukak sosmed. Terus pedidi, hidupné sube care kuangan kerasayang. Di bengongné munyi hapéné "ting", ngelaut bacané misi tulisan "Ratna Sayang" isin smsné tuah ngajakin ketemu. Lega hatin I Guna dikenehné miribang bagia lakar buin nepukin tunangné ento.
Nyelegang ia mayasin dewekné, tusing care ipidan dugasé enu kimud kumel. Tusing mikir baju, ne penting ia ketemu. Kewala, jani sube melenan ia mebaju rapi meparfum. Ngenahang gantengné apangé demen keneh tunangané ento ané jani ngewatesin. Lantas ketemu pedaduanan, ditu lantas mekenyem I Guna. Nanging tusing Luh Ratna, semuné sube mesebeng sebet.
"Bli, suud nyalanin tresna. Med tiyang bli." keto munyin Luh Ratna tekén I Guna.
"med engken luh?"
"pokokné tiyang med bli, baang tiyang nyalanin hidup pedidi keto masih beli." sambung Luh Ratna tusing ilang-ilang semu sebetné. Ngencolang ngelutin I Guna ngorahang suud.
"yen ade pelih beli ngidih pelih, de je kanti suud." pengidih I Guna tusing karesepang masih tekén Luh Ratna.
Ngetel yeh peninggalané I Guna sing nyidang bané nanggehang nepukin unduk buka kekéto. Tusing nyambatang ape buin Luh Ratna ngelesin gelutan laut melaib ke mobil mecuet melaib ninggalin I Guna negak pedidian.
I Guna mekeneh lakar ngubungin nomorné Luh Ratna nanging tuah mesaut "nomor yang anda hubungi tidak aktif" ne merarti sube meganti. Jani mekejang tusing nyidang lakar ngubungin. Sekat unduké ento dadi terahir petemuanné ento ngaénang I Guna sebet. I Guna tusing ngidang mekeneh apa ulian unduk jelek ne tepukiné. Ia masih sadar lakar nyalanin wisuda buin abulan jani. Di hatiné sebet nanging dikenehné liang ulian lakar makatang ané madan sarjana dadi idamané ento.
Buin abulané I Guna lakar wisuda, keto masih Luh Ratna masih wisuda. Mémé bapané I Guna mekejang pada teka di acarané ento. Ditu lantas I Guna matemu ngajak Luh Ratna ngajak keluargané. Luh Ratna tusing ngorahang ape kadi rasa metolihan tusing ngajak I Guna. Bapané Luh Ratna dogen ngenyemin I Guna ulian sesai tepukiné pidan dugas di umahné. Di subané suud acarané ditu sube mekesiab kenehné I Guna. Tusing ade hujan tusing masih ade angin saget mekite meglebug I Guna. Tepukiné ditu lantas Luh Ratna mefoto mesra megelut ngajak anak muani elenan. Sekenangé metolihan sagét sebet kenehné I Guna muaniné ento tuah timpalné sekelas. I Yuda, mula bagus penampilan joh kalah yen bandingang ngajak I Guna. Dingeh-dingehé masih uling timpalné mule I Yuda ngajak Luh Ratna sube jadian mare abulan.
Mare mekeneh I Guna tuah unduké né ngeranayang Luh Ratna mesemu len. Sebet mule saja sebet I Guna nepukin unduké ento. Disubané bengong meselselan tolihé reramané makedadua ngajak adi-adiné ajake dadua ane mare masuk sekolah dasar. Kenyem manis mémé bapané ngaenang ngerecek yeh peninggalan I Guna ulung. Nadak ilang sebet kenehé ulian ninggalin kapitresnan reramané teken ia. Inget masih dugasé malu petang tiban ia megaang sebet dicariké ulian ento ia ngidang ngelanjutang masuk kanti tamat dadi sarjana. Uling ditu mare I Guna merasa suud meselselan, dikenehné miribang unduké ene tuah mekarma hidup. Ia sadar kapitresnan mémé bapané tusing ngidang ngewatesin apabuin ngewalesin ulian tresnané keliwat. (telas)
