Serial Carito Minang (1)

Serial Carito Ntah Apo Apo :
Episode 1. Si Buyuang Bansek
Tukang Carito : Suhatman Pisang

Buyuang banamo Rajo Kayo, Abak maagih namo ko baharok anak nyo manjadi urang kayo, baa dek baitu, karano sajak badan abak nyo di agiah angok, hiduiknya salalu saja susah,bansaik. Si Abak nan banamo Rajo Mangkuto, hanyo pagawai randahan, pagawai golongan satu, masuak karajo nyo tolong dek pak Sutan,hanyo babekal ijazah Sekolah Tekhnik ( ST ) setara jo SMP maso kini, sakolah tu talatak di tapi banda Bakali, di Simpang Haru.
Buyuang Rajo Kayo ko anak partamo, situo jolong badukuang. Hasil pernikahan Rajo Mangkuto jo Upiak Banun, urang mudiak Pauh limo. Satalah hampia duo tahun manikah. Upiak Banun ko urang susah pulo, anak ka tigo dari anam basudaro, Abak nyo Si Manenggang kusia bendi nan manambang dari Pauh limo ka Pasa Raya di kampuang Jao. Pancarian nyo kadang dapek acok pulo indak.
Rajo Mangkuto jo Upiak Banun tingga baincik incik di rumah kayu reot jo keluarga bini nyo nan lain nan alah bakaluarga pulo, untuang se lai adoh kamar, walaupun ketek tapi lai basakek. Kok di sabuik bantuak rumah nyo antahlah, di pijak lantai ujuang tajongkek lantai di sinan, lantai lapuak pulo, kalau salah pijak bisa takarubuak kaki ka kandang di bawah rumah tu.
Rajo Kayo lahia nyo jawek dek dukun baranak, Etek Niar namo nyo, tapanca tangah malam,lah masuak hari senin dini hari di tahun tujuh puluah satu, bulan Mei tanggal duo.
Baitu tangih bayi laki laki tu tadanga dek Rajo Mangkuto, sabana sanang hati nyo. Nyo datangi bini nyo Upiak Banun na alah lamah satalah maajan anak tu ka dunia ko.
Satalah tali pusek nyo di putuih dek etek Niar, bayi tu di mandian lalu  di baduang jo kain panjang. Di agiah pulo dek tek Niar badak saketek. Sudah tu nyo sarahan elok elok ka Rajo Mangkuto. Jo sanang hati, nyo pangku bayi dalam baduang tu. " Adzan kan lah ! " Kato tek Niar. Rajo Mangkuto langsuang malafaskan suaro Adzan ka talingo bayi nyo. Sudah tu inyo langsuang babisiak ka Upiak Banun. " Ambo agiah namo anak awak ko Rajo Kayo yo sayang "
Upiak Banun maangguk tando satuju. Mako banamo lah Anak laki laki ko Rajo Kayo

( Carito Ko Banjuik Bisuak Yo Sanak ! )