Sumur Mas

Sumur Mas

Ing dukuh Grenjeng, Dayu, Gondangrejo, Karanganyar, papan panggonan kang adoh saka gunung, nanging ana salah sawijining keajaiban kang dianggep unik dening masyarakat ing papan iku, yaiku sumber banyu kang bening lan resik kang diwastani sumur mas. Sumur iku mapan ing sawijining pinggir desa mapan ing kalen cedhak sawah lan papane ana ing kalen cilik. Sumur iku ukurane cilik, ora ana 50 cm pesagi, nanging saka sumber banyu sumur kasebut, bisa nguripi masyarakat ing sakiwa tengene.

Ora ana kang ngreteni mula asale sumur mas kasebut. Kang baku sumur iku ing biyene sinebut sumur Grenjeng ing masyarakat diyakini tetilaran jaman purba. Pancen ing papan sumur kasebut cedhak karo museum kang ditemokake fosil-fosil. Nanging nembe dimanfaatke dening masyarakat nembe puluhan warsa kepungkur. Raose banyu kasebut pancen eca, tur ora ngandhut kerak kapur babar blas.

Kok bisa nguripi masyarakat sakiwa tengene? Iya, amarga saka sumber banyu kasebut masyarakat bisa antuk pagaweyan yaiku adol-tinuku banyu. Banyu saka sumber sumur mas kasebut digunakake dening masyarakat ing papan sekitare dijupuk dening warga (ngangsu) saka sumur mas banjur dikirim nganti teka ngendi-endi.

Kok saged teka ngendi-endi? Amarga kuwalitas banyu kasebut bening banget lan uga diyakini dening masyarakat bisa nambani saperangan penyakit. Nah iku kang diarani  unik, papane dudu ing pegunungan, dudu ing tlaga, nanging ana tuk / sumber banyu kang ngetuk (metu banyu) ora ana kendhate lan ora entek-entek sanajan saben dina diangsu pirang-pirang atus jeligen kang dikirim ing pirang-pirang dukuh, desa, kecamatan, malah nganti tumeka ing kabupaten liyane.

Pancen akeh banget guna lan mupangate berkahing Gusti Allah ing laladan Karanganyar kang mapan ing Gondangrejo, kang ana ing dukuh Grenjeng, desa Dayu. Sumur cilik nanging akeh ditresnani dening masyarakat yaiku banyu sumur mas kasebut. Kang disenengi dening masyarakat sakiwa tengene sumur mas iki saliyane banyu kasebut bisa kanggo tamba saperangan jinis penyakit, uga bisa dadi pagaweyan kanggo masyarakat.

Saliyane banyu sumur kasebut bisa kanggo tamba, uga bisa dijupuk kanggo sumber asil ekonomine masyarakat kang gelem njupuk banyu kasebut kanggo kapreluwan pagaweya, yaiku ngangsu banyu saka sumur mas banjur dikirim /  didol ing dhaerah liya kang mbutuhake, luwih-luwih larang banyu.

Masyarakat kang njupuk banyu saka sumur kasebut biyen-biyene gratis, nanging amargi warga kang njupuk banyu iku didol tur payune ora sethithik, banjur wiwit pirang taun kepungkur ditarik dhana sethithik kanggo kas desa. Kudu disyukuri berkahing Gusti kang ora kepetung akehe, banyu resik, diyakini masyarakat bisa kanggo tamba, tur bisa ngasilake saka unsur ekonomi kanggo masyarakat sekitare.

Warga masyarakat uga ngendika: menika kan papan banyu sumur mapan ana ing ngisor sawah, sawah kan banyune butheg, reged, nanging sumur kasebut uga ora kena kontaminasi saka banyu sawah kang butheg reged kasebut. Dadi banyu sumur mas tetep bening, resik, lan seger. Malah ing patang taun kepungkur ing sak dhuwure sumur kasebut digawe  kolam renang kanggo papan bluron/keceh kanggo sapa wae kang digawe dening swadaya masarakat. Sumur menika disukani nami sumur mas amarga banyune bening kaya mas.