Kampung Adat Pulo Situ Cangkuang Leles-Garut.
DITENGAH situ cangkuang aya pulau anu terkenal ku dua perkara: nukahiji Candi Cangkuang, nyaeta salah sahiji candi nu aya dikabupaten Garut, candi etateh bukti paninggalan budaya Hindu-Budha jaman Tarumanagara. Jeung anu kadua nyaeta kampung adat Pulo anu langkung terkenal ku panglandi Kampung Pulo. Ieu kampungteh salah sahiji kampung adat nuaya di kabupaten Garut. Di kampung adat eta ngan aya gènèp suhunan katambah hiji tajug (masjid). Numana sakabeh imah nyinghareup ka tajug.
Pangeusi nu aya dikampung adat Pulo ayeuna kurang leuwih 23 jelema, salah sahijina kokolot kampung. Anu jadi perhatian tulisan kuring ayeuna nyaeta system katurunan jeung kapamilikan di eta kampung nu aya ditengah situ cangkuang. Jadi menarik keur diguarkeun kumargi dihiji sisi kampung etateh ngageugeuh pageuh kana budaya sunda, tapi disisi lain geus pacampur jeung budaya Islam.
Lamun nyukcruk kana tradisi Islam, biasana kapamilikan jeung katurunan leuwih condong ka lalaki tina harti Patrilineal. Contona tina masalah milih pamimpin atawa tina waris ku penganut mainstream Islam leuwih ngutamakeun ka lalaki. Ieu wajar lantran tina teks ajarana (Al-Quran) lamun diartikeun langsung teges yen lalaki kudu jadi pamimpin pikeun awewe.
Lamun ninggali kana tradisi Sunda, system kakaluargaana nyaeta Matrilineal: leuwih condong ka awewe. Lamun tina agama bisa dicukcrukna ka teks suci, saperti mun di Islam bisa ninggali kana Al-Quran jeung Hadist. Tapi lamun tina budaya anu awalna leupas ti agama, eta bisa ditingali tina folklore, nyaeta carita-carita rahayat. Carita rahayat orang sunda leuwih ngawangun kana kaindungan ieu bisa di tinggali tina mitos orang sunda atawa carita rahayatna nyaeta anu ngautamakeun dewi sri, trus lamun di udag ka luhurna nyaeta ka sunan ambu. Duanana eta ngawujud awewe atawa istri (dalam bahasa sunda istri berarti perempuan). Mitos oge mangrupi bagian tina carita, kumargi upami teu aya carita mitos moal aya. lamun mitos tina hiji budaya makin alus, eta cirining budayana geus maju.
Balik deui ka Kampung Pulo, di kampung pulo sok sawios atos islam tapi sabagian cara-cara atawa adat tina waris masih ngagunakeun sistim sunda, ieu bisa di tinggali tina sistim warisna. Dikampung adat eta anu meunang waris sacara gamblang nyaeta awewe. Sapertos: lamun indungna maot, tanah jeung sajabana jadi hak milik anak awewe. Anak lalaki teu kabagean nanaon, lantaran bisa neangan kahuripan di luar kampung adat eta. Upami lalaki nikah ka luar warga kampung adat pulo, lalaki eta kudu nuturkeun pamajikanana.
Tinu masalah diluhur urang bisa ninggali sajauh mana akulturasi dikampung adat pulo. Anu kahirupan sapopoena taat ngajalankeun ibadah, katambah aya hiji makam atawa kuburan anu cenah nyebarkeun ajaran islam di eta kampung, nyaeta Hasan Arip, anu ku warga kampung pulo dilandi alm. Mama hasan. tapi ditinggal di sisi lain, warga eta kampung masih nyeukeul pageuh ajaran budayana. Kumargi budaya mangrupi salah sawios alat anu bisa ngarakétkeun naon anu diamanatkeun ku karuhun jeung sangkan hirup langkung hade.
Nujadi masalah kiwari nyaeta kumaha carana sangkan akulturasi sunda-islam di kampung adat pulo masih karawat. Saenggeus situ cangkuang ku pamarenatah kabupaten garus dijieun salah sahiji obyek wisata, aya sababaraha hiji perubahan di warga kampung adat pulo. Wargana nu biasa tatanen jeung ngala lauk di sekitar wilayah situ cangkuang, ayeuna sok sabari dagang di daerah situ eta keneh. Efek tinu eta anu katinggali jelas nyaeta tina cara ngomong barudak leutik jeung babaya kampung pulo kiwari. Geus mimitian leungit panta-panta basa, numana basa keur ka kolot, sapantar jeung sahandapeun, bahasana geus sarua bae ayeunamah. Padahal anu siga spele eta gede pisan manfaat keur ngajaga etika hirup sapopoe, leuwih jauhna deui adat istiadat jeung budayana.
Lamun diudag ku filsafat bahasa, saleresna tina bahasateh ngandung struktur logika jeung budayana nyalira. Struktur eta ek sadar atawa teu sadar mangrupi bagian tina salah sahiji budaya, jeung sakabeh rahayatna makè kana hal eta. Saleresna moal aya hiji budaya oge anu teu berakulturasi jeung budaya lain, tapi upami kudu tepi kaleungit bagian budaya anu alusna, berarti eta budaya geus lain akulturasi deui, tapi hegemoni budaya. Bahasa anu adiluhung ayeunamah geus teu aya hartosna deui, kumargi emang tos teu jelas batasan-batasan etis tina eta bahasana. Meureun eta anu kajadian di kampung adat pulo.
Lamun ayeuna geus katenjo siga kitu rek kumaha pikarepueun kampung adat pulo kahareupna. Lamun sanyatana budaya kampung pulo masih gede manfaatna, naha jeung kudu ditinggalkeun atawa dileungitkeun, sok sawios eta nembe tina bahasa atawa obrolan sapopoe warga kampung. Meureun eta oge masalah orang sunda kiwari, salain faktor eksternal siga tontonan jeung pergaulan, faktor tijerona nyaeta geus kurang ngarasa miboga kana kasundaana, buktina mirif jeung kampung adat pulo, sabagian orang sunda geus embung maké bahasa sunda atawa bahasa loma tina kahirupan sapopoena..
02.02.11
