Kepayon

Joko ngusap kringet sing dleweran ngliwati bathuke. Bocah kuwi ora katon kesel babar blas, kamangka wis rong jam olehe ngethekur. Tangan tengene nduliti lem banjur dioleske marang kertas tipis. Tangan kiwane nggujengi ragangan layangan. Sakwise diolesi lem banjur kertas turahane dilempit mlebu. Pinggir kertas diluruske miturut garis potlot. Layangan gaweyane Joko pancen rapi tur alus.

Sedina iki mau, Joko wis ngasilake 20 layangan kertas. Layangan-layangan iku digambari maneka warna. Uga dipasangi buntut sing dawane ana sing nganti rong meter barang.
"Joko, wis leren sik, Le. Gik adus terus maem. Kat esuk kok durung leren to kowe, " Ibu pangandikan banjur lenggah neng dhingklik mburine Joko.
"Nggih, Bu. Niki kirang sithik. Mengke bar niki gik kula ajeng adus, " jawabe Joko karo tangane nglumpukake cuwilan kertas sing ora kanggo banjur dibuwang neng ikrak.

Sakwise reresik, Joko banjur nyaut andhuk neng pemehan. Banjur njranthal menyang kamar mandi. Ora let suwe keprungu swara byar byur.
Bubar adus Joko katon ngguantheng nganggo peci lan sarung. Nunggu adzan maghrib sinambi ngaji, maca Quran kaya padhatan. Bocah siji iki pancen sregep lan mbangun turut marang wong tuwa.

Pas lagi ngaji, ujug-ujug ana swara notifikasi pesen WA. Tibake Raga sing kirim pesen WA.
"Joko, aku sesuk tuku layangan 20. Arep tak dumke bocah-bocah cilik tanggaku. Amargo aku wis bacut janji marang bocah- bocah. Bisa to? " Mengkono tulise Raga.

"Alhamdulillah. Insyaallah bisa, Ga. Sesuk jam 10 awan paranono, " piwalese Joko. Koyo ngapa bungahe atine Joko. Dheweke wis mbayangne bakal bisoa mbayar seragam sekolah. Joko mesam mesem dhewe.