Ature: Kresno Aji – Rabu / Buda Pahing 4 November 2015
Manungsa srigala utawa kang uga karan asu ajag siluman utawa lycanthropoes wis kasil narik kawigatene pamiarsa luwih saka 70 taun. Nanging, dedongengan lan sejarahe kewan sing bisa ganti wujud iki jebul luwih tuwa maneh
Manungsa srigala beda banget rupane saka sawenehing jinis srigala sing ana. Manut “MonsterQuest” saka History Channel, manungsa srigala dhuwure nganti 1,8 - 2,5 meter. Kanthi untu sing cringih-cringih lan perangan dhuwur awak sing luwih gedhe tinimbang ngisore. Awake kaya dene manungsa lumrah, kanthi wulu ing sirah lan rai kaya dene srigala utawa beruwang.
Saploke diputere film "The Wolf Man" ing taun 1941, manungsa srigala wis dadi bageyan sing kuwat saka budaya populer Amerika. Saiki, manungsa srigala bisa ditemokake ing sawenehe filem bioskop utawa ing acara tivi. Kaya ta, "The Wolf Man", "An American Werewolf in London" lan ing acara-acara tivi liyane.
Nanging sadurunge mlebu ing budaya populer Amerika, dedongengan mahanani manungsa srigala sabenere kerep muncul ing sawenehe budaya ing donya.
Dedongengan kuna ngenani manungsa srigala
Sawijining perkara lycanthrophy sing paling misuwur ing sejarah Eropa yaiku dedongengane Monster Gevaunden kang nate neror Perancis ing taun 1760-an, kanthi niwasake 80 wong diwasa lan bocah-bocah. Sejarawan saiki percaya menawa prastawa iku minangka sawijining prastawa rajapati susul-sumusul (berantai) saka sawenehing wong utawa klompok kang gawe rajapati. Sejarawan liyane maneh mratelakake menawa prasawa rajapati kuwi dilakokake sawenehing gerombolan asu ajag sing keluwen Nanging sejatine serangan saka sawenehing grombolan asu ajag kuwi arang dumadi, miturut "Living with Wolves" sawijining organisasi sosial kang ajak warga ora musuhi asu ajag, mretelakake menawa mung ana kaping pindho serangan ing Amerika Lor sajrone sak abad.
Ing jaman biyen, manungsa srigala ora dianggep kaya dene dedongengan lan malah diakoni dening Geraja Katolik lan rakyat Eropa ing pertengahan. Sadawane Eropa kulon lan wetan, pamariksan marang manungsa srigala disejajarake kaya dene pengadilan marang tukang sihir ing Amerika. Sasuwene abad 16 dinuga akeh manungsa srigala kang disiksa lan diukum pati dening pamarentah.
Perkara papriksan pengadilan manungsa srigala sing nate misuwur, miturut Historic Mysteries, nate ana kedadeyan nalikane salah sawijining pawongan kang aran Peter Stubbe, mapan ana Jerman. Ing taun 1588, sawenehing warga dinuga meruhi Stubbe nalika saka asu ajag weujud manungsa maneh. Sawise dianakake papriksan kanthi dilandhesi panyiksan, dheweke ngakoni sakehing tumindake kalebu rajapati lan kanibal (mangan kurbane). Pawongan umur 40 taun kasebut banjur diukum mati, kalebu anak lan bojone.
