Saban hari makin panas bin gerah aje, kagak ade ademnye. Kenape pada kagak bisa ngerem yak ? Trus apa sih hasilnye kalo udeh dilakonin ? Saleh ape tuh orang ama kite ? Emang muke kite udeh bonyok ? Kalo emang sebagai kontrol sosial ato nyang laennye, emang kudu disampein sambil nyap - nyap ?
Bahase pan kagak beli ? Ape kagak bisa pade santun ? Ane mah orang kecil, kagak mao ngomong nyang muluk - muluk. Tapi mao nggak mao bakal keseret. Ye,..keseret, gimane nggak keseret, tarikan ojek makin sepi, harge beras naek, tagihan/pulsa listrik makin sering belinnye [ padahal listik cuma 450w, kagak ade kulkas dll ].
Terus hasilnye ape ? Nerapin pasal 28 dari UUD doang ? berobah nggak ? Pan udeh pade pinter, perobahan ntu butuh proses kagak bisa cepet, nyadar kagak waktu dulu koar - koar ?
Jangan dong, keyakinan masa jadi barang dagangan. Bikin adem nape ? Mulain aje dari lingkungan sendiri, udeh beres belom ? Percume ngomong make sewot, ngritik ini, ngritik itu, hasilnye belum bisa kilat bang. Nyang ade nyakitin orang laen aje.
Awalnye ngomong berbeda itu indah, ho..oh bener tapi konsisten kagak ? tetep aje ujung - ujungnye pade gaplok - gaplokan.
Maap ye gan, sebagai tuan rumeh, baek ye sih make sarat ktp aje. Biar kalo ade ape - ape, gampang nyarinye kalo die bikin ulah. Nyang kagak bisa ngasih jangan suruh masuk, apelagi disuguhin kupi. Ini juga saran doang gan.
Salam pis buat Om Ajinatha, Om Haji Ahmad, Om Tony, Om RD, Tante Rinny, Om Slamet ame buat Om juga Tante - tante laennye.