BERSAMA Nunung, Mpok Minah lagi bebetek di dapur untuk persiapan buka puasa. Bang Jali ngedéprok di jok ruang tamu dengan Quran di tangannya. Mpok Nining tiba-tiba manggil Mpok Minah. Bang Jali yang lagi baca Quran mengecilkan suaranya.
“Ada apa, Ning?” Mpok Minah nyamperin tetangganya yang dateng paké celana pendek doang bikin pahanya yang buntek dan mengelambir jadi ngablak ke mana-mana.
“Bagi koran bekasnya dong, Min,” katanya. Masih bediri di depan pintu.
“Bakal apaan, Ning?”
“’Ntu, gua mau bikin kué satu.”
Mpok Minah buru-buru ngambilin koran-koran bekas yang diminta. “Jangan banyak-banyak, Min!” Mpok Minah mendengar Mpok Nining beteréak dari luar. “Barang dua-tiga biji aja.”
Mpok Minah keluar dengan beberapa lembar koran yang diminta Mpok Nining.
“Lebaran pan masih lama, Ning, émang lu udah mau bikin kué?” tanya Mpok Minah iseng.
“Ya, persiapan pan kagak ada salahnya, Min. Biar ‘nti kagak répot-répot amat. Lu udah bikin kué apa aja, Min?”
Mpok Minah meruapkan senum. “Belonlah. Lebaran pan masih cukup lama.”
“Lebaran tinggal beberapa ari lagi, Min. Gua sih udah bikin kue biji ketapang, kembang goyang. Rengginang juga tinggal ngegoréng doang. Dua ari lagi gua juga mau ke pasar, mau beli biluluk. Sekalian beli kacang tanah. Gua pan kagak kepéngén pas lebaran méja gua kosong kagak ada kué-kuénya...”
Mpok Minah manggut-manggut.
“Ya udah déh, gua pulang dulu. Terima kasih yé,” kata Mpok Nining kemudian balik bakul ninggalin Mpok Minah yang masih agak melongo.
Beberapa saat kemudian, Mpok Minah nyamperin lakinya di ruang tamu. Bang Jali menguap nahan ngantuk. Quran yang abis dibaca tergelétak di atas rak buku.
“Mau ngapain ‘ntu si Nining, Minah?” Bang Jali nanya.
“Kagak tau. Katanya sih minta koran bakal bikin kué satu bakal lebaran...”
Bang Jali mésem.
“Puasa kagak, sembahyang kagak, giliran mau lebaran malah dia nyang paling répot,” kata Mpok Minah.
“Nggak usah lu pikirin, Minah,” Bang Jali ngusap-ngusap kakinya yang rada kesemutan.
“Maksud abang?”
“Nyang kaya’ si Nining ‘ntu pan bejibun, Minah. Biar kata kagak puasa, tapi pas ngadepin lebaran malah nyang paling répot. Padahal pan lebaran ‘ntu buat orag nyang puasa doangan...”
“Ayé empet, Bang!”
“Udah, mendingan sono ke dapur, bantuan si Nunung. Bikinin gua es buah ya. Bentar lagi kan beduk menggerib.”
Mpok Minah balik ke dapur sembari narik napas. (100812)
Baca konten-konten menarik Kompasiana langsung dari smartphone kamu. Follow channel WhatsApp Kompasiana sekarang di sini: https://whatsapp.com/channel/0029VaYjYaL4Spk7WflFYJ2H
