SEPANJANG perjalanan ke Garut, Nunung ngegeléndot manja di bahu Dodit. Kagak mau lepas-lepas kayak besi berani. Sesekali matanya merem bahna ngantuk. Kebahagiaan ngebuncah dalam dadanya. Belon pernah Nunung ngerasa sebahagia saat ini.
Demi kebahagiaan juga Nunung kuat-kuatin ati ninggalin Babé sama Nyaknyé. Nunung réla berjauhan dari kedua orangtua yang udah ngempanin dan ngegedéin dia. Baru kali ini Nunung bakal berada jauh dari kedua orangtuanya. Entah buat berapa lama?
Nunung sadar idupnya bakal berobah banget. Dia kagak bakalan lagi ngedenger omélan Nyaknya. Juga babénya yang demen ngegodain dia. Juga suara Nyak dan Babénya kalau lagi berantem. Nunung tau, saban berantem, Babé dan Nyaknyé kagak pernah baper alias bawa perasaan. Abis berantem biasanya Nyaknya justru bangun lebih pagi dan buru-buru mandi basah. Inget itu, Nunung suka mésem-mésem kendiri.
“Masih jauh ni, Bang?” Nunung kebangun bahna terjadi guncangan.
“Lumayan,” jawab Dodit.
“Jauh juga kagak knapé-napé, Bang. Nung demen begini terus...” kata Nunung kolokan.
Dodit ngejawil idung bangir si Nunung. Nunung nyubit pinggang Dodit.
“Jadi rumah kontrakan kita sempit, Bang?” tanya Nunung lagi.
“Liat aja nanti.”
“Sempit juga kagak knapé-napé, Bang...”
“Kok?”
