LAMA-lama Mpok Minah empet juga ngeliat Bang Jali. Saban ada waktu kosong, pasti langsung asyik dengan ponsel android barunya. Kadang-kadang malah asyik senyum-senyum. Sebelumnya, kalau ada waktu kosong, Bang Jali baca-baca buku agama. Sekarang kayak jadi lupadaratan.
“Babé lu Nyak liat udah mulain berobah, Nung,” kata Mpok Minah, suatu siang sembari ngiris-ngiris bawang di dapur.
Nunung yang lagi misangin kangkung, néngok. “Berobah kenapa, Nyak?”
“Ntu, saban Nyak liat, pasti lagi asyik sama teleponnya. Kotan-kotan Nyak liat cengar-cengir kayak orang kagak waras.”
Nunung mésem.
“Ntu salah Pak Subhi juga...”
“Maksudnya, Nyak?”
“Ngapain dia paké ngasih babé lu telepon kayak gituan. Apa tuh namanya? Andro...andro...”
“Android, Nyak...”
“Iye, ntu maksud Nyak.”
“Kok Pak Subhi yang disalahin, Nyak?”
