"Arep ngapa iki?" pitakonku marang kuyang sing kawit mau mung mubeng-mubeng ora cetha.
"Nggak tau! Tadi aku udah makan banyak nyamuk sih."
Tasya mesakake tenan. Demit sing ujude kaya kuyang, dheweke saka Kalimantan, diingu wong Jakarta banjur diguwang ning pesisir kene. Ora bisa basa Jawa, omongane basa Indonesia. Mesakake ora kopen kaya mbiyen sing adate mangan getih lan panganan enak. Saiki gaweane nguyaki lemut supaya bisa rasan getih, yen kepepet banjur trima ngombe degan.
"Kae ana yuyu, beyes e okeh!" genderuwo nudingi yuyu sing mlaku ning pasir. Genderuwo ora mung nggodani kunti, sundel bolong lan wewe gombel. Ananing uga seneng nggodani kuyang senajan mung kanggo guyon. Jarene ora bisa serius yen karo kuyang amarga mung endhas thok, ora ana awake.
"Kepiting nggak ada darahnya kali!" Tasya nesu. Mabur mulih ning omahe sing ana pucuk wit kambil. Omahe cerak omahku, mung keletan wit kambil siji.
"Om, mau kemana?" pitakone Tasya weruh aku glinding-glinding arep lunga. Genderuwo ngguyu nyekakak. Dheweke sajake ngerti yen aku arep menyang angkringan cerak pesisir. Rekane arep nyolong balung pitik kaya adate. Aku sengit yen genderuwo banjur titip kareben sisan dicolongke udut utawa kopi ireng.
"Aku melu!" bengoke Preti, wewe gombel sing wis dadi mantane Genderuwo Ireng. Senajan menengan ananging wewe gombel iku gatel. Seneng namatake menungsa-menungsa sing bagus rupane. Dheweke blaka yen getun wis tau pacaran karo genderuwo sing rupane elek lan medeni.
"Halah kaya kowe kuwi ayu-ayune, Pret! Yen kowe njedul malah mengko padha wedi," ece Genderuwo Pink utawa Jambon sing demen dolanan bluluk. Ras genderuwo Pink lan genderuwo Putih pancen rupane bagus-bagus, seje karo genderuwo Ireng lan Klawu sing rupane ala sisan ambune banger.
"Mengko aku nyamar dadi kenya ayu." Preti ngguyu cekikikan. Dheweke yen kadung nyamar pancen ayune ora mekakat. Mbiyen genderuwo Ireng kesengsem weruh Preti nalika nyamar, nanging mbasan ngerti wujud asline banjur njaluk pedhot tresna.
"Ya wis malahane kowe melu." Aku seneng yen ana sing ngancani aja maneh sing nduwe sikil lan tangan amarga bisa nyangking aku. Bisa uga aku nyokot banjur ndelik ana geger utawa boyok. Ra kangelan glinding utawa mabur.
