Ieu carita pernah kadenge ku kuring saliwat tina salah sahiji radio di Bandung. Mun teu salah dina acara nu dingaranan Cangehgar (carita ngeunah jeung segar). Ditulis deui ku kuring teh alatan boga pangalaman meh persis. Redaksina mah sarua, ngan jejer caritana nu rada beda.
Tahun 2000-an kuring saparakanca ngalaksanakeun Kuliah Kerja Nyata alias KKN di salah sahiji lembur di Subang. Eta lembur teh pernahna dilingkung ku sawah nu iplik-aplak satungtung deuleu. Pikeun nyorang eta lembur kudu naek ojeg ti jalan raya Pagaden-Pamanukan, kalayan jalan nu diliwatan teh harita mah masih taneuh beureum. Sigana mun harita usum hujan, eta jalan bakal ledok teu jauh beda ti sawah di sagigireunna. Sapanjang jalan mapay-mapay saluran irigasi nu cenah ti Citarum asalna, ngamuara di daerah Eretan Indramayu. Aya eta oge jalan nu rada hade teu taneuh teuing, ngan jauhna kacida. Keur kuring matak keueung da eta kudu mapay-mapay kebon tiwu nu harieum. Sok sieun aya rampog we di tengah jalan. Tapi teu kitu sigana keur urang lembur dinya mah. Geus biasa deui.
Hiji waktu, sabagian rombongan KKN teh silaturahmi ke SD nu ngan hiji-hijina di eta lembur. Keur guru-guru didinya mah atoh pisan kadatangan mahasiswa KKN teh. Maranehna bisa nyantey, urusan barudak dibikeun heula samentara ka nu KKN.
Kabeneran kuring dipapancenan ngajar Kasenian. Teuing dikelas tilu teuing kelas opat harita ngajar teh, poho deui. Ngan dumasar kana tugas ti guru Kasenian na harita kuring kudu ngajarkeun salah sahiji lagu Sunda. Bebas cenah, asal ulah lagu pop sunda. Nya harita kuring ngajarkeun lagu anu diantara lirikna kieu: '"teu honcewang...sumoreang...tekadan pahlawan bangsa..." jeung saterusna. Poho deui judul laguna mah.
Harita kuring karek nyadar, najan kasebut masih urang Sunda tetela didinya mah bahasana teh campur jeung bahasa Jawa. Dina bahasa Sunda na oge kasar jeung teugeug teu lemes jiga bahasa Sunda umumna. Atuh dina diajar lagu Sunda teh matak hese ngajarkeunana. Geus sababaraha balikan dicontoan barudak teh teu bisa-bisa. Nepika waktu manjing istirahat can aya budak nu bisa ngawihkeun eta lagu kalayan hade. Antukna aral nu aya.
Harita kuring ngomong kieu: "Barudaaak......naaa ari maneh...lagu nu kieu-kieu wae hese pisan bisana. Saha ieu teh nu bodo, bapak atawa maneh?'
Teu euleum-euleum barudak ngajawabna teh: " Maaaaaaaneeeeeeeh....!"
Ambek nu geus nyedek ampir mudal, ngan kaburu bel istirahat. Barudak langsung birat kaluar. Tinggal kuring nu ahirna jadi nyakakak sorangan. Aya-aya we kalakuan barudak.
