Pangaku "Aku" Kajulen, Lako "Aku" Nene Koasa

“Sai ke apa manusia nan sabenar,” akhir Mbonong seberaning diri bakatoan. Pakatoan ta nosoda boe ya garu otak ke akal mBonong, justru leng peno tau ade no roa sarewa pakatoan ta, dong ke ya sesempat diri tawa ya piker jawaban kaleng pakatoan nan, ka gampeno tau ya sepan pakatoan ta enam balu, nonda tuju. “Bahkan gampeno tau rama peno, mulaimo sepan ku gila”, pengkeling mbonong. Sambil dalap benar ya tulang mata tau selaki ade beru ka ya kenal, ada tokal pang deng nya. Diri selaki ade keriting belo bulu jangka toak ta, senyum baesi ingo mBonong. Kesai-sai batemung diri selaki ta, selalu sakenal diri sebage tau pecinta petang, ke hanya bau tu katemung amen petang baesi. “Nonda singin ku bentan, maka na kelekku ku ke singin” pengkeling diri selaki misterius ta. Menurut pangkeleng tau rama peno, lok diri selaki ta roa ada tokal runtung petang, pang gardu parak ke deker ola atas desa, saruntung benru turin tau sembayang isya’. Ada warung kawa ode’ nangkang gardu, ade nomongka kadu ya kenang meronda. Leng beleng baeng warung kawa, nya selaki nonda singin nan, pintar benar batutir, ke tetap bau ya jawab serea macam pakatoan tau. “Kulia dirinan ke” leng beling diri nonda singin, “kulia si abange” samung Mbonong tanja kengila, sambil ragu-ragu ndalam ate, na…gama diri selaki ta, ya sama ke rama peno len, ade ya sepan pakatoan kaku ta nonda isi, ade hanya tu seboe waktu bae lamen tu piker. Tau-tau len ade tokal pang warung kawa nan, rena ya irep kawa, ampa-ampa lese-lese sambil basnenge’ si kuping, ya anti nya selaki nonda singin nan laong. “Ya kusemula mo sakendi, ke ka tuter tode dadara ode, Shopie (1) singin. Sanopoka kututer, harus ku yakin dunung lok ya mu menong tuter ta sampe suda, apa nongka peno tau ade ya tua kawa ke pakatoan kau nan. Rajin mo ku tuter ke tau len, tentang pakatoan nan, tapi kagampeno kaleng nya sarea, no sabar ya menong "leng beling diri selaki nonda singin nan rena ya irup kawa sampe baseda, lok kajangka dalap ya nikmati kawa kaleng anat bae’si basesa nan padahal. Kareng ya eneng mo kabali ke baeng warung untuk ya tamba isi mok kawa. "No si Abang-e, kita tu serius benar ke pakatoan ta, keras benar ka tu sate to sela katelas ta, apa sebenar arti katelas, katu jadi manusia, tiba-tiba tu ada, padahal nongka kadu tu eneng, tiba-tiba tu sadar lok kita ta tau salaki ato sawai, tanpa kakadu ya beang tu pilihan untuk tu mili’, tiba-tiba tu lahir pang desa yang marata, pang tenga keluarga miskin… ke peno ampo palari pakatoan ta, ade nosoda boe, ta ya garuk-garuk otak tu sampe no bau tu tunung, bahkan to’ ta sia Abang, no monda nyaman ya saya enti boat apa-apa, apa boemo bunang otak saya, tentang sai kaji ta sabenar. Tiba-tiba diri ke ke-diri-an kaji selalu tampil berbeda pang dalam masing-masing ruang. Ba deme diri’ kaji sebenar, kaleng diri-diri kaji ade len, ade kam kadu kaji kenal senopoka, kareng… bademe ke basaimo mo Aku, trus saimo mBonong singin pangkelek kaji nan. Jadi keras benar arap tu, nakena bau tu tukar piker ke Abang”. "Bananmo sanak salaki, ba ku mulaimo kaleng kapening sama, ade kakadu ya usik otak si Sophie, tode dadara ode nan.” Leng tuter diri salaki enda singin. Api dila warung kawa, semakin dalap petang semakin redup, kasesulu angkang bulu kriting belo nya selaki enda singin ta, sampe tangkela puring monca rena bakarukit bulu. “Pang sopo masa si Shopie dadara ode ta, kamelas rena talengan ya baca surat rahasia ade masi ya regam pang dalam ima jentik ode. Kadatang mo surat nan, no yato’ ka kaleng. Nonda singin ka pengirim. Ka ketulis mo pang dalam surat nan sopo pakatoan, Who am I . engka kadu ya duga leng si Shopie dadara ode ta sanopoka, lok ya dapat surat nonda singin pengirim yang sarata. Apalagi kenang mo pakatoan yang maranan. Heran, kamelas becamper penasaran pang dalam otak si Shopie, dadara ode lentik ima ta. Soal selama ta nongka kadu ya piker leng si Shopie, tentang sai diri’ nya. Bagi si Shopie, sanopoka ta, ada penting ya piker melok cara ya sengke mentrinas batu ade mulai mo tumung pang lolo idung, ya banding ke harus mo ya urus pakatoan “Sai Aku”? "Kareng lalomo bakasena si Shopie dadara ode ta. Lan ya tulang balong-balong leno ade ada pang dalam kasena, leno ade nonda pang tu bolang lok kajangka batamis Kenya si Shopie, ‘sai kau…!!!’ leng beling si Sopie sambil ya telit leno pang dalam kasena. Leno pang dalam kasena nan ya turit si melok si Shopie telit diri, persis ke melok si Shopie telit nya. Kareng si Shopie putar diri’ nangkang kasena, yang mara tau menari sambil mata tetap kemo tilek leno pang dalam kasena nan, rena lenonan kemo rena nilik si saleng intip ke si Shopie jentik ima ta. Untu kemo si Shopie, kemo si leno, kemas si Shopie, kemas si nya leno nan. Kareng kadu kaya parak benar kasena nan leng si Shophie, ya tengange balong-balong leno ade batamis kenya pang dalam kasena nan. Beling mo si Shopie, “Basai Kau Gina” sambil ya telit rena ya santelong nya leno nan. Nosoda boe leno nan yang mara nan si kabali, ya santelong si Shopie. tapi jelas nya leno nan siong si Shopie, mana kele ka batamis saleng ete melok ke si Shopie”. Leng beling diri selaki nonda singen. Beling mo dirinan kabali “Leno diri’, diri’ leno, ka baleno kaleng diri’, ka ba diri’ kaleng leno. Leno ada diri’, diri’ ada leno, nonda diri’ nonda leno, ada diri’ ada leno, ada diri’ nonda leno, ta…nya katelas tau to sai diri’, ada leno nonda diri’, ba setan singin denan”. Leng lanjut tuter diri selaki nonda singin ta, sambil ngantang sengara ya irep kawa ya roa mo bo. Kadu ka semakin kerit yang sara monte tata mBonong, dong ke, ya bau tengange apa isi tuter diri selaki nan, mala ade ya piker leng nya, “basai si Shopie dadara ode jentik ima poyong mama nan bele, mepang bale rua ale”?, matamo tutu mBonong ka tau belaho ina benar. Rena tau boemo berekok boa batuter. Bau mo ya tangkap kapening otak MBonong leng diri selaki nonda singin ta. Kaleng ya lanjut mo tuter kabali. “ka kadu menong singin Kurt Cobain dirinan ke” pakatoan diri selaki nan. "We… ao,,, batu to benar kita Kurt Cobain nan, maklum mo nan nya sala sopo Band ade paling tu kagumi kita. Gitaris ade ka mate samate diri tawa sapuas karoa leno nan to” Diri selaki nonda singin ta senyum baesi ya ingo mBonong. Tode teruna len ade nyangkok berema, pang warung kawa setoe deker, ola atas desa nan masi lese-lese baesi soro senenge. Kareng ade taruna len mulai mo mesan kawa beru kebali, apa kawa nyang kamo boe. Nya baeng warung nan senarang kapuli baesi, ya pina kawa serea group nan. Pang dalam ate diri baeng warong nan “ao… beang-beang mo, roa gama nya selaki nonda singen ta trus betuter sampe jaga, ma bau boe sarea dagang ku. "Kumulai kebali ke tuter nya Kurt Cobain (2), muntu sejira surat ade ya tules tawa serea penggemar. Miker nya, mungkin taa nya, surat terakhir ade ya kutules selama katelas ku. Senopoka serea drama ke rahasia katelas ta berakhir jadi lebe pet, leng pang dalam ate nya Kurt Cobain masa nan. Rena ya tarek laci meja, ya sepasti lok masi si ada pistol pang dalam laci. Ya olas-olas pistol ta, sambel rena ya lanjut si ya tulis surat. Mungkin aku ta sala sopo tipe narsistis (3), ade Cuma bau seharga waktu katelas muntu ku mesa’, Cuma diri’ ku mesa ade bau ku seharga. Ku temung hakekat katelas ku, amen ku menyendiri. Aku ta terlalu sensitive, perlu sekedi ku mate rasa, ma bau mo kutotang rasa kanyaman katelas ku muntu ode, muntu masi besai ke sarea sanak keluarga, ada ina bapa baeng sayang, ingo gita ku, masa muntu masi ku bergantung ke dunia ku. Masa sanopoka masa ta. Masiii nopoku bau sangilang rasa prustasi, bersala, ke empati ku ke serea tau. Serea kita si tu beri kabalong. Sarea kita si, ka kadu ada kabalong katelas. Aku ta, terlalu ku beri ke ku cintai sarea tau, sampe-sampe no soda boe rara ate ku, melok cara ku sanyaman ate sarea tau ada. Aku ta tau terlalu labil ke pemurung. Ke nomonda semangat katelas ku to ta. Maka nan totang bahasa terahir ku ta, sambil ya tulis pang dalam surat. Diken si lebe balong tu peda’ dari pada yatu pudar.” Nan nya bahasa terakhir nya kurt Cobain ade ya to’ leng tau”, leng seda cerita diri nonda singin nan. MBonong masi telengan yang sanenge tuter diri salaki nonda singen nan, sampe boemo kerit-kerit tata ya tengange. "Nonda tau baeng to’ benar, apa ade terjadi jiranan, tapi marang nawar les mo berita pang dalam koran, lok pang tanggal balu Maret ten siwa pulu empat, nya Kurt Cobain nan ka mate temak tata mesa ke pistol.” Lanjut tuter diri selaki nan. Lao-lao mBonong mulai mo kagum ke diri selaki nonda singen ta, melok bau diri selaki ta bereto lebe peno ke nya mBonong, tentang Kurt Cobain, rena nya Kurt Cobain ta penyanyi pujaan mBonong. Sala sopo tau taruna len, ade ka kaleng mula mo ya tengange karante tau dua ta, tiba-tiba penasaran sate nurit. “bau tu nurit kita ke abang” leng beleng nya taruna nan. "ba kuda’po ya no bau apa” ya samong leng diri nonda singen nan. “deta ne warung sanak salaki-e, sala sopo katokal ade paleng egaliter pang bao dunia, bahkan lebe egaliter amen tu banding ke gedung parlemen ato ruang kulia”, lanjut diri selaki nan. Bakareng mo batampiu ketawa serea tau ade ada pang warung kawa nan. "Apa jina ade uwok lalo tu ape nan gina abang, adamo tau dadara ode jentik ima poyong mama, ade ada mentrinas pang lolo idung, kareng to’, ada mo tu menong nya Kurt Cobain….?!!”. "Ba taa lok sanak. Dua tuter nan ita ne, sebenar ya sangita tawa kita sarea rama peno, tentang masala ade paleng esensial pang katelas manusia. Ade sopo nan fakta rekaan tentang si Shopie, kareng ade sopo, fakta ade tutu kakadu terjadi tentang nya kurt Cobain singin nan. Si Shopie nan ne, sala sopo tokoh pemeran pang dalam novel Dunia Shopie, ku yakin, lok kamo kadu mu menong singen nan. Kareng nya Kurt Cobain nan, ya nansi vokalis group band Nirvana singen." Laan… sarea ade taruna nyangkok pang warung nan, ya menong tuter diri ta. “Ada sopo hal ade sama pang dalam kisah tau dua nan. Sadua-dua ka tama pang dalam situasi kritis, dalam ya buya jawaban pakatoan ade nonda akhir,. Ya nan si pakatoan ‘Sai Aku’.” Leng beling diri nonda singen nan. mBonong masi si telengan baesi ramenong. “Tapi mungkin pang sopo masa ya dapat si waya ya simpulkan leng tau, apa jawaban sabenar pakatoan nan” leng beling nya taruna sopo ade kaberu nurit karante ita nan. "Betul denan sanak. Tapi apa ade bau tu pina kesimpulan final tentang jawaban pakatoan nan. Rena padahal, sarea apa-apa ade ada pang bao dunia ta, nonda ade tetap, “phanta rei”(4). Ade kekal pang dunia ta kan Cuma proses. Nosoka nan lok ke sanak salaki” leng lanjut diri nonda singen nan kabali. "Nosoda boe, ke nosi ya ka gengal leng serea tau, untuk terus rabuya tentang apa arti katelas ta. Ada tau ade merasa puas, amen ka mo bau ya temung sesuatu ade bau ya sadu pang dalam katelas, sehingga amen nya, ya angkang mo leng masala goncangan nilai katelas, masi bau bertahan, apa soal ada parenti ana. Tapi sebagian ade len ne, no soda boe gelisa, bahkan ya anggap leng nya kejadian apa-apa mo ade pang bao dunia ta, selalu problematik. Nonda ade benar-benar mapan rena kekal, nilai katelas no soda boe ta goyang-goyang si, waktu no soda boe mutar, hal-hal ade kadatang nan kamudi, ya ganti mo katokal ade kadatang beru. Serea apa apa pasti terjadi secara acak, kadang no soda pusuk petu, kareng ya berakhir mo sarea sesuatu nan, pang sopo titik ade no bau ya tu pirik diri tu kareng nya, yanan si chaotic”, leng beling diri nonda singin nan. Kareng ngantang sengara tuter diri nan, bau ada sela irup kawa, sambil kakan tepung sanggar ade ya jual leng baeng warung. Kareng ya lanjut mo tuter kabali. “Ada mo sebagian ade len manusia ne, ade bersikap eskapis. Mungkin karena terlalu bimbang, apa soal nonda benar ade bau tu sadu pang bao dunia ta. Ada si ade len, ade lebe ke sikap sakedar mengundurkan diri, kareng pertarungan katelas pang bao dunia ta. Tapi ada si kelompok ade tutu selibat diri, beang peranan pang dalam ya beang nilai-nilai beru’ tawa perbendaharaan makna kaboat katelas, yanan si bersikap kritis. Kareng ada mo sebagian kelompok ade lebe ode kabali, mala bersikap untuk no roa jadi apa-apa, musnah, lenyap, ilang, nol, yang sara pilihan katelas ade ka ya ete leng nya Kurt Cobain. No si tu to’ benar, bau ke ya pertanggung jawabkan sikap nan secara filosofis ?!!”. Leng pengkeling diri nonda singen nan ya lanjut tuter rena bakatoan. Mana sopo nonda tau taruna nyangkok pang warung nan, ade coba ya jawab. Pang dalam ate mBonong, pasti mo diri selaki ta kuat benar maca buku. Sate benar ya katoan leng mBonong, kopang diri nan, kira-kira kulia kee rua, yang sara nya mBonong, kira-kira angkatan pida rua nyeta ble?. Amen tu ingo kaleng bulu gondrong, mungkin diri ta kamo kulia telu ato empat ten le’. Tapi, lema ya totang ka pangkeleng diri baeng warung nan, lok diri salaki ta, noberi diri amen tu katoan tentang asal-usul, ato pun sifat pribadi len. Ka pangkeling diri baeng warung nan ne, diri salaki ta langsung ngantang batuter, ke ya bilin tu teres, amen tu ketoan tentang hal pribadi. Tapi ka si kadu ya menong leng baeng angkringan nan lok nya salaki nan ka kadu kulia pang filsafat IAIN jogja, kareng kakadu tedu pang asrama samawa pang jogja. Semakin le’, semakin dalap mo tama petang, rebin apa boe mo ada turin besau, pang bao rebu. Sebagian tau taruna nyangkok nan ada mo ade mole. Saleng gentan mo ke ade beru datang len. Ya selanjut mo kabali tuter diri selaki nonda singin ta. “Ada peno benar pilihan eksistensial tawa manusia. Antara len ne, apa ade ka kadu ya piker leng Kierkegaard (5) pemuya tawa substansi katelas manusia ta, amen tu jawab kenang cara ontologis, hanya ya bawa tu ko jalan buntu baesi. Mungkin hanya eksistensi baesi, ade pas tawa manusia. Sedang deta bae mo, sifat ne eksklusif benar, apa soal apa-pa si ade ada pang luar manusia ne, keberadaan nya nan nosoda pretensi len, nosoda motif." Kareng yang sara dosen diri salaki nan ya sajelas lebe do’. “menurut nya Kierkegaard, ada telu cara manusia ta, ma bau ada eksistensi. Ade pertama, kenang cara bersikap estetik, cara bereksistensi yang mara ta, ada pang manusia ade ya kuasai leng perasaan, ke lebe sapenting kenyaman katelas baesi. pilihan katelas ade ya hadapi leng nya cuma dua baesi, yanan si amen no deta, ba denan. Amen ya pili apa-apa, tauta no kenang rasio. Kareng ade kedua ade ete sikap etis yang sara Socrates. Amen mu barangkang ke dilema moral, pang dalam katelas ta, harus mu menong suara ate mu. Soal ya nansi suara ate sabenar, baeng satelit manusia, ba bau ya temung jawaban makna katelas ade bau tu pertanggung jawabkan kenang moral. Pang tingkatan ta manusia nopoda kesadaran tentang dosa, sebage kelemahan ade ka ya wariskan pang manusia. Perkara dosa ne, sesuatu ade Kontigensi (6) pang dalam katelas manusia. Kareng ade ketelu, yanan si sikap religius, yang mara ade kaya sangita tu pang dalam telas Nabi Ibrahim. Pang masa Nabi Ibrahim muntu alami kegelisahan belo, pang dalam ya buya menya Tuhan, akhir Nabi Ibrahim ya temung jawaban, maka sabenar ibrahim nan ka mo tama pang dalam ke abadian. Tapi pang dalam perkara ta, no bau tu sepan lok hanya ka datang kaleng upaya manusia mesa-mesa baesi. Tapi ada campur tangan Tuhan pang dalam, untuk ya selamatkan sai-sai tau ade sate ya selamatkan leng latala, yanan mo hak prerogatif nene’ kalepe kaji mesa-mesa denan. Kesadaran yang mara ta pang ate manusia ne, menurut Kierkegaard, yanan si kesadaran, ade bau bawa manusia ko pang katokal ‘ada’ ade abadi. Tanya sopo pilhan sikap eksistensi paling tingi pang manusia. Menurut nya kabali, ta nya kesadran ade harus tu upayakan benar, ada’ pang diri’ sarea sarea kita.” MBonong nosoda boe telengan baesi ya menong tuter diri nan. Kaleng baeng warung kemas baesi ya ingo sarea gerup nan. "Tapi banosoka palangan sejara pemikiran filsafat ta, nonda ade belangan lures?!!. Pang dalam palangan sejara filsafat nan pasti bae ada gejolak, turen entek pang rekonstruksi pemikiran, yang sara tu lalo ko desa bao, ada mo negasi, bahkan pasengilang. Missal yang mara ade ka terjadi pang Nietzsche (7), tau ade sate ya bongkar sarea taradisi kebudayaan barat?!!” leng beling sala sopo tau tarunan len, ade tokal pang warung nan, tiba-tiba sate nurit dalam palaong. MBonong katawa pang dalam ate, nongka ya bayangkan leng nya sanopoka, lok ka pakatoan mula nya, tawa diri salaki ade nonda singin nan, ya dadi palaong maras ade ya selibat tau peno. "Ka mo mate La Tala," leng beling nya taruna nan ya tero ka pangkeling Nietzsche. Balik kepiya mBonong ya menong nyenan karante. Ade ya to’ leng nya mBonong, lok no sembarang tau ade bau sebut singen La Tala, nan lok ade kaya baca kaleng pemikiran Mula Sadra, we.. mala nyeta ya karante mo, lok La Tala nan kamo mate. "Kapangkeling Nietzsche nee, manusia justru ilang kebebasan, lamen ya beang La Tala telas pang dalam otak. Nan ponya bau manusia ta dapat kebebasan dalam pili ola katelas, lamen bau mo nya nan, ya samate La Tala. Ke nan po nya bau manusia nan jadi uebermensch, superman," leng lanjut karante nya taruna nan kabali. MBonong semakin pening otak. Tapi berusaha benar nya bertahan tokal pang nan, ya menong karante nya taruna nan. Ke nya maklum diri’ si, apa nya MBonong ta masi po semester sai, nopoka peno buku ade ka kadu ya baca. "Leng ka ya semate La Tala, leng nya Nietzsche taaa, akhir yong hanya bau ka ya bongkar sarea tradisi budaya barat bae, tapi nya sekaligus ya lawan sarea ajaran tentang moral”. Leng beleng nya taruna nan. "Betuuul benar denan sarea sanak salaki” ya samung leng diri nonda singin nan kabali. Tapi amen bau ku tamba leng aku, ka jira La Tala nan mate dalam otak Nietzsche ne, nongka ya sadari leng Nietzsche, lok nya nan mala justru jadi ada dua La Tala beru, ya nansi Dionysos, dewa anggur ade ta ramabo-mabo, ke’ Apollo, dewa ade ada tabi’at tenang”. Leng beling diri selaki nonda singen nan. "Apa yaa ke, lok sarea manusia ta pasti tama pang dalam dua ketegangan ta. Telas pang antara nafesu ade dahsyat ola setoe kanan, ke kebijaksanaan ola satoe kiri?!!” leng beling mBonong, ya coba pina hipotesa beru. Nya mBonong bae talengan, melok cara ka bau ya pina leng nya hipottesa nan. Diri salaki ade nonda singin nan kemas, kaleng ya jawab singkat pakatoan MBonong “Ya denan, tepat benar”. “ka kaleng dua ketegangan ta, bau ke manusia, ya kendalikan nafesu, ma bau condong lako kabalong kebijaksanaan baesi?!!” bakatoan mBonong kabali. Diri salaki nonda singin nan tedu sangara, petang semakin dalap benar mo, rebin boe mo ka ya adal sarea ade ada, padagang baeng warung, kareng sakendi mo basesa. Masi si ada sopo dua suara motor sepeda lewat, ada mo suara tau toto tiang listrik telu kali, petanda lok ka mo jam telu petang. "Aku masi po ku belajar tentang hal nan. Tapi ta lok sanak salaki balong. Sate ku satuntas dunung soal Nietzsche. Nyenan (Nietzsche), tau ade keras benar parenti pang nilai-nilai tentang keindahan. Tapi no ya sadu hal-hal ade bersifat transenden. Nonda ade bau tu bela lamen tu kenang singin La Tala pang dalam katelas. Ke memang ne, nongka perlu. Apa nya Nietzsche nan tau nihilis, ‘Nonda guna amen tau nan buya makna katelas’. leng dirinan lantang. Soal katelas ta bole jadi si absurd, yang mara ade kaya sepan leng Camus (8). Kontradiktif nonda arti. Katelas jadi lebe bermakna lamen manusia ta berontak, walaupun nonda makna. Ba manusia ade no ya sadu hal ade transcenden, apaleng batas akal ade ya kagumi leng nya nan, hanya ade bersifat estetis bae. Padahal, noo ya sadari leng nya, lok estetis pang dalam dunia imanen ta, nan nya pantulan eksistensi Tuhan, ade hanya bau ya pahami sebagai fenomena kalembut jiwa manusia baesi leng tau no percaya Tuhan. Padahal muntu nya, ya cintai mo ade bersifat estetis, nya nan sebenar kamo tali diri ke kode ilahiah transendental ke-Tuhan-nan, ka tiris sifat kalembut latala ne, nan nya ade ya sebut estetis leng nya sarea nan. Ba jadi amen beleng mo nya, lok La tala ta kamo mate, lok hal La Tala ta ya kekang otak manusia untuk bebas enti boat, tapi lamennya masi si terlibat dalam dunia estetis, tanpa ya sadari, nya nan sebenar muntu ya sadu ka ‘ada’ La Tala. Justru ka tiris sifat lembut La Tala, ade ya kenal leng nya nan estetika, estetika ta ade baeng pina sarea otak nya nan tawa berkereasi enti boat. Ya ciptakan mo segala macam seni. Ba melok bau tu sebut La Tala, kekang kebebasan amen nan lok. Jadi leng ka pene’ lalo otak tau rasionalis ta, nan bua nya sebut diri ateis. Padahal amen ka pangkeling mo boa nya ateis, nonda agama, justru nan nya karante, ade ya tunjukkan lok nya nan ada agama. Agama dalam pengertian bahasa nan kan aturan, jadi amen tau ateis nan, no ya sadu ka ‘ada’ aturan La Tala, kareng keras benar ya pati’ aturan ade ka ya pina leng nya mesa, banosoka nya nan ada agama, apa soal nya terikat pang aturan ade ka ya pina diri nan tentang aturan ketelas. jadi ada agama nya nan sabenar, ya nan si aturan ade ka ya pina leng akal mampal nya nan mesa”. "Pang dalam bakarukit pemikiran filsafat semacam nan. Bau ke manusia ya ete sopo bae kaleng ketegangan nan, kaleng ya bolang ade sekode?!! Bakatoan mo tau taruna len kabali. "Bau bae’" leng beling diri selaki nonda singin nan. "Bell (9), singin tau intlektual pang abad 20 kareng New York ka beling menan. ‘Ke kuda bua no’, Apa soal nonda pemikiran manusia ta, ade benar pang dalam sarea hal. Ada tau ade benar pang dalam hal-hal tertentu baesi. Yang sara dokter ade beling, lok nonda medo ade bayu ya saterang serea macam penyakit. Nan si nya lok akal pikiran manusia taa, nonda pikiran tunggal ade bau ya jawab sarea persoalan katelas manusia. Rena tu to', lok masala katelas ta kompleks benar, rena multi dimensi si. Yang sara ade ya yakini leng Bell sendiri, nyaa ta tau ade konservatif ke nilai, sosialis nya tangkela, lamen nya tu sangangkang ke melok cara tau rama peno, ya penuhi sedo gaso tawa katelas. ke liberal nya tangkela, lamen tu sengkait ke melok cara ma bau ya buka ruang politik tawa tau rama peno”. Sanarang kerit bae mo tata mBonong, tapi bau mo ya parasa leng nya nan, ada mo berkurang beban otak. "Pakatoan kritis ade bau tu ajukan nee, ka kuda bua kita ta, harus tu terima secara kafah ka hasil pikiran manusia. Tu iman ka hasil renungan akal manusia nan yang mara agama?!! Ba kasai nya nan gina. Semntara tu to’, lok pikiran manusia ta absurd (10), rena peno kontradiksi po pang dalam?!!”. Leng beling diri selaki nonda singin nan. Ya tulang benar mata diri salaki nan leng mBonong sambil kemas-kemo, bau mo ya parasa leng nya, lok pang jaga ta ka mo bau ya tumpan jawaban, kaleng ka pakatoan ade runtung nan ganggu pesok mBonong ta. No mo bau ya tahan leng nya sate mo lema tama kulia jaga-jaga, ma bau lema katemung ke tode dadara sopo kelas. Apa nan nya tode dadara nan ne, ade selalu pina semagat mBonong tawa kulia, ke jadi mama mako ya langan layar katelas ta. Tode dadara sopo kelas nan, ade jadi manjeng paling beru MBonong to’. Sate benar lema katemung, nya Bonong ta, apa sate lema ya cerita rahasia katelas, ade ka ya dapat ka pang palaong sarawi, ke diri nonda singin nan. Sate berlagak jadi guru filsafat katelas nya pang nangkang manjeng, ya tero sarea karante, diri sarawi nan. Wenya,,,, matamo nya ka mBonong belaho uda benar singin. Catatan Ne: (1). Singin tokoh pang dalam novel filsafat ade bajudul Dunia Sophie, ka ya tulis leng Jostein Gaarder. Ka bau ya sajelas leng nya, masala ade pelik pang dalam filsafat jadi lebe gampang tu cerna, kenang bahasa novel. Nya sendiri nan tau pendidik. Ilustrasi pang bao nan, interpretasi bebas kaleng penulis, atas tokoh rekaan si Shopie dadara ode jentik ima pang dalam Novel. (2). Gitaris sekaligus vokalis Nirvana. Nirvana ta grup musik ka asal kareng Amerika. Aliran musik nya nan gerunge, ade barakar pang musik rock. Pang akhir surat nya Kurt Cobain, ya tulis telu kata ade mungkin jadi kredo nya, yanan si “Love, Peace, Emphaty. (3). Sifat ade lebe beri sa bangga ato ya nikmati diri nya mesa, sopo sinonim ke kata egotisme. (4). Ka berasal kareng Heraklitos, filsuf Yunani, ade bategas, sarea apa-apa pasti ya mengalir. Ko angkang na, era’ ta nya pemikiran ade baeng pengaruhi hegel tentang dialektika pang kemudi. (5). Soren A. Kierkegaard (1813—1855) nyeta pendeta merangkap filsuf ka barasal kareng Denmark. Ya tolak leng nya ola pikiran Deskartes, ade baseda “aku ku berfiker, nan bua aku ta ku ada”. Ka pangkeling nya, ade bau tu sadu ne, “proses ya kadadi”. Ko angkang ana, ta nya pemikiran ade ya pengaruhi filsuf-filsuf kareng aliran eksistensialis len, yanan si yang mara Karl Jasper ke Gabriel Marcel. (6). Istilah taa ne, ka datang kareng mazhab Skolastik, ka pangkeling tau nan bahwa mahluk ne terbatas kapasitas. Ka katerbatas mahluk ne nonda ka panyebab, yanan si katerbatasan ka kebutulan. (7). Friederich Wilhelm Nietzsche, filsuf ka kareng Jerman, ya kenal leng rama peno sebage tau repaham eksistensialis radikal. Ka pangkeling nya nan, bahwa, kemajuan ade ya cape leng manusia ne, ka sebab leng ka ada dorongan kehendak untuk berkuasa pang dalam tabiat sifat manusia, "wille zur demacht." (8). Albert Camus ta sastrawan ke filsuf ka kareng prancis. Ka karya nya nan antara lain La Peste (Sampar) ke Le Mythe de Sisype (tuter tentang Sisipus). Pang dalam La Peste, Camus ya sangita tu sopo sikap tentang katingi katelas. yanan sit tu berkorban atas nama katelas manusia rama peno. Tapi sikap nan nongka ya dasari ke rasa Iman ko La Tala. (9). Daniel Bell, ka ya kenal leng rama peno, sebage tau sosiolog. Ade peno bergelut pang dalam masala-masala kebudayaan, buruh, ke ideology. Tu kenal si nya basingin Bell ta, sebage kolumnis pang majala Fortune, ke nya merangkap sebage editor pang majala nan. Menurut pangkeleng ade ka ya akui leng nya, lok nya ta lebe beri tu sepan sebage penulis daripada tu sepan sebage ilmuwan sosial. Nya sala sopo anggota Yipsels, sayap sosialis, pang umer 13 ten. Kira-kira dua sampe telu ten ka jira nan, pang dunia ilmu social, ya akui mo nya ta, tau ade paling kritis terhadap sosialisme maupun kapitalisme. Buku ade ka ya pina leng nya ade bajudul End of Ideology, ya tali diri nya untuk no roa no terlibat benar dalam perdebatan teori ideology, barema-rema mo ke pamiker len ade kam nyang mo eksis sanopoka. (10). Tegas deta ne, “No tama pang dalam akal”, yang mara ade ka kadu ya tulis leng Tertullianus, “Credo, Quia, Absurdum. (Ku sadu ne, leng no tama pang dalam akal)

Oleh: Poetra Adi Soerjo*