Jogja Move Art 2024 Wadah Kolaborasi Seniman Indonesia

Pameran Jogja Move Art: Tumpuk Undung Likalaku Session 2024 saiki wis dibuka. Pameran iki diselenggarakake ing Taman Budaya Ngayogyakarta tepate ing Dalan Sriwedani No.1, Ngupasan, Kec. Gondomanan, Kutha Ngayogyakarta. Pameran kadadeyan ing 28 September nganti 1 Oktober 2024. Dibuka wiwit jam 10.00 nganti 21.00 WIB. Pameran iki bisa ditonton kanthi gratis kanggo masyarakat umum. 

Tujuan dianakake pameran Jogja Move Art: Tumpuk Undung Likalaku Session 2024 yaiku ngrangkul seniman daerah saka Sabang nganti Merauke, utamane seniman seni lukis sing bisa melu kanggo nampilake karyane supaya bisa didelok dening para penikmat seni ing Ngayogyakarta. Rencanane acara Jogja Move Art iki bakal dianakake saben taun lan dadi acara berkelanjutan.

Acara Jogja Move Art 2024 iki duweni tema Tumpuk Undung dipilih amarga nduweni makna bab karya bareng-bareng sing dadi siji ing sawijining pameran. "Pameran iki nampilake karya kang inovatif. Saliyane iku, masarakat bisa nikmati karya saka para seniman kang seje wiwit saka gaya utawa goresan karyanipun" tembung Agil Alfian ketua penyelenggara.

Ing pembukaan pameran diramekake dening Sanggar Pramudita kang nampilake Tari Dewi Anjani, Stefanie Arts Foundation nampilake Tari Sewu Tangan, Ni Dance, lan Tari Makalangan Jaipongan (28/9). Antusiasme para penonton wektu pembukaan pameran meriah banget, bab iku ditujukake penonton gumun karo tepuk-tangan kang meriah lan ekspresi rai kang seneng. Pirang-pirang wong ngefoto utawa ngevideo momen kasebut migunakake hp utawa kamera. 

Seniman kang melu pameran iki kurang luwih 264 wong, seniman sing melu pameran iki awit saka seniman enom nganti seniman sepuh. Umume karya sing dipamerake iki asale saka seniman Ngayogyakarta, lan karya paling adoh asale saka Sumatra. Karya-karya kang ing pameran saka Savdagrapy yaiku Fun Day, Andy Firmanto judul karyane Kembali Berdasa, Nuraini Ramadhani judul karyane Aku Mencintai Traumaku, lan sapanunggalane. 

Salah sijining karya lukis sing digawe Hokky Syahdu duweni judul The Forgotten Heroes. "Ing karya iki ana cerita yen jaman saiki kita luwih nggatekake teknologi kaya hp lan nglalekake kabiasaan maca koran. Yen mbiyen koran ora ana hoaks, nanging saiki yen ndeleng berita akeh sing hoaks. Kuwi sebabe nganti saiki aku isih maca berita babagan politik utawa liya-liyane saka koran amarga luwih yakin" tembung Hokky Syahdu. 

Pembukaan adicara pameran iki meriah banget, katon saka akehing masarakat kang tilik kanggo nonton pameran ing Taman Budaya Ngayogyakarta. "Karya-karya kang ditampilake unik banget lan menarik. Kreativitas para seniman nyampurake werna utawa gaya kang diwenehake ing karyane. Saliyane iku, para pengunjung ing dina iki akeh" tembung Iky pengunjung pameran. 

Anane pameran Jogja Move Art: Tumpuk Undung Likalaku Session 2024 kanggo para seniman bisa mbuka peluang kanggo kolaborasi utawa proyek anyar dening seniman liya, kurator, kolektor. Kanggo para pengunjung anane pameran iki nambahake informasi ngenani karya-karya kang dipamerake, kalebu teknik utawa sajarah penciptaan karya. Pramila, pengunjung bisa nyinaoni luwih akeh ngenani kagunan lan budaya liwat pameran iki.