lah bangkak-bangkak malatui kapalo rakyaik dharmasraya dek kanai tangan sarato bapikia,
nan de pe er de ndak juo manggarik do,
lum abih sansaro rakyaik dek harago sawit nan mahantak bak kue bolu kurang kocok,
ditambah musim hujan sarato harago gatah nan satali duo bilih jo harago sawit,
nan lai gak malonjak ameh sarato kayu di buek bak cando karako tumbuah di batu,
iduik sagan kok dapek pudua ndak nyo,
sajak razia kayu nan dapek parintah dari pucuak kayu tu bana,
hanyo nan kayo ba tambah kayo, nan bansaik samakin mularaik.
sajak ameh bakilo kalua e dalam sahari, lah banyak pulo warga dharmasraya bantiang stir ka usaho tambang (walau sajak sisuak alah juo),
mulai dari mangorai, mandompeng sampai malantiang jo mangaruak pakai kawik-kawik buatan japang,
lah ta dasak padang ka rimbo, musim pa ujan gatah murah, sawit ta kongkang bana,
kok ba kayu lah lamo indak,
kini hanyo logam mulia dari aliran batang hari jo batang momong,
aliran sungai talap jo batang piruko dan banyak batang aia lainnyo....
antah dimano latak salahnyo, antah politik antah dek bingik sarato dangki,
lah razia gadang-gadang urang di sapanjang aliran batanghari nan talatak di duo kabupaten (solok salatan jo dharmasraya),
dari info nan malatui, razia tambang ameh lia (kato paja-paja tu) lansuang dari kapolda jo pak gubernur (demi lingkungan kecek e)
lah tabang hambua urang-urang nan mangakeh dari batambang ameh tu,
bariak disolok salatan, ba galombang disitiuang V,
sampai kapolres jo anggota e pun disandera sarato di guguah dek urang banyak, sampai kabanyo ado nan patah gai batang iduang anggota polisi tu,
ndak lamo sasudah tu, (mungkin dek komandan bana nan kanai mah) kanai sosoh lo sitiuang V tu dek anggota polisi dari polres sijunjung jo polresta sawahlunto sarato tuan rumah, ditambah jo pasukan elit kepolisian enkaeri nan ba namo brimob (kama pai pasti manyandang sanjato bantuak rang pai parang),
suok kida di tarajang muko balakang kanai dongkak pulang baliak,
lai nan jantan masuak kategori gadang bahondoh pondoh ka ateh oto, ado nan kanai kaki, ado nan kanai tangan, ado nan dilapak ado nan ditarajang,
ado nan di elo, ado nan ta jangkang, ado nan ta kongkang ado nan ba jalan kaki, ad lo nan ba sipapai, pokoknyo langkok sangaik ko ha,
bunyi sinapan kaja ba kaja, bak cando ba pacu mangaluan paluru nan ado, antah paluru karet antah paluru tajam, ndak jaleh dek aden doh,
"raso sadang parang ba sosoh bana ko ha" kato kawan nan dari sanan.
di galandang ka dangau kapolisian daerah dharmasraya di gunuang medan,
nan tingga dikampuang tu hanyo padusi sarato nan jantan jompo sarato nan jantan anak-anak, tukang takiak gatah pun di harak pulo, nan sakik nyo angkek juo,
pokok e jantan nan gadang....
kabanyo nan ta bao, 10, 20 30, 40, sampai 70 puluhan urang,
sa sudah di sortir ciek - ciek (mungkin lai kanai dongkak jo tarajang juo mah, kanai tampa jo tampeleng, sabaik di nan rami sajo lai marasai, kunun di nan langang, rumah inyo lo lai) ba ansua juo nan pulang ka rumah,
sampai kabanyo nan tasiso 11 urang, sudah tu kaba e ado nan manyarahkan diri ka kantua korop baju coklat tu surang,
jadi nan ditahan di makopolres dharmasraya ado sakitar 13 urang (ndak jaleh pastiyo dek aden do)
lah sahari duo hari, sampai tigo....
kini lah labiah sabulan agaknyo mah, lah batambah taniayo sanak kito di sanan,
LSM, mahasiswa paduli, LBH, datang siliah ba ganti,
ma usaho an untuak manolong rakyaik ba darai tu,
anggota de pe er de Dharmasraya lai mancogok juo, ota suok jo kida,
mancangengeh ka sanan, mancangengeh ka situ, tapi tindak nyato untuak manolong urang nan nyo wakili alun juo nampak lai,
sampai akhia nyo warga datang lansuang ka kakak ke dua de pe er de tu, yakni DPRD provinsi sumbar,
mangadu ka wakil nan labiah tinggi,
dek ulah wakil nan ngenek ndak becus ma wakili untuak manyalasaian masalah rakyaiknyo,
KOK MA WAKILI MASALAH PITIH-PITIH MUNGKIN LAI CAPEK SALASAI E MAH.....
KA MA LAH KA RANCAK RAKYAIK KO MANGADU LAI KO HA,
LAH KA MARI BEDO, PEMKAB BA SIPAKAK,
DE PE ER DE BAK CANDO URANG ANGGAN,
DI HAROK DARI MEDIA,
BARITA NAN KALUA, PERIHAL KAPOLRES DI SANDERA SAE NYO,
TAPI SABAIK MUSABAIKNYO NDAK DISABUIK AN NYO DOH,
BA A KOK DISANDERA, ???
BA A KOK DOMPENG TETAP LANTJAR ???
ANGGOTA POLISI NAN PUNYO DOMPENG NDAK NYO KULAYAK AN DOH ........
PITIH TAKUIK NAN DITARIMO DEK OKNUM POLISI NDAK DI TULIH DEK MEDIA-MEDIA TU DOH................
- BANTUAK-BANTUAK NYO MEDIA KO BAREK SABALAH..... (anda berani bayar berapa?)
