Apa kabar elu semua?
Lama ga' ngejabanin Kompasiana, mangkin banyak topik menarik yang bisa diambil ceritanya. Kali ini gue mo' ngebahas tentang kondom. Apa tuh? Benda dari karet lateks super melar yang akhir akhir ini sering diributin orang gara gara Ibu Nafsiah Mboi tiba tiba ngasih kebijakan karet gelang, eh kondom nyang ntu tadi. Banyak yang ga' setuju daripada yang setujunye' .
Ya iyalah, wilayah yang masih "abu abu" ude pasti ade perdebatannye'
Jadi inget cerita pribadi kalo uda begono, jaman masih bandel bandelnye'. Keluarga sih sehat wal afiat ye. Ibadah juga bagus bagus aje , orang Babe jugak ngajarin ngaji dari kecil ampe gede.
Pas ane udah nginjek abege, si Babe tiba tiba nimbrung ngobrol pas ane lagi sibuk bikin licin motor buat malem mingguan. Perlu gue cerita sedikit, bahwa Babe gue itu orangnye' keras, tapi bisa jadi temen ngobrol sebebas bebasnye'. Faham banget dah kelakuan anaknye yang bangor.
Babe ngajakin ngobrol muter muter. Awalnya doski ngobrolin pekara motor nyang trondolnya uda ngalahin pohon mangga di halaman belakang ane. Udah udahannya nanya dong pekara harim. Udah punya ape belon? Ya gue jawab aja masa orang ganteng nyang nurun Babe-nye begini kaga ade yang demen? ( padahal asli, lagi ngerayu minta fulus buat beli bensin tar malemnya ,wkwkwkwk). Sambil senyum ga' tau bangga ape tau kalo gue sebenernye' bokis, beliau langsung nasehatin panjang lebar. Pekara miris liat anak tetangga nyang udah MBA alias Married By Accident. Atau yang bunting kaga' ngerti siapa bapaknya.
Nyinggung deh pekara agama dan hukumnya. Zinah lah dan laen sebagainya. Jujur aje, gue yang bebas ngobrol ame si Babe cenderung masih tabu sebenernye' buat ngobrolin yang beginian. Karena risih, ya pura pura aja gue mangkin giat ngeberesin ntu motor.
Eh, ujung ujungnya, si Babe terusannya bilang gini : "Mas, Abi minta kamu jaga diri. Inget bener pesen Abi , soal agama dan nyang laen. Tapi kalau udah engga' kuat, Mas pake kondom aja !". Kira kira gitu deh ngomongnya si Babe. Jeger dong. Muka rasanya berat ngelirik si Babe. Ga' tau mokal ga' tau juga kenape'.
Dan bener, Beliau minta konfirmasi ape gue denger kagak nyang diomongin ame Abi gue ini... Ya gue jawab aja iye iye sambil so' sibuk gitu lah... Ape mo dikate'?
Babe tambah nyerocos, ngejelasin. Bahwa Abi sama Mama ane 'hanya' bisa ngawal gue sampe' kesini aje. Kelakuan gue diluaran, ya wajib hukumnya gue bisa ngerti sendiri apa yang bener dan apa nyang salah.
Dan apabila emang salah, jangan sampe gara gara gue yang ga' bisa nahan nafsu, akhirnya cuma ngerugiin orang laen. Babe nambahin lagi, bahwa dia ga' bakalan ikhlas ngeliat kebandelan gue ngancurin kehidupan orang laen. Ya si wanita, ya keluarga mereka. Justru bukan gue-nya yang dipikirin, tapi dampaknye' ke orang nyang sekitarnye' !
Ga' munafik lah bray, sobi en sista. Jadi lelaki itu emang ribet nyimpen 'senjata' di celana. Ada aja nyang bisa bikin bablas lupa ame pesan panjang tapi pedes si Babe itu tadi. Dan setelah gue pikir pikir, ada benernya nasihat Babe tadi.
Jaman segitu, AIDS belon jadi momok nyang 'terlalu' menakutkan. HIV ato AIDS lebih banyak nular dari kebiasaan nyipek, atau wakap etep pake' jarum suntik. Jujur aje, dan sebagian dari elo jugak udah pada tau kayaknya. Gue dulu emang junkie. Maen ga' jauh dari Pengadegan, Kampung Bali, Baturaja, Halim en Priok. Bahkan nyampe' ke Bali, karena disana stok lebih ajib ajib datengnye'.
Alhamdulillah, gue bisa ga' pernah sama sekali tukeran jarum suntik, karena nalar gue masih 'rada' jalan waktu itu. Takut bener bener takut ame nyang namanya Aids. Dan kejadian bener bener, karena banyak sohib sohib gue yang dulunya sering wakap sambil gantian akhirnya bener bener kena virus HIV. Ini nyata. Yang meninggal duluan, rata rata sih bukan karena Aids, tapi lebih karena dulu overdosis alias kebanyakan.
Nyang masih idup sekarang, rata rata ude pasrah karena mereka udah positif HIV. Ude pada sembuh make'nya, tapi vonis hukuman mati nya aja yang tinggal nunggu hari. Ini nyang ngeri. Belon lagi yang pasangan, dan anaknye jadi ngebawa 'vonis' tersebut. Dosa apa mereka??
Sekedar cerita, jaman dulu emang nyari jarum suntik itu susahnye mintak ampun. Elu mo' nebus Terumo 1ml di apotik nyang nyohor bakal siap siap aja masuk bui dilaporin, ato' paling engga jelas ditolak bener bener. Ga' segampang itu ngedapetinnye'.
Bisa sih nyari ( apa sih yang ga' bisa di Jakarta?), tapi ude pasti ntu apotik jauh, en susah . Ato beli di toko obat kecil kecil nyang masih pade' nyari untung gede. Biasanya jugak ade'.
Dari susah nyari itulah para pemake' akhirnya ngambil jalan pintas buat make' secara bergantian. Bahaya uda ga' dipikir lagi kalo badan uda wakas alias sakit. Ini nyeri-nya jadi pecandu.
Kebijakan baru Nafsiah Mboi, tergantung kite' gimana mau nyikapinnye'. Mau ngedukung jugak kudu jelas alesannye', mau nolak jugak udah faham bener gak sih kejadiannye?
Jangan angan angan aje. Karena nyang diluaran sana itu, udah kejadian tiap harinye'. Jangan salah tangkep ya Brayski, Sobi en Sista. Gue ga' bemaksud sok wise ntu apalah.
Sekedar ngebagi pandangan belaka.
