“Ayu Bang! Buruan! Itu melulu yang diasah!” Mpok Minah beteréak sembari dandan di pangkéng.
Sesaat kemudian, dengan véspa kesayangan, Bang Jali pun ngempag ke rumah sakit sembari ngeboncéngin Mpok Minah. Di depan, ada Bang Juki ngeboncéngin bininya, Mpok Maémunah, yang kagak laén kagak bukan adalah kakak Mpok Minah.
Keduanya coba ngebut di tengah padetnya arus lalu lintas bahna banyak angkot yang berenti seénak bero-nya. Mpok Minah nyikep pinggang lakinya kuat-kuat. Sembari ngépot kanan ngelés ke kiri, Bang Jali mésem-mésem.
“Jangan cepet-cepet ngapa, Bang! Nti kité malahan ikutan koit juga...” Mpok Minah ngegerundel di belakang.
“Tenang aja lu. Sikep aja yang kenceng...”
Baru nyampé di tempat parkiran, Mpok Minah udah ngeliat Mpok Mun’imah lagi jalan terburu-buru sembari nahan tangis. Mpok Mun’imah ini kakak paling tua Mpok Minah.
“Yah Minah...Iroh udah kagak ada...” Mpok Mun’imah beteréak.
“Apa? Udah nggak ada. Innalillahi wainnailaihi rojiuun...” Mpok Minah langsung meluk Mpok Mun’imah. Keduanya langsung sambatan. Mata Bang Jali juga udah berasa pedes kepéngén nangis.
Mpok Maémunah juga langsung sambatan, nangis sejadi-jadinya. Bang Juki buru-buru nubruk bininya yang roman-romannya hampir semaput.
“Sabar Néng....sabar Nvng...” Bang Juki terus meluk bininya.
“Iroooooh....Irooooooh....” Mpok Maémunah terus sambatan.
“Udah...kagak usah ditangisin kaya gitu. Yang penting sekarang kita urus jenazahnya aja...” Mpok Mun’imah berkata setelah agak tenang.
“Diurus di mana? Di rumah elu aja, Maé?” Mpok Mun’imah bertanya kepada Mpok Maémunah yang rumahnya némpél dengan rumah kontrakan Mpok Muniroh.
“Iya...kagak apa-apa...di rumah gua aja....udah bawa...bawa... Telepon ke rumah. Bilangin jenazahnya bawa ke rumah gua...”
“Kagak usah,” Mpok Minah motong. “Di rumah gua aja. Rumah gua gedéan. Taro di rumah gua aja...”
Maka soré hingga malam, rumah Bang Jali sontak ramai oleh pelayat. Jenazah Mpok Muniroh diletakkan di ruang tamu ngadep ngétan.
Ésoknya, jenazah Mpok Muniroh juga dimandikan dan diurus di rumah Bang Jali. Demikian juga upacara takziah digelar di rumah Bang Jali dari hari pertama hingga nujuh harian.
Pagi setelah takziah hari ketujuh, Bang Jali lagi asyik menyantap kué unti sisa takziah semalam ketika tau-tau Bang Juki nongol.
“Eh, Bang Juki,” Mpok Minah yang ngeliat gerayangan Bang Juki langsung negor. Ia buru-buru pergi ke dapur untuk menyiapkan kopi. Bang Juki émang jagonya ngopi.
“Lu mau ngapain, Minah?” tanya Bang Juki.
“Bikin kopi.”
“Kagak usah, Minah. Gua bentaran doang. Kagak usah répot-répot.”
Bang Juki émang kagak lama-lama. Dia cuman dateng buat ngasih cincin berbatu bacan kecokelatan buat Bang Jali.
“Gua liat-liat lu pan kagak banyak punya cincin. Ni lu paké kalimaya andalan gué... Bacan Afrika...”
“Yang bener ni Ki?”
“Bener. Dari kemarén gué émang udah niatin ngasih elu tu batu bacan gué...”
“Di Afrika ada bacan juga?”
“Ada. Udah paké.”
Sebelon pulang, Bang Juki juga masih ninggalin empat bungkus rokok buat Bang Jali.
“Tumbén Bang Juki baék banget ni hari...” kata Bang Jali sesudah Bang Juki pergi.
“Dari dulu pan dié orangnya émang baék, Bang...”
“Iyé. Tapi kagak sari-sarinya dia ngasih gua batu akik yang udah diikut segala. Paké ngasih rokok segala. Kagak tanggung-tanggung, empat bungkus!”
Mpok Minah mésem-mésem.
“Kenapa lu cengar-cengir?”
“Abang mau tau alesannya Bang Juki hari ini jadi baik banget?”
“Kenapa émang?”
“Ntu, Bang. Dia pan orangnya penakut banget. Nah kemarén, waktu denger jenazah Mpok Iroh mau ditaro di rumahnya, dia tu langsung mau pingsan gitu. Gemeteran. Dia kagak ngebayangin di rumahnya ada jenazah Mpok Iroh, dimandiin di sono. Pokoknya dia ngakunya ampir terkencing-kencing waktu ngedenger Mpok Maé bilang jenazah Mpok Iroh dibawa ke rumahnya....”
“Terus?”
“Nah, pas dibilang saya suruh bawa ke rumah kita aja, dia tuh langsung senang minta ampun. Jadi, ntu batu cincin mungkin tanda terima kasih buat kita, buat abang...”
Bang Jali géléng-géléng kepala doang. (080615)
