Peternak sapi perah di urang biasana ngagabung dina salahiji organisasi, contona koperasi. Nu kuring apal saperti Koperasi Peternak Bandung Selatan (KPBS) di Pangalengan jeung Koperasi Peternak Sapi Bandung Utara (KPSBU) di Lembang. Atuh di daerah lain kuring yakin loba koperasi-koperasi peternak sapi perah model kitu.
Teu jauh beda jeung di urang, peternak sapi di mancanagara oge sarua. Maranehna ngagabung kana organisasi model koperasi di urang. Contona Fonterra di New Zealand, Campina di Jerman, jeung Frieshland di Belanda. Eta ngaran-ngaran organisasi model koperasi nu ngabeungkeut rebuan peternak sapi perah.
Bedana jeung di urang, Fonterra, Campina, jeung Frieshland mah hasil produksina kawilang loba. Ngaleuwihan kabutuhan konsumsi masyarakatna. Atuh susu hasil produksina eta kapaksa dijual ka luar nagara, alias di ekspor tea. Malahan mah maranehna nyarieun pabrik susu sorangan di nagara-nagara tujuan eksporna.
Ceuk kuring nu bodo, lamun ningali potensi jeung kasempetan mah koperasi peternak susu model KPBS, KPSBU, atawa koperasi nu aya di daerah lain di Indonesia asana kudu bisa tah nurutan model Fonterra, Campina atawa Frieshland.
Babaturan kuring nu jadi anggota KPBS kungsi nyarita bari heureuy "ah urang mah da ukur anggota 'Kelompok Pecinta Bujur Sapi" cenah. Tong..ah tong boga pikiran pondok kitu lur...kudu maju ah! Cag!
