"Denger ceritanye kagak kong ?", bang jali buka obrolan.
"cerite apaan bang ?" kong Mu'in balas ngomong.
"iye ntu kemaren lagi pada ribut-ribut di kantornye pak RW, soal pegimane nti nentuin cara milih RT, mau pake cara nyang kayak sekarang nyang langsung dipilih sama warga. atawa mau pake cara baru nyang dipilih sama dewan RW", bang Jali menjelaskan sambil meminum kopinya.
"Seru banget rapatnye tuh, semua orang pada adu paham, bacot-bacotan, masing-masing pada mau menangnye sendiri", kong mansur ikutan ngomong. "Aye kan ikutan rapat disono kemaren" sambung kong Mansur.
"Jadi pegimane kelanjutannye tuh kong ?" bang Jali sama kong Mu'in berbarengan bertanya.
Mulailah kong Mansur bercerita, Saya ikutan asik menyimak sambil ngopi juga.
mulanye kubu merah marun mau pemilihan RT lewat dewan RW aje, tetapi kubu banteng ijo mau pemilihan tetep seperti semula aje, secara langsung nyang milih warga. Kalo diitung-itung kubu merah marun tuh paling banyak, jadi keliatannya bakalan menang deh.
Kagak disangke, babe Beye, lurah Rawa Citra, yang awalnya ngedukung kubu merah marun, karena desakan warga berubah haluan, babe Beye bilang lewat kacungnye dan ngomong lewat tipi kalau dirinye pasti selalu ngikutin kemauan warga dan pasti ngedukung pemilihan RT secara langsung aje seperti nyang kubu banteng ijo pengenin. Kontan aje omongan ntu, bikin warga sorak sorai kegirangan. Babe Beye langsung dielu-elukan, warga kembali memuja lurah Rawa Citra ntu.
tapinye nih pas lagi mau rapat RW kan babe Beye pergi tuh ke luar kota, babe Beye yakin kalau omongannye bakalan diikutin sama semua anakbuahnye di dewan RW, jadi babe Beye kagak perlu berada di kantor lurah Rawa Citra pas lagi dewan RW lagi pada rapat, maklum babe Beye kan bentaran lagi abis masa jabatannye jadi lurah, jadi mendingan kan babe Beye jalan-jalan keluar kampung, mumpung ada undangan bergengsi dari lurah kampung seberang. Siapa tahu ntar babe Beye bisa pidato disitu kan bisa membawa nama Rawa Citra jadi lebih baek lagi.
Siapa sangke siapa kire, anakbuah babe Beye pada bikin onar, bikin malu babe Beye, perintahnye babe Beye kagak dijalanin, boro-boro bikin babe Beye senang dan hidung babe Beye kempas kempis, ini malahan bikin babe Beye malu kagak karuan dan kepala babe Beye cenat cenut. Bukannya ikutan rapat dan ngikutin pilihan babe Beye, ini malah kabur dari rapat, bilangnya karena kubu banteng ijo kagak ada yang ngasih dukungan sama mereka. Bener-bener bikin babe Beye emosi dan nyuruh kacungnya ngusut sampe tuntas buat nyari ntu orang yang jadi biang keladinye, nyang nyuruh pada kabur dari rapat ntu.
Tapinye warga sudah kepalang pada kuciwa, babe Beye jago maen sinetron, jago maen topeng monyet, begitu kata warga. abis deh kekaguman warga Rawa Citra kepada babe Beye. Kagak peduli ntu babe Beye marah-marah sama anakbuahnye kek, mau gugat kek, mau ngapain kek, warga udeh kagak percaya lagi.
Dulu kampung kite kan namanye kampung rawa lumbung, pas babe Beye jadi lurah diubah jadi Rawa Citra, cuman bagus diomongin doangan. pret lah.
Kong Mansur berhenti sejenak untuk meminum kopinya sambil memakan pisang goreng.
"Emangnya kenape kong, kalo milih RT lewat dewan RW ?, kan sama aje kong", bang Dedi baru bertanya.
"Ya elah bang..", kata kong mansur ngejawabin bang Dedi. "Pasti bedalah, kalo nyang milih dewan RW kan bukan pilihan para warga, sudah pasti RTnye cuma ngejilatin dewan RW doang, mana mau ntu RT kerja sungguh-sungguh buat warga lagi ?. "Beloman lagi ntu RT pada dimintain duit sama dewan RW kalo mau menang jadi RT, bakalan banyak korupsi dah". Trus tuh RT nyang jujur kayak koh ihok, mana bisa kepilih lagi iye kagak ?". Secara koh ihok kan kagak disukain sama dewan RW, karena koh ihok kerjanye jujur.
"Koh ihok mah cuman banyak bacotnya doang, kong. Kerjanya cuman marah-marah doangan". Sahut bang Dedi memotong omongan kong Mansur.
"Tuh buktinye, karang tarunanye SEPI pimpinan wan ojik, pada demo ke koh ihok kan".
"Mereka gk suka kalo koh ihok nyang bukan warga sini malah mimpin dimari".
"Lagian koh ihok igamenya aje beda sama kite-kite, ya gak kong ?" kata bang Dedi minta dukungan kong Mansur.
"Ehh bocah, lu bisa mikir kagak sih ?", sambar kong Mu'in nyang dari tadi nyimak ceritanye kong Mansur.
"Emangnya lu pikir wan ojik asalnye dari mane ? dari kampung sini ? die kan asalnya disono noh dikampung sebrang nyang banyak pasirnye.
"Masa lu kagak apa-apa sama wan ojik, tapi lu kesel sama koh ihok, parah lu" kata kong Mu'in sambil tangannya tunjuk jidatnya bang Dedi. "lagian koh ihok kan marah-marah karena anakbuahnya pada males-males semua, pada makan gaji buta doang".
"Nyang penting tuh hasil kerjanye, bukan asalnye, bukan igamenye, ngerti kagak luh ?"
"Si wan ojik kalo emang igamenye taat, kenape die kalo demo ngajakin warga dimari buat ngamuk-ngamuk mulu ?"
"kalo berigame kan bisa die ngomong baek-baek, ngerti kagak? kong Mu'in kesel sendiri.
Bang Dedi diam saja, Entah ngerti atau tidak.
"Bener tuh bang Dedi, apa nyang kong Mu'in ngomongin, jaman sekarang udeh kagak pantes deh kite ngeributin suku atau igame orang lain. Asal die kerjanya bagus, jujur, dan buat bikin makmur warga, itu udeh cukup. Buktinya noh karang tarunanye PETI ES pimpinannye bang Lutdi, kurang taat ape die sama igamenye ? nyolong sapi juga kan akhirnye die ?. Jadi kite jangan nilai orang dari luarnye aje lah" Nasehat bijak kong Mansur.
Kali ini bang Dedi manggut-manggut.
Saya ingin sekali meneruskan mendengarkan obrolan mereka, tetapi jam sudah menjelang siang, Saya harus berangkat kerja. Jadi Saya tidak bisa lagi mengetahui obrolan menarik mereka.
Ternyata kampung Rawa Citra yang dulunya bernama rawa lumbung, warganya sangat majemuk dan pintar-pintar.
Setelah membayar kopi dan pisang goreng, sayapun pergi dari warung kopi bang Kumis. Mengendarai sepeda motor tua, sayapun berangkat kerja. Bremm bremmmm..
