Salah sahiji ciri jalma nu hade nyaeta jalma nu gampang nganuhunkeun ka nu pernah mere jasa ka manehna. Teu paduli identitas na saha jeung ti mana. Ali Karramallaahu wajhahu pernah nyarios yen nu kudu ditingali mah nyaeta naon nu dicarioskeun lain saha nu nyarios. Atawa naon nu dipigawe lain saha nu migawe, tina konteks ieu nu pasti mah sagala rupa hal nu positip.
Inget teu ka Ma Eroh nu asal na ti Tasikmalaya? Salah sahiji nu narima hadiah Kalpataru ti Presiden Soeharto di mangsa nu ka tukang karna manehna nyieun saluran cai melah gunung kapur nu kacida teuasna. Mimitina Ma Eroh milampah kitu teh loba nu nyeungseurikeun, loba nu nganggap mustahil jeung pasti moal kabuktian hasil, da atuh ningali kaayaan na ge euweuh cupat bakal berhasil eta “program” Ma Eroh teh. Dikitukeun teh Ma Eroh lain mundur malahan mah sumanget na teh beuki ngagedur baris hayang ngabuktikeun cita cita na. Saeutik saeutik gunung kapur dibelah, leuweung diberesihan keur jalan cai. Ahirna mah masyarakat nu tadina ngahina jeung nganggap remeh teh mantuan nepi ka cai ti gunung teh ngocor ka imah imah penduduk. Pamarentah ge mere Kalpataru, hadiah keur jalma nu berjuang dina masalah masalah lingkungan.
Eta nu di Indonesia. Ayeuna urang ngobrolkeun jalma nu asalna di Perancis. Manehna boga jasa ka masyarakat sa alam dunya kusabab karna jasa manehna urang bisa ningali Piala Dunia teh. Mun euweuh manehna asa na teh sigana moal aya Piala Dunia. Memeh ka eta urang muter heula ngobrolkeun Perancis, bae lah can ka dinya ge, sugan we iraha iraha sayah bisa kadinya kawas Andrea Hirata nu pernah sakola di Sorbonne atawa Asvi Warman Adam, sejarawan Indonesia nu kakoncara nu pernah sakola di EHESS.
Oh, enya aya oge Dennys Lombard, Indonesianis ti Perancis nu pernah nulis buku kandel tilu jilid judulna Nusa Jawa Silang Budaya. Kade tong poho oge, Bandung jaman baheula disebutna Paris van Java. Paris nu aya di Jawa Barat. Aya deui jalma Perancis nu kacida hebatna nepi ka dijadikeun ngaran jalan nu aya di Bandung. Apal teu jalan naon? Bener tah, ngarana Jalan Pasteur. Dicokot tina ngaran Louis Pasteur nu pernah manggihan anti virus-mun teu salah-keur panyakit rabies. Wewengkon ieu tehpadeukut jeung Rumah Sakit Hasan Sadikit. Hasan Sadikin teh lanceukna Ali Sadikin. Ari Hasan Sadikin mah jadi dokter, ari adi na mah naratas karir di Angkatan Laut terus jadi Gubernur Jakarta sabelas taun. Ari Paris Hilton ti Perancis sanes nya?
Tah, lamun nu boga jasa keur Piala Dunia mah nu sakeudeung deui bakal dipintonkeun di Afrika Selatan teh ngarana Jules Rimet, urang Perancis. Kade tong poho oge ka Pierre de Coubertin nu ngagagas olimpiade modern nu dimimitian taun 1896. Jules Rimet teh gede pisan tur loba pisan usahana pikeun ngayakun maen bola sa alam dunya. Harita teh manehna keur jadi presiden FIFA. Apal meureun taun taun harita teh keur meumeujeuhna suasana perang, utama na di wewengkon Eropa. Eropa harita keur eureun perang heula da geus rengse perang dunia ka hiji. Dimimitian deui taun 1939 nu disebut perang dunia ka dua.
Taun 1930 teh Jules Rimet ngawawarkeun yen bakal aya kajuaraan maen bola tingkat dunia nu baris diayakeun di Uruguay, salah sahiji nagara di Benua Amerika. Nagara nagara di Eropa asa kebeungbeuratan lamun kudu maen di tempat nu jauh mah meuntas laut deuih, da harita mah atuh kapal udara ge can kawas ayeuna nu bisa ngangkut ratusan jelema. Kapanan prototype na ge karek di apungkeun awal abad 20-an ku Wilbur Wright jeung Oliver Wright, eta oge masih loba nu kurangna. Mangka na jaman harita mah ka nagara nu jauh teh pasti make kapal laut. Contona jamaah haji baheula zarah ka Mekkah teh cenah genep bulan bulak balik di jalan na wungkul. Bung Hatta ge keur neruskeun sakola ka Walanda numpak kapal na lila pisan, nepi ka dua bulan atawa tilu bulan, baca we di Memoir-Mohamad Hatta.
Jules Rimet ngagunakeun kapinterana dina hal masalah lobi. Nagara nagara di Eropa di lobi ku manehna nepi ahirna Perancis, Belgia, Rumania, jeung Yugoslavia daratang ka Uruguay keur nyumponan ondangan maen bola. Nya meureun teu enak oge ku Jules Rimet nu bisaan ngalobina. Prung weh di Uruguay. 13 nagara nu miluan. Nu asup babak final nyaeta Uruguay jeung Argentina, sekorna 4-2 keur Uruguay, tapi pamaen pangalusna ti Argentina ngarana Guillermo Stabile.
Keur nginget nginget jasana, salila 40 taun, trofi Piala Dunia dingaranan Trofi Jules Rimet. Trofi ieu milik abadi Brazil keur meunangkeun juara taun 1970. Ngan hanjakal piala ieu teh leungit aya nu maling taun 1983. Nuhun Kang Rimet.
