Kurang leuwih dua bulan deui, di wewengkon Benua Afrika, puguhna nyaeta di nagara Afrika Selatan, bakal aya kompetisi menbal sa dunia nu diiluan ku 32 nagara ti lima benua. Urang Inggris nyebutna teh World Cup, lamun urang Perancis mah Coupe Du Monde, urang Itali mah beda deui nyebutna: Campionato Mondiale Di Calcio, jeung sajabana. Di urang mah Piala Dunia. Rek kitu rek keui nyebutna nu penting mah urang nyaho yen eta teh mangrupa kajuaraan menbal nu kawentar kakoncara gedena, malahan mah olimpiade nu diayakeun opat taun sakali ge eleh ku gede gede na ieu acara.
Puguh wae Piala Dunia ti mimiti taun 1930 nepi ka nu salapan welas kali taun 2010 ayeuna beuki rame, beuki resep, jeung beuki modern katingalina. Panitia na hebat pisan nu ngayakeun acarana teh. Waragad na geus teu kaitung sabaraha nu dikaluarkeun ku nagara Afsel. Tapi maranehna teu paduli ku sabab mangrupa kahormatan lamun hiji nagara ditunjuk ku FIFA keur ngayakeun Piala Dunia. Afrika Selatan teu heureuy sarta serius keur Piala Dunia ieu teh. Manehna nyiapkeun sapuluh stadion di salapan kota.
Di Johannesburg nyaeta Stadion Ellis Park jeung Soccer City, di Rustenburg Stadion Royal Bafokeng, di Pretoria Stadion Lotfus Versfeld, di Polokwane Stadion Peter Mokabe, di Nelspruit aya Stadion Mbmobela, di Bloemfontein aya Stadion Free State, di Durban Stadion Durban, di Port Elizabeth aya Stadion Nelson Mandela Bay, jeung di Cape Town-wewengkon nu di cicingan ku Syekh Yusuf al Maqassari baheula-aya Stadion Green Point. Teu kabayang sabaraha duit nu kaluar. Nu pasti mah lain duit hasil korupsi kawas di Indonesia. Sigana lamun Indonesia ngayakeun Piala Dunia stadion nu di pake teh nyaeta Gelora Bung Karno, Si Jalak Harupat di Soreang, Siliwangi di Bandung, Gajayana di Malang, Tambaksari di Surabaya. Sigana ieu mah masih sigana teung iraha kacumponana. Ah ngimpi weh heula atuh. Ceuk Andrea Hirata ge cita cita nu luhur teh dimimitiana ku ngimpi. Bener oge nya.
Ngan hanjakal Indonesia teu asup ka Piala Dunia di Afsel. Geus eleh di babak babak penyisihan ge. Teuing kumaha atuh ngabenerkeun men bola nu aya di Indonesia. Kabeh parusingeun, ngan eleh jeung eleh we lamun maen teh. Can pernah meunang keur ngabanggakeun nagara. Cenah mah-lamun teu salah-Indonesia ge pernah miluan pildun teh, harita ngarana masih Hindia Walanda. Miluana taun 1934 nu diayakeun di Itali. Sigana mah Itali teh keur mangsana dipingpin ku Bennito Musollini. Musollini teh layeut jeung deket cenah ka Hitler. Sarua kahayangna pikeun nguasaan nagara nagara nu aya di Eropa terus di dunia. Tong salah, Perang Dunia Kadua diseundeut na ku Hitler. Harita mah Itali jeung Jerman teh nyobat dalit.
Sigana mah ngan ukur ngaramekeun Hindia Walanda milu pildun teh, da teu menang cenah, malahan mah pernah eleh-lamun teu salah deui-sabelas kosong. Harita nu jadi jawara na nyaeta Itali. Di babak final Itali ngelehkeun Cekoslowakia, sekorna dua hiji. Italia kudu meunang jadi jawara kusabab cenah mah “diancam” ku Musollini, lamun teu meunang bakal dirogahala. Nu jelas we atuh diancam kitu mah meureun pamaen bola Itali teh sumanget campur sieun. Ahirna mah meunang we Itali teh. Ditambahan ku pamaen pang alusna ge ti Itali nyaeta Giuseppe Meazza.
Urang Indonesia mah ngimpi wae heula nya. Mugia taun iraha bakal kalaksana aya Piala Dunia di nagara urang. Nya heunteujaman urang ge sugan wanci anak urang atawa incu urang. Nu penting ayeuna mah ngabeubeuner heula kualitas men bola nagara urang supaya tong ngera ngera jeung ngerakeun lamun tandang ka kandang lawan, boh deui di kandang sorangan mah.
Sing inget ka Ir. Soeratin nu geus satekah polah ngorbankeun tanagana, duitna, jeung sajabana keur ngadirikeun PSSI tanggal 17 April 1930. Maenya Soeratin bisa keur jaman penjajahan keneh, ayeuna urang geus modern sagala rupa teu bisa? Mangga ah...
