Panase srengenge sumelet sanajan mendhung gumantung ing langit lan sumilire angin saka kidul mertandhake yen arep udan, sak ora-orane arep grimis. Kilat sesautan kaya-kaya arep ana bledhek sing arep nyamber gubuk anggonku lungguh sakwise mancing welut kanggo lawuh mangan mengko sore. Dak deleng sawah kiwa tengen wis katon ora ana wong babar blas. Padahal biasane Mbok Santun lan Wak Atim mulih kari dhewe. Mbuh, geneya aku saiki rada giris karo kahanan kaya ngene.
