Éndahé sesawangan nuwuh sengsem dinulu
Kwawa gawé tentrem jroning kalbu
Apamanèh sesandhingan klawan pepujanku
Tansah kekanthèn asta sadawané laku
Bebarengan lumaris tumuju margahayu
Sinawung elus sumiliring samirana
Katrem rasèngtyas kala tempuking nétra
Ing kana ana rasa nadyan nora micara
Rasa tresna kang tansah ngratoni nala
Kang wus sawatara sumimpen jroning pranaja
Sengsem suka satuhu mahambara
Tan bisa sélak suwala kipa-kipa
Marga kabèh pinangka wujuding nugraha
Resep tinampi legawa kanthi sukèng nala
Sineksèn éndah èdining sesawangan ing Gedhong Sanga
Tepiswiring persil kopi, parak ésuk 220313
Biyung Amie Williams
