Kom...Kom...
Udeh lame banget aye ngedumel soal nyang atu ini, ngape nemplok lame banget dikepala, nambahin uban aye, kaga tau ape ngelir rambut disini mahal? tapi mao pegimane lagi? nah otak aye adanye dikepala, otak yg didengkul ogah aye pake....
Masalahnye begini ni....
Aye pan Betawi imigran di Barcelona, ngikutin laki aye, awalnye nyari enaknye ngapain dikampung orang? ijasah nyang tokcer kaga punya, ada modal sekolah dibawah pu'un jambu doang. Jadi deh buka warung nasi sekalian ngarep sape tau ade pemain bola BARÇA nyang mampir, ape kaga keren kalo aye punya foto Messi kepedesan makan nasi goreng sambel trasi ? ntar aye posting di kompasiane deh, duileee.....
Biar kate lagi bunting waktu ntu, aye tetep nekat aje buka warung, kaga gampang, bumbu2 masih mahal, suseh lagi dapetnye, mane orang sini juga blon begitu kenal makanan kite....Dimane2 kalo baru bikin usaha emang kudu sabar biar badan kaga cepet lebar (ntar kaga botoh lagi dong). Nah...pas dikit lagi brojol, laki aye nyang deg-degkan, kesian kali ama bininye...jadi keluar deh die dari kantornye, pindah kedapur betemen centong ama penggorengan, biar kate die orang Spanyol, kebetulan die demen masak ama makan makanan Indonesia...Sampe sekarang die nyang jadi koki di warung kite yg nyediain masakan Indonesia.
Satu ari, dateng persoalan yg bikin aye mikir....
Aye denger ade pejabat Indonesia di Spanyol yg ngelarang seorang wartawan Indonesia bikin tulisan tentang warung Indonesia kite, itu pejabat malahan ngerekomendasi-in warung dr negara tetangge yg masakannye mirip Indonesia. Emang sih aye tau ade temennye die dikantor, yg kebetulan mukenye sejenis Nazarudin yg sekarang lg ngetop di Indonesia, sering bilang ke orang2 Indonesia yg ke Barcelona kalo di warung kite itu kokinye "BUKAN ORANG INDONESIA" ...aye tau tujuannye, biar orang mikir masakannye gak enak 'bule yg masak' ogah ah. Ape bener makanan Indonesia kalo bule kokinye jd gak sedep rasanye??
Sape aje yg punye usaha pasti ngedumel kalo ngalamin yg kayak begini, makenye aye mikir, akhirnye ye udeh...emang kudu sadar dan sabar kalo mau buka usaha, ade aje rintangannye...jujur aye ngaku ye, kalo rintangan terberat datengnye malah dari orang sebangsa!!
Rejeki aye percaye udeh ade yg ngatur, ternyate masih banyak nyang laen tertarik ama kite, media di Spanyol. Alhamdulille...warung kite sekarang udeh 12 taun. Banyak halangan dan rintangan numpang lewat..tapi kite tetep betahan, promosi Indonesia lewat makanan!!!
Insap deh aye ngedumel gak karuan, ternyate semua jeri paye, manis juge buahnye!! Siape aje yg mau kerja, pasti ade hasilnye...
Kate Pak Ustad, tambah uban tambah bijaksane...(gak ngelir uban ah, biar dibilang bijaksane he he )
